Zechariah 6

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 5 Jump to: Chapter 7 →

1Tab maiṉ ne phir áṉkh uṭhákar nigáh kí; to kyá dekhtá húṉ, ki do paháṛoṉ ke darmiyán se chár rath nikle; aur wuh paháṛ pítal ke the.

2Pahle rath ke ghoṛe suraṉg; dúsre ke mushkí;

3tísre ke nuqra; aur chauthe ke ablaq the.

4Tab maiṉ ne us firishte se jo mujh se kalám kartá thá púchhá, Ai mere áqá, yih kyá haiṉ?

5Aur firishte ne mujhe jawáb diyá, ki Yih ásmán kí chár hawáeṉ haiṉ jo Rabbu’l ‘álamín ke huzúr se niklí haiṉ.

6Aur mushkí ghoṛoṉwálá rath shimálí mulk ko niklá chalá játá hai, aur nuqre ghoṛoṉwálá us ke píchhe, aur ablaq ghoṛoṉwálá junúbí mulk ko.

7Aur suraṉg ghoṛoṉwálá bhí niklá, aur unhoṉ ne cháhá ki dunyá kí sair kareṉ: aur us ne un se kahá, Jáo, dunyá kí sair karo; aur unhoṉ ne dunyá kí sair kí.

8Tab us ne baland áwáz se mujh se kahá, Dekh, jo shimálí mulk ko gaye haiṉ, unhoṉ ne waháṉ merá jí ṭhanḍá kiyá hai.

9Phir Ḳhudáwand ká kalám mujh par názil húá,

10ki Tú áj hí Ḳhaldí, aur Túbiyáh, aur Yada‘iyáh ke pás já, jo Bábul ke asíroṉ kí taraf se ákar Yúsiyáh bin Safaniyáh ke ghar meṉ utarte haiṉ;

11aur un se soná chándí lekar táj baná, aur Yashú‘ bin Yahúsadaq sardár káhin ko pahiná;

12aur us se kah, ki Rabb u’l afwáj yúṉ farmátá hai, ki Dekh, wuh shaḳhs, jis ká nám SHÁḲH hai, us ke zer i sáya ḳhushhálí hogí, aur wuh Ḳhudáwand kí haikal ko ta‘mír karegá;

13háṉ, wuhí Ḳhudáwand kí haikal ko banáegá; aur wuh sáhib i shaukat hogá, aur taḳhtnishín hokar hukúmat karegá; aur us ke sáth káhin bhí taḳhtnishín hogá; aur donoṉ meṉ sulh o salámatí kí mashwarat hogí.

14Aur yih táj Hílam, aur Túbiyáh, aur Yada‘iyáh, aur Hen bin Safaniyáh ke liye Ḳhudáwand kí haikal meṉ yádgár hogá.

15Aur wuh jo dúr haiṉ ákar Ḳhudáwand kí haikal ko ta‘mír kareṉge; tab tum jánoge ki Rabb u’l afwáj ne mujhe tumháre pás bhejá hai. Aur agar tum dil se Ḳhudáwand apne Ḳhudá kí farmánbardárí karoge, to yih báteṉ púrí hoṉgí.

← Chapter 5 Jump to: Chapter 7 →