Zechariah 7

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 6 Jump to: Chapter 8 →

1Dárá kí saltanat ke chauthe baras ke nauweṉ mahíne ya‘ní Kislev mahíne kí chauṭhí táríḳh ko Ḳhudáwand ká kalám Zakariyáh par názil húá;

2aur Baitel ke báshindoṉ ne Sharázar, aur Rajam Malik, aur us ke logoṉ ko bhejá ki Ḳhudáwand se darḳhwást kareṉ,

3aur Rabb u’l afwáj ke ghar ke káhinoṉ aur nabíoṉ se púchheṉ, ki Kyá maiṉ páṉchweṉ mahíne meṉ goshanishín hokar mátam karúṉ, jaisá ki maiṉ ne sálhá sál se kiyá hai?

4Tab Rabb u’l afwáj ká kalám mujh par názil húá,

5ki Mamlukat ke sab logoṉ aur káhinoṉ se kah, ki Jab tum ne páṉchweṉ aur sátweṉ mahíne meṉ in sattar baras tak roza rakkhá, aur mátam kiyá, to kyá kabhí mere liye, ḳháss mere hí liye roza rakkhá thá?

6Aur jab tum kháte píte the, to apne hí liye na kháte píte the?

7Kyá yih wuhí kalám nahíṉ jo Ḳhudáwand ne guzashta nabíoṉ kí ma‘rifat farmáyá, jab Yarúshalem ábád aur ásúdahál thá, aur us kí nawáhí ke shahr aur junúb kí sarzamín aur maidán ábád the?

8Phir Ḳhudáwand ká kalám Zakariyáh par názil húá,

9ki Rabb u’l afwáj ne yúṉ farmáyá thá, ki Rástí se ‘adálat karo, aur har shaḳhs apne bháí par karam aur rahm kiyá kare.

10Aur bewa, aur yatím, aur musáfir, aur miskín par zulm na karo: aur tum meṉ se koí apne bháí ke ḳhiláf dil meṉ burá mansúba na báṉdhe.

11Lekin wuh shanawá na húe, balki unhoṉ ne gardankashí kí, aur apne kánoṉ ko band kiyá táki na sunen.

12Aur unhoṉ ne apne diloṉ ko almás kí mánind saḳht kiyá, táki sharí‘at aur us kalám ko na suneṉ, jo Rabb u’l afwáj ne guzashta nabíoṉ par apní rúh kí ma‘rifat názil farmáyá thá; is liye Rabb u’l afwáj kí taraf se qahr i shadíd názil húá.

13Aur Rabb u’l afwáj ne farmáyá thá, Jis tarah maiṉ ne pukárkar kahá, aur wuh shanawá na húe, usí tarah wuh pukáreṉge, aur maiṉ nahíṉ sunúṉgá.

14Balki un ko sab qaumoṉ meṉ, jin se wuh náwáqif haiṉ, paráganda karúṉgá. Yúṉ un ke ba‘d mulk wírán húá, yaháṉ tak ki kisí ne us meṉ ámad o raft na kí; kyúṉki unhoṉ ne us dilkushá mulk ko wírán kar diyá.

← Chapter 6 Jump to: Chapter 8 →