Zechariah 3

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 2 Jump to: Chapter 4 →

1Aur us ne mujhe yih dikháyá, ki sardár káhin Yashú‘ Ḳhudáwand ke firishte ke sámne khaṛá hai, aur Shaitán us ke dahine háth istáda hai táki us ká muqábala kare.

2Aur Ḳhudáwand ne Shaitán se kahá, Ai Shaitán, Ḳhudáwand tujhe malámat kare; háṉ, wuh Ḳhudáwand, jis ne Yarúshalem ko qubúl kiyá hai, tujhe malámat kare: kyá yih wuh lukṭí nahíṉ jo ág se nikálí gayí hai?

3Aur Yashú‘ maile kapṛe pahine firishte ke sámne khaṛá thá.

4Phir us ne un se jo us ke sámne khaṛe the kahá, Is ke maile kapṛe utár do. Aur us se kahá, Dekh, main ne terí badkirdárí tujh se dúr kí, aur maiṉ tujhe nafís poshák pahináúṉgá.

5Aur us ne kahá, ki Us ke sir par sáf ‘amáma rakkho. Tab unhoṉ ne us ke sir par sáf ‘amáma rakkhá, aur poshák pahináí. Aur Ḳhudáwand ká firishta us ke pás khaṛá rahá.

6Aur Ḳhudáwand ke firishte ne Yashú‘ se tákíd karke kahá,

7Rabb u’l afwáj yúṉ farmátá hai, ki Agar tú merí ráhoṉ par chale aur mere ahkám par ‘amal kare, to mere ghar par hukúmat karegá, aur merí bárgáhoṉ ká nigahbán hogá, aur maiṉ tujhe in meṉ jo yaháṉ khaṛe haiṉ áne jáne kí ijázat dúṉgá.

8Ab, ai Yashú‘ sardár káhin, sun, tú aur tere rafíq jo tere sámne baiṭhte haiṉ; wuh is bát ká ímá haiṉ, ki maiṉ apne bande ya‘ní SHÁḲH ko lánewálá húṉ.

9Kyúṉki us patthar ko jo maiṉ ne Yashú‘ ke sámne rakkhá hai dekh: us par sát áṉkheṉ haiṉ; dekh, maiṉ is par kanda karúṉgá, Rabb u’l afwáj farmátá hai; aur maiṉ is mulk kí badkirdárí ko ek hí din meṉ dúr karúṉgá.

10Rabb u’l afwáj farmátá hai, Usí roz tum meṉ se har ek apne hamsáye ko ták aur anjír ke níche buláegá.

← Chapter 2 Jump to: Chapter 4 →