Zechariah 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to: Chapter 3 →

1Phir maiṉ ne áṉkh uṭhákar nigáh kí, aur kyá dekhtá húṉ, ki ek shaḳhs jaríb háth meṉ liye khaṛá hai.

2Aur maiṉ ne púchhá, Tú kaháṉ játá hai? Us ne jawáb diyá, Yarúshalem kí paimáish ko, táki dekhúṉ ki us kí chauṛáí aur lambáí kitní hai.

3Aur dekho, wuh firishta jo mujh se guftogú kartá thá rawána húá, aur dúsrá firishta us ke pás áyá,

4aur us se kahá, Dauṛ, aur is jawán se kah, ki Yarúshalem insán o haiwán kí kasrat ke bá‘is befasíl bastiyoṉ kí mánind ábád hogá.

5Kyúṉki Ḳhudáwand farmátá hai, Maiṉ us ke liye chároṉ taraf átashí díwár húṉgá, aur us ke andar us kí shaukat.

6Suno, Ḳhudáwand farmátá hai; shimál kí sarzamín se, jaháṉ tum ásmán kí chároṉ hawáoṉ kí mánind paráganda kiye gaye, nikal bhágo, Ḳhudáwand farmátá hai.

7Ai Siyyún, tú jo duḳhtar i Bábul ke sáth bastí hai, nikal bhág.

8Kyúṉki Rabb u’l afwáj, jis ne mujhe apne jalál kí ḳhátir un qaumoṉ ke pás bhejá hai jinhoṉ ne tum ko g̣árat kiyá, yúṉ farmátá hai, ki Jo koí tum ko chhútá hai, merí áṉkh kí putlí ko chhútá hai.

9Kyúṉki, dekh, maiṉ un par apná háth hiláúṉgá, aur wuh apne g̣ulámoṉ ke liye lúṭ hoṉge: tab tum jánoge ki Rabb u’l afwáj ne mujhe bhejá hai.

10Ai duḳhtar i Siyyún, tú gá, aur ḳhushí kar; kyúṉki, dekh, maiṉ ákar tere andar sukúnat karúṉgá, Ḳhudáwand farmátá hai.

11Aur us waqt bahut sí qaumeṉ Ḳhudáwand se mel kareṉgí, aur merí ummat hoṉgí, aur maiṉ tere andar sukúnat karúṉgá; tab tú jánegí ki Rabb u’l afwáj ne mujhe tere pás bhejá hai

12Aur Ḳhudáwand Yahúdáh ko mulk i muqaddas meṉ apní mírás ká baḳhra ṭhahráegá, aur Yarúshalem ko qubúl farmáegá.

13Ai baní Ádam, Ḳhudáwand ke huzúr ḳhámosh raho; kyúṉki wuh apne muqaddas maskan se uṭhá hai.

← Chapter 1 Jump to: Chapter 3 →