Zechariah 5

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 4 Jump to: Chapter 6 →

1Phir maiṉ ne áṉkh uṭhákar nazar kí, aur kyá dekhtá húṉ, ki ek uṛtá húá túmár hai.

2Us ne mujh se púchhá, Tú kyá dekhtá hai? Maiṉ ne jawáb diyá, Ek uṛtá húá túmár dekhtá húṉ, jis kí lambáí bís háth aur chauṛáí das háth hai.

3Phir us ne mujh se kahá, Yih wuh la‘nat hai jo tamám mulk par názil hone ko hai; aur is ke mutábiq har ek chor aur jhúṭhí qasam khánewálá yaháṉ se káṭ ḍálá jáegá.

4Rabb u’l afwáj farmátá hai, Maiṉ use bhejtá húṉ, aur wuh chor ke ghar meṉ aur us ke ghar meṉ jo mere nám kí jhúṭhí qasam khátá hai ghusegá, aur us ke ghar meṉ rahegá, aur use us kí lakṛí aur patthar samet barbád karegá.

5Aur wuh firishta jo mujh se kalám kartá thá niklá, aur us ne mujh se kahá, ki Ab tú áṉkh uṭhákar dekh, kyá nikal rahá hai.

6Maiṉ ne púchhá, Yih kyá hai? Us ne jawáb diyá, Yih ek aifah nikal rahá hai. Aur us ne kahá, ki Tamám mulk meṉ yihí un kí shabíh hai.

7Aur síse ká ek gol sarposh uṭháyá gayá; aur ek ‘aurat aifah meṉ baiṭhí nazar áí.

8Aur us ne kahá, ki Yih sharárat hai. Aur us ne us ko aifah meṉ níche dabákar síse ke us sarposh ko aifah ke muṉh par rakh diyá.

9Phir maiṉ ne áṉkh uṭhákar nigáh kí, aur kyá dekhtá húṉ, ki do ‘aurateṉ nikal áíṉ, aur hawá un ke bázúoṉ meṉ bharí thí: kyúṉki un ke laqlaq ke se bázú the; aur wuh aifah ko ásmán o zamín ke darmiyán uṭhá le gayíṉ.

10Tab maiṉ ne us firishte se jo mujh se kalám kartá thá púchhá, ki Yih aifah ko kaháṉ liye játí haiṉ?

11Us ne mujhe jawáb diyá, Sin‘ár ke mulk ko, táki is ke liye ghar banáeṉ: aur jab wuh taiyár ho, to yih apní jagah meṉ rakkhí jáe.

← Chapter 4 Jump to: Chapter 6 →