2 Kings 1

Chinese TTVR (現代台語譯本羅馬字版)

Jump to: Chapter 2 →

1A-hap sí-liáu, Mô͘-ap pōe-poān Í-sek-lia̍t.

2Í-sek-lia̍t -ông A-hap-siā tī Sat-má-lī-a tùi ông-kiong lâu-téng ê lân-kan poa̍h--lo̍h-lâi, siū-siong; chiū chhe sù-chiá, tùi in kóng, “Lín khì mn̄g Í-kek-lûn ê sîn-bêng Pa-le̍k Se-pok, góa chit-ê siong ōe hó bōe?”

3Siōng Chú ê sù-chiá kā Thê-su-pí -lâng Í-lī-a kóng, “Lí khí--lâi, khì kìⁿ Sat-má-lī-a -ông ê sù-chiá, mn̄g in kóng, ‘Lín khì mn̄g Í-kek-lûn ê sîn-bêng Pa-le̍k Se-pok, sī in-ūi Í-sek-lia̍t tiong bô Siōng-tè sī--bô?

4Lín tio̍h khì kā ông kóng, Siōng Chú án-ni kóng: Lí bōe-tàng koh tùi hiān-chāi teh tó ê bîn-chhn̂g khí--lâi; lí it-tēng ōe sí.’” Í-lī-a chiū khì.

5Sù-chiá tò-khì kìⁿ ông, ông mn̄g in kóng, “Lín sī-án-chóaⁿ tò--lâi?”

6Sù-chiá ìn i kóng, “Goán tú-tio̍h chi̍t ê lâng, i kā goán kóng, ‘Lín tò-khì kìⁿ chhe lín ê ông, tùi i kóng, Siōng Chú án-ni kóng: Lí chhe lâng khì mn̄g Í-kek-lûn ê sîn-bêng Pa-le̍k Se-pok, sī in-ūi Í-sek-lia̍t tiong bô Siōng-tè sī--bô? Só͘-í lí bōe-tàng koh tùi hiān-chāi teh tó ê bîn-chhn̂g khí--lâi; lí it-tēng ōe sí.’”

7Ông mn̄g in kóng, “Lâi tú-tio̍h lín, kā lín kóng chiah-ê ōe ê lâng sī sím-mi̍h khoán lâng?”

8In ìn kóng, “I chhēng ū-mn̂g ê saⁿ, io hâ phê-tòa.” Ông kóng, “I it-tēng sī Thê-su-pí -lâng Í-lī-a.”

9Ông chiū phài chi̍t ê koán gō͘-cha̍p lâng ê kun-koaⁿ chhōa hiah-ê pō͘-hā khì Í-lī-a hia. I peh-chiūⁿ soaⁿ, khòaⁿ-tio̍h Í-lī-a chē tī soaⁿ-téng. Kun-koaⁿ kā Í-lī-a kóng, “Siōng-tè tiōng-iōng ê lâng, ông bēng-lēng lí lo̍h--lâi.”

10Í-lī-a ìn kun-koaⁿ kóng, “Góa nā-sī Siōng-tè tiōng-iōng ê lâng, goān thiⁿ kàng-hé, sio lí kap lí hit gō͘-cha̍p ê lâng.” Chiū ū hé tùi thiⁿ lo̍h--lâi, sio-bia̍t i kap hit gō͘-cha̍p lâng.

11Ông koh phài chi̍t ê koán gō͘-cha̍p lâng ê kun-koaⁿ chhōa hiah-ê pō͘-hā khì Í-lī-a hia. Kun-koaⁿ kā Í-lī-a kóng, “Siōng-tè tiōng-iōng ê lâng, ông bēng-lēng lí kóaⁿ-kín lo̍h--lâi.”

12Í-lī-a ìn kóng, “Góa nā-sī Siōng-tè tiōng-iōng ê lâng, goān thiⁿ kàng-hé, sio lí kap lí hit gō͘-cha̍p ê lâng.” Chiū ū chin tōa ê hé tùi thiⁿ lo̍h--lâi, sio-bia̍t i kap hit gō͘-cha̍p lâng.

13Ông tē-saⁿ piàn koh phài chi̍t ê koán gō͘-cha̍p lâng ê kun-koaⁿ chhōa hiah-ê pō͘-hā khì. Hit-ê tē-saⁿ tūi ê kun-koaⁿ peh-chiūⁿ soaⁿ, kūi tī Í-lī-a ê bīn-chêng, ai-kiû i, kóng, “Siōng-tè tiōng-iōng ê lâng, kiû lí khòaⁿ góa kap lí chit gō͘-cha̍p ê po̍k-jîn ê sìⁿ-miā chòe pó-pòe.

14Í-keng ū hé tùi thiⁿ kàng-lo̍h, sio-bia̍t í-chêng nn̄g ê kun-koaⁿ, kap hit chi̍t-pah lâng. Taⁿ kiû lí khòaⁿ góa ê sìⁿ-miā chòe pó-pòe.”

15Siōng Chú ê sù-chiá tùi Í-lī-a kóng, “Lí kap i lo̍h--khì, m̄-bián kiaⁿ i.” Í-lī-a chiū khí--lâi, kap i lo̍h-khì kìⁿ ông,

16tùi ông kóng, “Siōng Chú án-ni kóng, ‘Lí phài lâng khì mn̄g Í-kek-lûn ê sîn-bêng Pa-le̍k Se-pok, sī in-ūi Í-sek-lia̍t tiong bô Siōng-tè hō͘ lí thang mn̄g sī--bô? Só͘-í lí bōe-tàng koh tùi hiān-chāi teh tó ê bîn-chhn̂g khí--lâi, lí it-tēng ōe sí.’”

17A-hap-siā chiū sí, tú chiàu Í-lī-a só͘ thoân-ta̍t Siōng Chú ê ōe. Ông bô kiáⁿ, i ê sió-tī Iok-hô-lân sòa-chiap i choh-ông; hit-sî sī Iû-tāi -ông Iok-sa-hoat ê kiáⁿ Iok-lân choh-ông tē-jī nî.

18A-hap-siā kî-tha ê sū-chek lóng kì-chài tī Í-sek-lia̍t Lia̍t-ông-sú.

Jump to: Chapter 2 →