2 Kings 21

Chinese TTVR (現代台語譯本羅馬字版)

← Chapter 20 Jump to: Chapter 22 →

1Má-ná-se chē-ūi ê sî cha̍p-jī hè, tī Iâ-lō͘-sat-léng choh-ông gō͘-cha̍p-gō͘ nî; i ê lāu-bú kiò-chòe Hia̍p-se-pa.

2I chòe Siōng Chú khòaⁿ-chòe pháiⁿ ê sū, o̍h hiah-ê hō͘ Siōng Chú tī Í-sek-lia̍t bīn-chêng kóaⁿ-chhut ê lia̍t-kok só͘ chòe khó-ò͘ⁿ ê sū.

3I tiông-kiàn i ê lāu-pē Hi-se-ka só͘ húi-hoāi ê soaⁿ-thâu-tôaⁿ; chiàu Í-sek-lia̍t -ông A-hap ê só͘-chòe, ūi Pa-le̍k khí chè-tôaⁿ, chō A-sià-la ê thiāu-siōng, koh kèng-pài ho̍k-sāi thiⁿ-téng ê bān-siōng.

4I tī Siōng Chú ê tiān-lāi ūi-tio̍h hiah-ê sîn-bêng khí kúi-nā ê tôaⁿ; Siōng Chú bat kí chit-ê sèng-tiān, kóng, “Góa ê miâ eng-kai tī Iâ-lō͘-sat-léng siū kèng-hōng.”

5Má-ná-se tī Siōng Chú ê tiān nn̄g ê tiâⁿ lāi-bīn, ūi-tio̍h thiⁿ-téng ê bān-siōng khí chè-tôaⁿ.

6I sio i ê kiáⁿ hiàn-chòe chè, pok-kòa, kiâⁿ hoat-su̍t, mn̄g khan-bông--ê kap tâng-ki toh-thâu; chòe chin chōe Siōng Chú khòaⁿ-chòe pháiⁿ ê sū, kek Siōng Chú siū-khì.

7Má-ná-se koh tī tiān-lāi chhāi i tiau-khek ê A-sià-la ê siōng. Koan-hē chit-keng sèng-tiān, Siōng Chú bat tùi Tāi-pi̍t kap i ê kiáⁿ Só͘-lô-bûn kóng, “Chit-keng sèng-tiān kap Iâ-lō͘-sat-léng, sī góa tī Í-sek-lia̍t chi-cho̍k tiong só͘ kéng-soán--ê, góa ê miâ tio̍h tī chia éng-oán siū kèng-hōng.

8Í-sek-lia̍t -lâng nā thiaⁿ-thàn góa só͘-ū ê bēng-lēng, chun-hêng góa ê po̍k-jîn Mô͘-se só͘ hoan-hù in it-chhè ê lu̍t-hoat, góa chiū bô koh hō͘ in tùi góa só͘ siúⁿ-sù in lia̍t-chó͘ ê thó͘-tōe siū chhian-sóa.”

9M̄-kú in bô thiaⁿ-thàn; Má-ná-se chhōa in chòe pháiⁿ, pí Siōng Chú tī Í-sek-lia̍t -lâng bīn-chêng só͘ húi-bia̍t ê lia̍t-kok koh-khah giâm-tiōng.

10Siōng Chú thok I ê po̍k-jîn chèng sian-ti kóng,

11“In-ūi Iû-tāi -ông Má-ná-se chòe chiah-ê khó-ò͘ⁿ ê sū, pí i í-chêng ê A-mô͘-lī -lâng ê só͘-chòe koh-khah pháiⁿ, koh ēng i ê ngó͘-siōng hō͘ Iû-tāi -lâng hām-lo̍h chōe,

12só͘-í Siōng Chú — Í-sek-lia̍t ê Siōng-tè án-ni kóng, ‘Góa beh kàng chai-hō tī Iâ-lō͘-sat-léng kap Iû-tāi, hō͘ thiaⁿ--tio̍h ê lâng lóng kiaⁿ-chi̍t-tiô.

13Góa beh ēng niû Sat-má-lī-a ê chîn-sòaⁿ kap A-hap -ke ê tūi-chîn, khan tī Iâ-lō͘-sat-léng ê téng-bīn; góa beh chhin-chhiūⁿ lâng teh chhit pôaⁿ-á án-ni chhit Iâ-lō͘-sat-léng, chhit-liáu chiū kā i tò-khap.

14Góa beh khì-sak góa só͘ chhun ê chú-bîn, chiong in kau hō͘ tùi-te̍k, chiâⁿ-chòe la̍h-bu̍t hō͘ tùi-te̍k chhiúⁿ--khì.

15In-ūi in tùi in ê lia̍t-chó͘ chhut Ai-ki̍p hit-ji̍t kàu kin-á-ji̍t, siông-siông chòe góa khòaⁿ-chòe pháiⁿ ê sū, kek góa siū-khì.’”

16Má-ná-se hō͘ Iû-tāi -lâng hoān-chōe, chòe Siōng Chú khòaⁿ-chòe pháiⁿ ê sū; chit-ê chōe í-gōa, i koh lâu chin chōe bû-ko͘ ê lâng ê huih, hō͘ Iâ-lō͘-sat-léng sì-kòe lóng sī huih.

17Má-ná-se kî-tha ê sū-chek kap i ê só͘-chòe, í-ki̍p só͘ hoān ê chōe, lóng kì-chài tī Iû-tāi Lia̍t-ông-sú.

18Má-ná-se tńg-khì i ê lia̍t-chó͘ hia liáu-āu, an-chòng tī i ka-kī kiong-lāi ê hn̂g, chiū-sī O͘-sat ê hn̂g. I ê kiáⁿ A-bûn sòa-chiap i choh-ông.

19A-bûn chē-ūi ê sî jī-cha̍p-jī hè, tī Iâ-lō͘-sat-léng choh-ông nn̄g nî; i ê lāu-bú kiò-chòe Bí-su-lī-bi̍t, sī Iok-thê-pa -lâng Hap-ló͘-su ê cha-bó͘-kiáⁿ.

20I chòe Siōng Chú khòaⁿ-chòe pháiⁿ ê sū, chhin-chhiūⁿ i ê lāu-pē Má-ná-se só͘ chòe--ê.

21I kiâⁿ i ê lāu-pē só͘ kiâⁿ ê lō͘, ho̍k-sāi i ê lāu-pē só͘ ho̍k-sāi hiah-ê ngó͘-siōng,

22khì-sak Siōng Chú — i ê chó͘-sian ê Siōng-tè, bô kiâⁿ Siōng Chú ê tō-lō͘.

23A-bûn ê jîn-sîn pōe-poān i, tī ông-kiong lāi-bīn kā i thâi-sí.

24M̄-kú kok-lāi ê jîn-bîn chiong hiah-ê pōe-poān A-bûn -ông ê lâng thâi-sí, siat-li̍p i ê kiáⁿ Iok-se-a sòa-chiap i choh-ông.

25A-bûn kî-tha ê sū-chek lóng kì-chài tī Iû-tāi Lia̍t-ông-sú.

26Lâng kā i an-chòng tī O͘-sat ê hn̂g lāi-bīn i ka-kī ê bōng. I ê kiáⁿ Iok-se-a sòa-chiap i choh-ông.

← Chapter 20 Jump to: Chapter 22 →