2 Kings 8

Chinese TTVR (現代台語譯本羅馬字版)

← Chapter 7 Jump to: Chapter 9 →

1Í-lī-sa bat hō͘ chi̍t ê hū-jîn-lâng ê kiáⁿ koh-oa̍h; i tùi chit-ê hū-jîn-lâng kóng, “Lí kap lí choân-ke kóaⁿ-kín khì tòa tī ōe-tàng seng-oa̍h ê só͘-chāi, in-ūi Siōng Chú beh hō͘ ki-hng lîm-kàu chit-ê só͘-chāi chhit nî kú.”

2Hū-jîn-lâng chiū chiàu Siōng-tè tiōng-iōng ê lâng ê ōe, kap i choân-ke chhut-hoat khì Hui-lī-sū -lâng ê tōe, tī hia tòa chhit nî.

3Chhit nî móa, hit-ê hū-jîn-lâng tùi Hui-lī-sū -lâng ê tōe tò--lâi. I ūi-tio̍h beh siu-hôe ka-kī ê chhù-the̍h chhân-hn̂g khì kìⁿ ông.

4Hit-sî, ông kap Siōng-tè tiōng-iōng ê lâng ê po̍k-jîn Ki-hap-se teh kóng-ōe; ông kóng, “Chhiáⁿ lí chiong Í-lī-sa só͘ chòe it-chhè ê tōa-sū kā góa kóng.”

5Ki-hap-se teh kā ông kóng Í-lī-sa án-chóaⁿ hō͘ sí-lâng koh-oa̍h ê sî, tú-hó Í-lī-sa hō͘ i ê kiáⁿ koh-oa̍h ê hit-ê hū-jîn-lâng, ūi-tio̍h beh siu-hôe i ê chhù-the̍h chhân-hn̂g lâi kìⁿ ông. Ki-hap-se kóng, “Góa ê chú góa ê ông, chit-ê chiū-sī hit-ê hū-jîn-lâng; hit-ê sī i ê kiáⁿ, Í-lī-sa ū hō͘ i koh-oa̍h.”

6Ông mn̄g hit-ê hū-jîn-lâng, i chiū kā ông kóng; ông chiū ūi-tio̍h i phài chi̍t ê koaⁿ-oân, kóng, “Só͘-ū sio̍k chit-ê hū-jîn-lâng--ê lóng tio̍h hêng--i; tùi i lī-khui pún-tōe hit-ji̍t kàu kin-á-ji̍t, i ê chhân-hn̂g só͘ chhut-sán--ê, mā lóng tio̍h hêng--i.”

7Í-lī-sa lâi kàu Tāi-má-sū-kek, tú-hó Sū-lī-a -ông Piān Hap-ta̍t teh phòa-pīⁿ; ū lâng tùi ông pò-kò, kóng, “Siōng-tè tiōng-iōng ê lâng lâi tī chia.”

8Ông chiū tùi Hap-sih kóng, “Lí tòa lé-mi̍h khì kìⁿ Siōng-tè tiōng-iōng ê lâng, pài-thok i mn̄g Siōng Chú, khòaⁿ góa chit-ê pīⁿ ōe hó bōe?”

9Hap-sih chiū khì kìⁿ Í-lī-sa. I ēng sì-cha̍p chiah lo̍k-tô chài Tāi-má-sū-kek ta̍k-khoán ê hó-mi̍h chòe lé-mi̍h, khiā tī Í-lī-sa ê bīn-chêng, kóng, “Lí ê kiáⁿ Sū-lī-a -ông Piān Hap-ta̍t phài góa lâi lí chia, chhiáⁿ-mn̄g lí, ‘Góa chit-ê pīⁿ kiám ōe hó?’”

10Í-lī-sa kā i kóng, “Lí khì hôe-ho̍k i, kóng, ‘Lí ê pīⁿ it-tēng ōe hó.’ M̄-kú Siōng Chú chí-sī góa, i it-tēng ōe sí.”

11Í-lī-sa ti̍t-ti̍t khòaⁿ Hap-sih, khòaⁿ kah i m̄-chai beh án-chóaⁿ. Í-lī-sa khai-sí háu.

12Hap-sih kóng, “Góa ê chú, lí sī-án-chóaⁿ teh háu?” Í-lī-sa kóng, “In-ūi góa chai lí ōe án-chóaⁿ siong-hāi Í-sek-lia̍t -lâng; pàng-hé sio in ê pó-lúi, ēng to thâi-sí in ê siàu-liân-lâng, siak-sí in ê eⁿ-á, phòa-khui ū-sin ê hū-jîn-lâng.”

13Hap-sih kóng, “Lí ê po̍k-jîn sǹg siáⁿ, put-kò sī chi̍t chiah káu, ná ōe-tàng chòe chit-khoán tōa tāi-chì?” Í-lī-sa ìn kóng, “Siōng Chú chí-sī góa, lí ōe chòe Sū-lī-a -ông.”

14Hap-sih lī-khui Í-lī-sa, tò-khì i ê chú-lâng hia; chú-lâng mn̄g i kóng, “ Í-lī-sa kā lí kóng sím-mi̍h?” I ìn kóng, “I kā góa kóng, lí ê pīⁿ it-tēng ōe hó.”

15Keh-ji̍t Hap-sih the̍h kāu ê pò͘ ùn chúi, khàm ông ê bīn, kā i hip--sí. Hap-sih chiū sòa-chiap i choh-ông.

16A-hap ê kiáⁿ Í-sek-lia̍t -ông Iok-hô-lân tē-gō͘ nî, Iok-sa-hoat ê kiáⁿ Iok-lân khai-sí chòe Iû-tāi -ông.

17Iok-lân chē-ūi ê sî saⁿ-cha̍p-jī hè, tī Iâ-lō͘-sat-léng choh-ông poeh nî.

18I kiâⁿ Í-sek-lia̍t chu-ông ê lō͘, só͘-chòe kap A-hap -ke kâng-khoán; in-ūi i chhōa A-hap ê cha-bó͘-kiáⁿ chòe bó͘, chòe Siōng Chú khòaⁿ-chòe pháiⁿ ê sū.

19M̄-kú Siōng Chú in-ūi I ê po̍k-jîn Tāi-pi̍t ê iân-kò͘, m̄-kam bia̍t Iû-tāi. Siōng Chú chiàu I tùi Tāi-pi̍t ê èng-ún, éng-oán siúⁿ-sù chi̍t pha teng hō͘ Tāi-pi̍t kap i ê kiáⁿ-sun.

20Iok-lân choh-ông ê sî, Í-tong pōe-poān Iû-tāi, thoat-lī Iû-tāi ê thóng-tī, siat-li̍p in ka-kī ê ông.

21Iok-lân tòa só͘-ū ê chiàn-chhia kè-khì Sat-ek, soah siū pau-ûi. Iok-lân mî--sî khí--lâi, tu̍t-phòa pau-ûi i ê Í-tong -lâng kap chiàn-chhia-tiúⁿ; m̄-kú Iû-tāi kun-peng tô-cháu, ta̍k-ê tò-khì in tau.

22Án-ni, Í-tong -lâng pōe-poān Iû-tāi, thoat-lī Iû-tāi ê thóng-tī kàu kin-á-ji̍t. Siâng hit-sî, Li̍p-ná mā pōe-poān.

23Iok-lân kî-tha ê sū-chek kap i ê só͘-chòe, lóng kì-chài tī Iû-tāi Lia̍t-ông-sú.

24Iok-lân tńg-khì i ê lia̍t-chó͘ hia, kap i ê lia̍t-chó͘ an-chòng tī Tāi-pi̍t -siâⁿ. I ê kiáⁿ A-hap-siā sòa-chiap i choh-ông.

25A-hap ê kiáⁿ Í-sek-lia̍t -ông Iok-hô-lân cha̍p-jī nî, Iok-lân ê kiáⁿ A-hap-siā khai-sí chòe Iû-tāi -ông.

26A-hap-siā chē-ūi ê sî jī-cha̍p-jī hè, tī Iâ-lō͘-sat-léng choh-ông chi̍t nî. I ê lāu-bú kiò-chòe A-tha-lī-ngá, sī Í-sek-lia̍t -ông Àm-lī ê cha-bó͘-sun.

27I kiâⁿ A-hap -ke ê lō͘, chòe Siōng Chú khòaⁿ-chòe pháiⁿ ê sū, kap A-hap -ke kâng-khoán; in-ūi i sī A-hap -ke ê kiáⁿ-sài.

28A-hap-siā kap A-hap ê kiáⁿ Iok-hô-lân chòe-hé khì Ki-lia̍t ê La-boa̍t, kap Sū-lī-a -ông Hap-sih kau-chiàn; Sū-lī-a -lâng phah-siong Iok-hô-lân.

29Iok-hô-lân -ông tò-khì Iâ-su-lia̍t, beh i-tī i tī La-boa̍t kap Sū-lī-a -ông Hap-sih kau-chiàn ê sî só͘ siū ê siong. Iok-lân ê kiáⁿ Iû-tāi -ông A-hap-siā lo̍h-khì Iâ-su-lia̍t, thàm-hóng A-hap ê kiáⁿ Iok-hô-lân, in-ūi i phòa-pīⁿ.

← Chapter 7 Jump to: Chapter 9 →