2 Kings 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Iû-tāi -ông A-hap-siā ê kiáⁿ Iok-a-si choh-ông tē-jī-cha̍p-saⁿ nî, Iâ-hō͘ ê kiáⁿ Iok-hap-su tī Sat-má-lī-a choh-ông, thóng-tī Í-sek-lia̍t cha̍p-chhit nî.

2I chòe Siōng Chú khòaⁿ-chòe pháiⁿ ê sū, tè Nî-pat ê kiáⁿ Iâ-lô-pho-an ê só͘-chòe, hō͘ Í-sek-lia̍t -lâng hām-lo̍h chōe, lóng bô thêng-chí.

3Siōng Chú chiū tùi Í-sek-lia̍t -lâng hoat siū-khì, kúi nā piàn chiong in kau tī Sū-lī-a -ông Hap-sih kap i ê kiáⁿ Piān Hap-ta̍t ê chhiú.

4Iok-hap-su khún-kiû Siōng Chú, Siōng Chú thiaⁿ i ê kî-tó, in-ūi I ū khòaⁿ-kìⁿ Í-sek-lia̍t -lâng siū Sū-lī-a -ông chè-ap.

5Siōng Chú siúⁿ-sù Í-sek-lia̍t chi̍t ê chín-kiù-chiá, kiù in thoat-lī Sū-lī-a -lâng ê chhiú. Í-sek-lia̍t -lâng chiū iû-goân pêng-an tòa tī in ka-kī ê chhù.

6M̄-kú in bô lī-khui Iâ-lô-pho-an ê ke só͘ kiâⁿ ê lō͘, hō͘ Í-sek-lia̍t -lâng hām-lo̍h chōe, kè-sio̍k hoān-chōe; tī Sat-má-lī-a, A-sià-la ê thiāu-siōng iáu lâu--teh.

7Sū-lī-a -ông phah-pāi Í-sek-lia̍t, thún-ta̍h in chhin-chhiūⁿ teh thún-ta̍h ngó͘-kok-tiûⁿ ê thô͘-soa. Sū-lī-a -ông chí-ū ún-chún Iok-hap-su lâu bé-peng gō͘-cha̍p, chiàn-chhia cha̍p tâi, kap pō͘-peng chi̍t-bān.

8Iok-hap-su kî-tha ê sū-chek, i só͘ chòe ê sū kap sêng-chiū, lóng kì-chài tī Í-sek-lia̍t Lia̍t-ông-sú.

9Iok-hap-su tńg-khì i ê lia̍t-chó͘ hia liáu-āu, an-chòng tī Sat-má-lī-a; i ê kiáⁿ Iok-hôa-si sòa-chiap i choh-ông.

10Iû-tāi -ông Iok-a-si saⁿ-cha̍p-chhit nî, Iok-hap-su ê kiáⁿ Iok-hôa-si tī Sat-má-lī-a choh-ông, chòe Í-sek-lia̍t -ông cha̍p-la̍k nî.

11I chòe Siōng Chú khòaⁿ-chòe pháiⁿ ê sū, bô lī-khui Nî-pat ê kiáⁿ Iâ-lô-pho-an ê lō͘, hō͘ Í-sek-lia̍t -lâng hām-lo̍h chōe, kè-sio̍k hoān-chōe.

12Iok-hôa-si kî-tha ê sū-chek, i ê só͘-chòe, í-ki̍p i kap Iû-tāi -ông A-má-siā kau-chiàn ióng-béng ê sū, lóng kì-chài tī Í-sek-lia̍t Lia̍t-ông-sú.

13Iok-hôa-si tńg-khì i ê lia̍t-chó͘ hia, kap Í-sek-lia̍t chiah-ê ông chòe-hé an-chòng tī Sat-má-lī-a. I ê kiáⁿ Iâ-lô-pho-an Jī-sè chē ông-ūi.

14Í-lī-sa hoān-tio̍h tì-miā ê pīⁿ. Í-sek-lia̍t -ông Iok-hôa-si lo̍h-lâi khòaⁿ i, phak tī i ê bīn thî-khàu, kóng, “Su-hū ah, su-hū ah! Í-sek-lia̍t ê chiàn-chhia kap bé-peng ah!”

15Í-lī-sa tùi i kóng, “Lí khì gia̍h keng-chìⁿ.” I chiū khì gia̍h keng kap chìⁿ lâi.

16Í-lī-sa koh kā Í-sek-lia̍t -ông kóng, “Lí chún-pī khui keng.” I chiū chún-pī khui keng. Í-lī-sa kā ông ê chhiú hōaⁿ--teh, kóng,

17“Lí phah-khui tang-pêng ê thang-á.” I chiū phah-khui. Í-lī-sa kóng, “Siā-chìⁿ!” I chiū siā-chìⁿ. Í-lī-sa kóng, “Che sī Siōng Chú sèng-lī ê chìⁿ, thâi-iâⁿ Sū-lī-a -lâng ê chìⁿ. Lí ōe tī A-hut kong-kek Sū-lī-a -lâng, thiat-tóe kā in siau-bia̍t.”

18Í-lī-sa koh kóng, “Chìⁿ gia̍h--khí-lâi.” I chiū kā chìⁿ gia̍h--khí-lâi. Í-lī-sa koh kā ông kóng, “Phah thô͘-kha.” Ông phah saⁿ piàn chiū thêng--teh.

19Siōng-tè tiōng-iōng ê lâng tùi i siū-khì kóng, “Lí eng-kai tio̍h phah gō͘ la̍k piàn, chiah ōe-tàng phah-pāi Sū-lī-a, thiat-tóe kā i siau-bia̍t. Taⁿ, lí chí-ū ōe-tàng phah-pāi Sū-lī-a -lâng saⁿ piàn.”

20Í-lī-sa sí, lâng kā i bâi-chòng. Ta̍k-nî chhun-thiⁿ, Mô͘-ap -lâng ōe lâi chhim-hoān Í-sek-lia̍t.

21Ū chi̍t piàn, ū lâng tú-á teh bâi-chòng sí-lâng, hut-jiân khòaⁿ-tio̍h kui-tīn Mô͘-ap -lâng, chiū chiong sí-lâng hiat tī Í-lī-sa ê bōng-lāi, kóaⁿ-kín tô-cháu. Sí-lâng chi̍t-ē kha̍p-tio̍h Í-lī-sa ê kut-thâu, chiū koh-oa̍h, khiā--khí-lâi.

22Iok-hôa-si ê lāu-pē Iok-hap-su chāi-ūi ê sî, Sū-lī-a -ông Hap-sih siông-siông chè-ap Í-sek-lia̍t -lâng.

23M̄-kú Siōng Chú in-ūi I kap A-pek-la-hán, Í-sat, Ngá-kok só͘ li̍p ê iok, iû-goân si-un hō͘ Í-sek-lia̍t, lîn-bín in, koàn-kò͘ in, m̄-kam kā in châu-bia̍t, m̄-kam kā in pàng-sak.

24Sū-lī-a -ông Hap-sih sí, i ê kiáⁿ Piān Hap-ta̍t sòa-chiap i choh-ông.

25Í-chêng Hap-sih kap Iok-hap-su kau-chiàn, tùi i ê chhiú kong-chhú kúi-nā ê siâⁿ; Iok-hap-su ê kiáⁿ Iok-hôa-si saⁿ piàn phah-pāi Hap-sih ê kiáⁿ Piān Hap-ta̍t, siu-hôe hiah-ê siâⁿ.

← Chapter 12 Jump to: Chapter 14 →