2 Kings 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Sū-lī-a -ông ê goân-sòe Nái-bān, tī i ê chú-lâng bīn-chêng sī tiōng-iàu jîn-bu̍t, chin siū chun-tiōng, in-ūi Siōng Chú bat thong-kè i hō͘ Sū-lī-a tek-sèng. I sī kiông-béng ê ióng-sū; m̄-kú tì-tio̍h bâ-hong-pīⁿ.

2Ū chi̍t piàn, Sū-lī-a -lâng kui-tīn chhut--khì, tùi Í-sek-lia̍t -tōe lia̍h chi̍t ê cha-bó͘ gín-á; i chiū sū-hāu Nái-bān ê bó͘.

3Chit-ê cha-bó͘ gín-á kā i ê lú-chú-lâng kóng, “Khó͘-bōe-tit góa ê chú-lâng ōe-tàng khì kìⁿ Sat-má-lī-a ê sian-ti; i it-tēng ōe-tàng i-hó chú-lâng ê bâ-hong-pīⁿ.”

4Nái-bān khì tùi i ê chú-lâng kóng, “ Í-sek-lia̍t ê cha-bó͘ gín-á án-ni án-ni kóng.”

5Sū-lī-a -ông kóng, “Lí thang khì, góa mā beh kià lí the̍h chi̍t tiuⁿ phoe hō͘ Í-sek-lia̍t -ông.” Nái-bān chiū chhut-hoat, tòa saⁿ-pah kong-kun ê gûn, chhit-cha̍p kong-kun ê kim, cha̍p thò i-ho̍k.

6I koh chiong hit-tiuⁿ phoe the̍h hō͘ Í-sek-lia̍t -ông; phoe-lāi án-ni siá, “Góa phài góa ê jîn-sîn Nái-bān the̍h phoe khì kìⁿ lí, lí tio̍h i-hó i ê bâ-hong-pīⁿ.”

7Í-sek-lia̍t -ông phoe khòaⁿ-liáu, chiū thiah-li̍h i ê saⁿ, kóng, “Góa kiám sī Siōng-tè, ōe-tàng hō͘ lâng sí, hō͘ lâng oa̍h? Chit-ê lâng kèng-jiân phài lâng lâi góa chia, kiò góa tio̍h i-hó i ê jîn-sîn ê bâ-hong-pīⁿ; chhiáⁿ lín chim-chiok siūⁿ, khòaⁿ chit-ê lâng án-chóaⁿ chhē-khang-chhē-phāng kong-kek góa.”

8Siōng-tè tiōng-iōng ê lâng Í-lī-sa thiaⁿ-kìⁿ Í-sek-lia̍t -ông thiah-li̍h i ê saⁿ, chiū chhe lâng khì kìⁿ ông kóng, “Lí sī-án-chóaⁿ thiah-li̍h saⁿ? Hō͘ hit-ê lâng lâi góa chia, i chiū chai Í-sek-lia̍t tiong ū sian-ti.”

9Nái-bān chiū tòa i ê bé-chhia-tūi lâi, thêng tī Í-lī-sa ê chhù mn̂g-kháu.

10Í-lī-sa chhe chi̍t ê sù-chiá tùi Nái-bān kóng, “Lí khì Iok-tàn-hô sóe seng-khu sóe chhit piàn, lí ê bah ōe ho̍k-goân, lí chiū chheng-khì.”

11Nái-bān chiū siū-khì, lī-khui, kóng, “Góa pún-lâi siūⁿ-kóng i it-tēng ōe chhut-lâi kìⁿ góa, khiā-teh kiû-kiò Siōng Chú — i ê Siōng-tè ê miâ, tī hoān-tio̍h pīⁿ ê só͘-chāi iô-chhiú, i-hó góa ê bâ-hong-pīⁿ.

12Tāi-má-sū-kek ê A-má-ná-hô kap Hoat-ní-hoat-hô, kiám bô pí Í-sek-lia̍t só͘-ū ê chúi khah hó? Góa tī hia sóe seng-khu kiám bōe tit-tio̍h chheng-khì?” I chiū siū-khì, oa̍t-tńg-sin chòe i khì.

13I hiah-ê po̍k-jîn chìn-chêng, tùi i kóng, “Chú-lâng, sian-ti nā kah lí khì chòe khùn-lân ê tāi-chì, lí kiám bô beh chòe? Hô-hòng i kan-ta tùi lí kóng, khì sóe chiū chheng-khì?”

14Nái-bān chiū chiàu Siōng-tè tiōng-iōng ê lâng ê ōe lo̍h-khì Iok-tàn-hô chìm chhit piàn; i ê bah ho̍k-goân chhin-chhiūⁿ gín-á ê bah, i chiū chheng-khì.

15I kap só͘-ū tè i ê lâng tńg-lâi Siōng-tè tiōng-iōng ê lâng hia, khiā tī i ê bīn-chêng kóng, “Taⁿ góa chai, choân sè-kài Í-sek-lia̍t í-gōa, bô Siōng-tè. Hiān-chāi chhiáⁿ lí siu lí ê po̍k-jîn ê lé-mi̍h.”

16Í-lī-sa kóng, “Góa kí góa só͘ ho̍k-sāi éng-oa̍h ê Siōng Chú chiù-chōa, góa bô siu.” Nái-bān it-chài chhiáⁿ i siu, i lóng m̄-khéng.

17Nái-bān kóng, “Lí nā bô beh chiap-siū, chhiáⁿ lí chiong nn̄g chiah lô ōe-tàng chài ê thô͘ hō͘ lí ê po̍k-jîn. Tùi hiān-chāi khí, lí ê po̍k-jîn bô beh koh tùi pa̍t-ê sîn-bêng hiàn sio-hòa-chè á-sī pa̍t-khoán ê chè, chí-ū hiàn hō͘ Siōng Chú.

18M̄-kú ū chi̍t hāng sū, goān Siōng Chú sià-bián lí ê po̍k-jîn, chiū-sī góa ê chú-lâng ji̍p Lîm-bûn -biō phak-pài ê sî, góa tio̍h sū-hāu i, só͘-í góa mā tio̍h tī Lîm-bûn -biō phak-pài; goān Siōng Chú tī chit-hāng sū sià-bián lí ê po̍k-jîn.”

19Í-lī-sa chiū kā i kóng, “Lí thang pêng-an tò--khì.” Nái-bān lī-khui liáu, kiâⁿ chi̍t chām lō͘,

20Siōng-tè tiōng-iōng ê lâng Í-lī-sa ê po̍k-jîn Ki-hap-se siūⁿ-kóng, “Góa ê chú-lâng m̄-khéng chiap-siū chit-ê Sū-lī-a -lâng Nái-bān tòa--lâi ê lé-mi̍h; góa kí éng-oa̍h ê Siōng Chú chiù-chōa, góa beh cháu-khì jip i, tùi i the̍h--chi̍t-kóa.”

21Ki-hap-se chiū khì jip Nái-bān. Nái-bān khòaⁿ-tio̍h ū lâng teh jip i, chiū lo̍h-chhia gêng-chiap i, kóng, “Kiám ū sím-mi̍h tāi-chì?”

22Ki-hap-se kóng, “Bô, bô te̍k-pia̍t ê tāi-chì. M̄-kú góa ê chú-lâng chhe góa lâi, kóng, ‘Tú-chiah ū sian-ti ê nn̄g ê siàu-liân ha̍k-seng, tùi Í-hoat-liân soaⁿ-khu lâi góa chia; chhiáⁿ lí ēng gûn saⁿ-cha̍p kong-kun, i-ho̍k nn̄g thò hō͘ in.’”

23Nái-bān kóng, “Chhiáⁿ chiap-siū la̍k-cha̍p kong-kun.” Nái-bān it-chài chhiáⁿ i siu. Nái-bān chiū chiong chng tī nn̄g ê tē-á hit la̍k-cha̍p kong-kun ê gûn, kap nn̄g thò i-ho̍k, kau hō͘ i nn̄g ê po̍k-jîn phāiⁿ--teh, kiâⁿ tī Ki-hap-se ê thâu-chêng.

24In kàu soaⁿ-lûn-á, Ki-hap-se tùi in ê chhiú chiap mi̍h-kiāⁿ, hē ji̍p-khì chhù-lāi; chiū chhe in tńg--khì, in chiū tò--khì.

25I ji̍p-khì khiā tī chú-lâng ê bīn-chêng. Í-lī-sa mn̄g i kóng, “ Ki-hap-se, lí tùi tó-ūi lâi?” Ki-hap-se ìn kóng, “Lí ê po̍k-jîn bô khì tó-ūi.”

26Í-lī-sa kā i kóng, “Hit-ê lâng lo̍h-chhia gêng-chiap lí ê sî, góa ê sim kiám bô kap lí tī hia? Che kiám sī chiap-siū gûn, chiap-siū i-ho̍k, kaⁿ-ná-hn̂g, phû-tô-hn̂g, gû, iûⁿ, po̍k-jîn, lú-pī ê sî?

27In-ūi án-ni Nái-bān ê bâ-hong-pīⁿ beh thoân hō͘ lí kap lí ê hō͘-tāi, ti̍t-kàu éng-oán.” Ki-hap-se tùi Í-lī-sa ê bīn-chêng thè--chhut-khì, chiū tì-tio̍h bâ-hong-pīⁿ, bah pe̍h kah chhin-chhiūⁿ seh.

← Chapter 4 Jump to: Chapter 6 →