2 Kings 20

Chinese TTVR (現代台語譯本羅馬字版)

← Chapter 19 Jump to: Chapter 21 →

1Hit-ê sî-chūn, Hi-se-ka phòa-pīⁿ, pīⁿ kah teh-beh sí. A-mô͘-su ê kiáⁿ sian-ti Í-sài-a lâi kìⁿ i, kóng, “Siōng Chú án-ni kóng, ‘Lí ê hō͘-sū tio̍h kau-tài hó-sè, in-ūi lí ōe sí, pīⁿ bōe hó.’”

2Hi-se-ka chiū oa̍t-tńg-sin ǹg piah, tùi Siōng Chú kî-tó kóng,

3“Siōng Chú ah, kiû lí tài-liām góa án-chóaⁿ tiong-sêng chīn-sim ho̍k-sāi lí, chòe lí khòaⁿ-chòe hó ê sū.” Hi-se-ka chiū tōa-siaⁿ thî-khàu.

4Í-sài-a chhut--khì, iáu-bē kàu tiong-tiâⁿ, Siōng Chú ê ōe lîm-kàu i, kóng,

5“Lí oa̍t tò-tńg, tùi góa chú-bîn ê ông Hi-se-ka kóng, ‘Siōng Chú — lí ê chó͘-sian Tāi-pi̍t ê Siōng-tè án-ni kóng: Góa ū thiaⁿ-tio̍h lí ê kî-tó, ū khòaⁿ-tio̍h lí ê ba̍k-sái. Khòaⁿ ah, góa beh kā lí i-hó; tē-saⁿ ji̍t, lí ōe chiūⁿ-khì Siōng Chú ê tiān.

6Góa beh hō͘ lí ê hè-siū ke-thiⁿ cha̍p-gō͘ nî. Góa beh kái-kiù lí kap chit-ê siâⁿ thoat-lī A-su̍t -ông ê chhiú; góa ūi-tio̍h ka-kī ê iân-kò͘, mā ūi-tio̍h góa ê po̍k-jîn Tāi-pi̍t ê iân-kò͘, ōe pó-hō͘ chit-ê siâⁿ.’”

7Í-sài-a kóng, “Tio̍h the̍h chi̍t tè bû-hoa-kó io̍h-ko lâi.” In chiū the̍h-lâi kā tah tī lia̍p-á, ông chiū hó--khí-lâi.

8Hi-se-ka mn̄g Í-sài-a kóng, “Siōng Chú beh i-hó góa; tē-saⁿ ji̍t, góa ōe chiūⁿ-khì Siōng Chú ê tiān, ū sím-mi̍h tiāu-thâu?”

9Í-sài-a kóng, “Siōng Chú beh si̍t-hiān I só͘ kóng ê tāi-chì, che chiū sī Siōng Chú hō͘ lí ê tiāu-thâu; lí beh ài ji̍t-kui ê ji̍t-iáⁿ chìn-chêng cha̍p tō͘, á-sī tò-thè cha̍p tō͘?”

10Hi-se-ka ìn kóng, “Ji̍t-iáⁿ chìn-chêng cha̍p tō͘ khah kán-tan; góa ài ji̍t-iáⁿ tò-thè cha̍p tō͘.”

11Sian-ti Í-sài-a kiû-kiò Siōng Chú, I chiū hō͘ A-hap-su só͘ chō ji̍t-kui ê ji̍t-iáⁿ tò-thè cha̍p tō͘.

12Hit-sî, Pa-la-tān ê kiáⁿ Pa-pí-lûn -ông Bí-lô-ta̍t Pa-la-tān thiaⁿ-tio̍h Hi-se-ka phòa-pīⁿ, chiū chhe sù-chiá the̍h phoe kap lé-mi̍h khì thàm-hóng Hi-se-ka.

13Hi-se-ka sūn sù-chiá ê iau-kiû, chiong i ê châi-pó-khò͘ lāi-bīn ê kim, gûn, hiuⁿ-liāu, kùi-khì ê iû, kap i só͘-ū ê kun-khì, í-ki̍p hú-khò͘ lāi ê it-chhè lóng hō͘ in khòaⁿ. I ê ông-kiong kap choân-kok só͘-ū ê mi̍h-kiāⁿ bô chi̍t hāng bô hō͘ in khòaⁿ

14Jiân-āu sian-ti Í-sài-a lâi kìⁿ Hi-se-ka -ông, mn̄g i kóng, “Chiah-ê lâng tùi lí kóng sím-mi̍h? In tùi tó-ūi lâi kìⁿ lí?” Hi-se-ka kóng, “In tùi chi̍t ê chin hn̄g ê kok-ka Pa-pí-lûn lâi thàm góa.”

15Í-sài-a kóng, “In tī lí ê ông-kiong ū khòaⁿ-tio̍h sím-mi̍h?” Hi-se-ka hôe-tap, “In ū khòaⁿ-tio̍h góa ông-kiong lāi ta̍k-hāng mi̍h. Góa só͘-ū ê châi-pó bô chi̍t hāng bô hō͘ in khòaⁿ.”

16Í-sài-a kā Hi-se-ka kóng, “Tio̍h thiaⁿ Siōng Chú ê ōe:

17Ji̍t-chí teh-beh kàu, ông-kiong lāi it-chhè lí ê chó͘-sian chek-chū kàu kin-á-ji̍t ê mi̍h-kiāⁿ, lóng ōe hō͘ lâng poaⁿ-khì Pa-pí-lûn, bô lâu kah pòaⁿ-hāng. Siōng Chú án-ni soan-kò.

18Koh lí chhin-siⁿ ê kiáⁿ-sun, ū-ê ōe hō͘ lâng lia̍h-khì Pa-pí-lûn -ông ê ông-kiong chòe thài-kàm.”

19Hi-se-ka sim-lāi siūⁿ-kóng “Góa chāi-siⁿ ê sî ū thài-pêng an-choân chiū hó”, chiū tùi Í-sài-a kóng, “Lí só͘ thoân-ta̍t Siōng Chú ê ōe chin hó.”

20Hi-se-ka kî-tha ê sū-chek kap sêng-chiū, í-ki̍p i án-chóaⁿ ku̍t-tî khui-kau, ín-chúi ji̍p-siâⁿ, lóng kì-chài tī Iû-tāi Lia̍t-ông-sú.

21Hi-se-ka tńg-khì i ê lia̍t-chó͘ hia, i ê kiáⁿ Má-ná-se sòa-chiap i choh-ông.

← Chapter 19 Jump to: Chapter 21 →