2 Kings 24

Chinese TTVR (現代台語譯本羅馬字版)

← Chapter 23 Jump to: Chapter 25 →

1Iok-ngá-kèng chāi-ūi ê sî, Pa-pí-lûn -ông Nî-pò͘-kah-nî-sat lâi chhim-hoān Iû-tāi. Iok-ngá-kèng ho̍k-sāi i saⁿ nî, āu-lâi soah pōe-poān i.

2Siōng Chú phài Pa-pí-lûn, Sū-lī-a, Mô͘-ap, kap A-bûn ê iû-kek-tūi lâi kong-kek Iok-ngá-kèng; koh chhe in kong-kek Iû-tāi beh kā i húi-bia̍t; tú chiàu Siōng Chú thong-kè I ê po̍k-jîn chèng sian-ti só͘ kóng ê ōe.

3Chit-ê sū lîm-kàu Iû-tāi, si̍t-chāi sī chhut tī Siōng Chú ê bēng-lēng, beh chiong Iû-tāi ê jîn-bîn tùi I ê bīn-chêng kóaⁿ-cháu; che lóng sī in-ūi Má-ná-se só͘ hoān it-chhè ê chōe;

4i thâi bû-ko͘ ê lâng, hō͘ Iâ-lō͘-sat-léng sì-kòe lóng sī in ê huih; chit-ê chōe Siōng Chú m̄-khéng sià-bián.

5Iok-ngá-kèng kî-tha ê sū-chek kap i ê só͘-chòe, lóng kì-chài tī Iû-tāi Lia̍t-ông-sú.

6Iok-ngá-kèng tńg-khì i ê lia̍t-chó͘ hia, i ê kiáⁿ Iok-ngá-kun sòa-chiap i choh-ông.

7Ai-ki̍p -ông bô koh chhut-peng kong-kek gōa-kok, in-ūi i só͘ koán ê tōe, tùi Ai-ki̍p pian-kài kàu Iù-hoat-la-tí-hô, lóng hō͘ Pa-pí-lûn -ông chhiúⁿ--khì.

8Iok-ngá-kun chē-ūi ê sî cha̍p-poeh hè, tī Iâ-lō͘-sat-léng choh-ông saⁿ kò-ge̍h. I ê lāu-bú kiò-chòe Nî-hō͘-si-tha, sī Iâ-lō͘-sat-léng -lâng Í-lī-ná-tan ê cha-bó͘-kiáⁿ.

9Iok-ngá-kun chòe Siōng Chú khòaⁿ-chòe pháiⁿ ê sū, chiàu i lāu-pē ê só͘-chòe khì chòe.

10Hit-sî, Pa-pí-lûn -ông Nî-pò͘-kah-nî-sat ê jîn-sîn chiūⁿ-lâi Iâ-lō͘-sat-léng, ûi-khùn hit-ê siâⁿ.

11Tng i ê jîn-sîn ûi-khùn siâⁿ ê sî, Pa-pí-lûn -ông Nî-pò͘-kah-nî-sat mā chhin-sin chiūⁿ--lâi.

12Iû-tāi -ông Iok-ngá-kun kap i ê lāu-bú, jîn-sîn, chiòng-léng, koaⁿ-oân, lóng chhut-siâⁿ, ǹg Pa-pí-lûn -ông tâu-hâng. Pa-pí-lûn -ông chiong Iok-ngá-kun lia̍h--khí-lâi; hit-sî, sī Pa-pí-lûn -ông chē-ūi tē-poeh nî.

13Pa-pí-lûn -ông koh chiong Siōng Chú tiān-lāi kap ông-kiong ê pó-mi̍h lóng tùi hia the̍h--khì, chiong Í-sek-lia̍t -ông Só͘-lô-bûn só͘ chō Siōng Chú tiān-lāi ê kim-khì lóng pak--lo̍h-lâi; tú chiàu Siōng Chú só͘ kóng ê ōe.

14I chiong Iâ-lō͘-sat-léng ê jîn-bîn, chèng siú-léng, kap só͘-ū kiông-béng ê ióng-sū, kiōng chi̍t-bān lâng, liân só͘-ū ê choh-ba̍k sai-hū kap phah-thih sai-hū mā lóng lia̍h--khì; chí-ū lâu kok-lāi siōng sòng-hiong ê lâng.

15I chiong Iok-ngá-kun kap i ê lāu-bú, pîn-hui, koaⁿ-oân, kok-lāi ê kùi-cho̍k lóng tùi Iâ-lō͘-sat-léng lia̍h kàu Pa-pí-lûn.

16I koh chiong chhit-chheng ê ōe kau-chiàn ê ióng-sū, í-ki̍p chi̍t-chheng ê choh-ba̍k sai-hū kap phah-thih sai-hū, lóng lia̍h-khì Pa-pí-lûn.

17Pa-pí-lûn -ông siat-li̍p Iok-ngá-kun ê a-chek Má-tha-nî sòa-chiap choh-ông, kā Má-tha-nî ōaⁿ-miâ chòe Se-tí-ka.

18Se-tí-ka chē-ūi ê sî jī-cha̍p-it hè, tī Iâ-lō͘-sat-léng choh-ông cha̍p-it nî. I ê lāu-bú kiò-chòe Hap-bō͘-tha, sī Li̍p-ná -lâng Iâ-lī-bí ê cha-bó͘-kiáⁿ.

19I chòe Siōng Chú khòaⁿ-chòe pháiⁿ ê sū, chiàu Iok-ngá-kèng ê só͘-chòe khì chòe.

20Iâ-lō͘-sat-léng kap Iû-tāi hoat-seng chiah-ê sū, sī in-ūi Siōng Chú hoat siū-khì, tùi I ê bīn-chêng kā in kóaⁿ--chhut-khì. Se-tí-ka pōe-poān Pa-pí-lûn -ông.

← Chapter 23 Jump to: Chapter 25 →