2 Kings 2

Chinese TTVR (現代台語譯本羅馬字版)

← Chapter 1 Jump to: Chapter 3 →

1Siōng Chú teh-beh ēng kńg-lê-á-hong chiap Í-lī-a chiūⁿ-thiⁿ ê sî, Í-lī-a kap Í-lī-sa chòe-hé lī-khui Kiat-kah.

2Í-lī-a tùi Í-lī-sa kóng, “Siōng Chú chhe góa khì Pek-te̍k-lī, lí tio̍h lâu tiàm chia.” Í-lī-sa kóng, “Góa kí éng-oa̍h ê Siōng Chú kap lí ê sìⁿ-miā chiù-chōa, góa it-tēng bô beh lī-khui lí.” In nn̄g ê lâng chiū chòe-hé lo̍h-khì Pek-te̍k-lī.

3Pek-te̍k-lī hiah-ê sian-ti ê ha̍k-seng chhut-lâi kìⁿ Í-lī-sa, tùi i kóng, “Siōng Chú kin-á-ji̍t beh chiap lí ê lāu-su lī-khui lí khì, lí chai--bô?” I kóng, “Góa chai, chhiáⁿ lín tiām-tiām.”

4Í-lī-a kā i kóng, “ Í-lī-sa, Siōng Chú chhe góa khì Iâ-lī-ko, lí tio̍h lâu tiàm chia.” Í-lī-sa kóng, “Góa kí éng-oa̍h ê Siōng Chú kap lí ê sìⁿ-miā chiù-chōa, góa it-tēng bô beh lī-khui lí.” In chiū kàu Iâ-lī-ko.

5Iâ-lī-ko hiah-ê sian-ti ê ha̍k-seng lâi Í-lī-sa hia, tùi i kóng, “Siōng Chú kin-á-ji̍t beh chiap lí ê lāu-su lī-khui lí, lí chai--bô?” I kóng, “Góa chai, chhiáⁿ lín tiām-tiām.”

6Í-lī-a tùi Í-lī-sa kóng, “Siōng Chú chhe góa khì Iok-tàn-hô, lí tio̍h lâu tiàm chia.” Í-lī-sa kóng, “Góa kí éng-oa̍h ê Siōng Chú kap lí ê sìⁿ-miā chiù-chōa, góa it-tēng bô beh lī-khui lí.” In nn̄g ê lâng chiū chòe-hé khì.

7Ū gō͘-cha̍p ê sian-ti ê ha̍k-seng tè in khì, hn̄g-hn̄g khiā tī in ê tùi-bīn; in nn̄g lâng khiā tī Iok-tàn hô-piⁿ.

8Í-lī-a chiong i ê gōa-saⁿ kńg--khí-lâi, phah hô-chúi, chúi chiū hun siang-pêng; in nn̄g lâng kiâⁿ ta-tōe kè--khì.

9Kè-khì liáu, Í-lī-a tùi Í-lī-sa kóng, “Góa siū chiap lī-khui lí í-chêng, lí ài góa ūi-tio̍h lí chòe sím-mi̍h? Lí tio̍h kā góa kóng.” Í-lī-sa kóng, “Kiû lí chiong kám-tōng lí ê sîn ka-pē hō͘ góa.”

10Í-lī-a kóng, “Lí só͘ kiû--ê chin khùn-lân. M̄-kú, góa siū chiap lī-khui lí ê sî, lí nā khòaⁿ-tio̍h góa, chiū ōe tit--tio̍h; nā bô, chiū tit bōe tio̍h.”

11In ná kiâⁿ ná kóng ê sî, hut-jiân ū hé-chiàn-chhia hé-bé, chiong in nn̄g lâng keh-khui; Í-lī-a chiū chē kńg-lê-á-hong siū chiap chiūⁿ-thiⁿ.

12Í-lī-sa khòaⁿ--tio̍h, chiū hoah kóng, “Su-hū ah, su-hū ah! Í-sek-lia̍t ê chiàn-chhia kap bé-peng ah!” Āu-lâi Í-lī-sa bô koh khòaⁿ-tio̍h Í-lī-a; chiū chiong ka-kī ê saⁿ thiah chòe nn̄g pêng.

13I khioh Í-lī-a ka-la̍uh--lo̍h-lâi ê gōa-saⁿ, tò-tńg-khì khiā tī Iok-tàn hô-piⁿ,

14ēng hit-niá gōa-saⁿ phah hô-chúi, kóng, “Siōng Chú — Í-lī-a ê Siōng-tè tī tó-ūi?” Phah chúi liáu-āu, chúi chiū pun-chòe nn̄g pêng, Í-lī-sa chiū kè--khì.

15Í-lī-sa tùi-bīn hiah-ê Iâ-lī-ko sian-ti ê ha̍k-seng khòaⁿ--tio̍h, chiū kóng, “Kám-tōng Í-lī-a ê sîn lîm-chāi tī Í-lī-sa lah!” In chiū lâi gêng-chiap i, phak-lo̍h tī i ê bīn-chêng.

16In tùi Í-lī-sa kóng, “Lí ê po̍k-jîn chia ū gō͘-cha̍p ê ióng-sū; chhiáⁿ lí ún-chún in khì chhē lí ê lāu-su; khó-lêng Siōng Chú ê sîn tòa i khì, kā i hiat tī bó͘ chi̍t ê soaⁿ, á-sī bó͘ chi̍t ê soaⁿ-kok.” I kóng, “M̄-bián chhe lâng khì.”

17In it-ti̍t kā Í-lī-sa ko͘-chiâⁿ, Í-lī-sa hō͘ in pek kah chin ûi-lân, chiū kóng, “Lín thang chhe hiah-ê ióng-sū khì.” In chiū chhe gō͘-cha̍p lâng khì, chhē saⁿ ji̍t, chhē lóng bô.

18Í-lī-sa tī Iâ-lī-ko thèng-hāu; in tò--lâi liáu-āu, i kā in kóng, “Góa kiám bô kā lín kóng, m̄-bián khì chhē?”

19Iâ-lī-ko -siâⁿ ê lâng tùi Í-lī-sa kóng, “Sian-siⁿ, chiàu lí só͘ chai chit-ê siâⁿ ê tōe-sè chin hó; m̄-kú chúi-chit chin bái, thó͘-tōe bōe seng-sán.”

20Í-lī-sa kóng, “Lín ēng chi̍t tè sin ê óaⁿ, tóe iâm the̍h-lâi hō͘ góa.” In chiū the̍h-lâi hō͘ i.

21I khì kàu chúi-chôaⁿ hia, chiong iâm tò tī chúi--ni̍h, kóng, “Siōng Chú án-ni kóng, ‘Góa i-hó chit-ê chúi; chit-ê chúi bōe koh hō͘ lâng sí, mā bōe koh hō͘ tōe bô seng-sán.’”

22Hit-ê chúi chiū pìⁿ-chòe hó-chúi, kàu kin-á-ji̍t; tú chiàu Í-lī-sa só͘ kóng ê ōe.

23Í-lī-sa tùi hia chiūⁿ-khì Pek-te̍k-lī, tī lō͘--ni̍h teh kiâⁿ ê sî, ū siàu-liân-lâng tùi siâⁿ-lāi chhut--lâi, kā i thí-chhiò, kóng, “Thuh-thâu--ê, siám-cháu! Thuh-thâu--ê, siám-cháu!”

24I oa̍t-thâu kā in khòaⁿ, hōng Siōng Chú ê miâ chiù-chó͘ in, chiū ū nn̄g chiah hîm-bú tùi chhiū-nâ chhut--lâi, thiah-li̍h in tiong-kan sì-cha̍p-jī ê siàu-liân-lâng.

25I tùi hia chiūⁿ Ka-bi̍t-soaⁿ; koh tùi hia tò-khì Sat-má-lī-a.

← Chapter 1 Jump to: Chapter 3 →