2 Kings 25

Chinese TTVR (現代台語譯本羅馬字版)

← Chapter 24 Jump to:

1Se-tí-ka thóng-tī tē-káu nî, cha̍p-ge̍h chhoe-cha̍p, Pa-pí-lûn -ông Nî-pò͘-kah-nî-sat chhōa i ê tāi-kun lâi kong-kek Iâ-lō͘-sat-léng, tī siâⁿ ê tùi-bīn chat-iâⁿ, koh tī sì-ûi choh thô͘-tui kong-siâⁿ.

2Siâⁿ siū ûi-khùn, it-ti̍t kàu Se-tí-ka -ông tē-cha̍p-it nî.

3Sì-ge̍h chhoe-káu, siâⁿ-lāi ki-hng chin giâm-tiōng, chū-bîn lóng bô mi̍h thang chia̍h,

4siâⁿ siū kong-phòa; só͘-ū ê peng-sū thàu-mî tùi ông-kiong hoe-hn̂g hù-kūn, nn̄g ê siâⁿ-chhiûⁿ tiong-kan ê mn̂g hit-tiâu lō͘ tô-cháu. Pa-pí-lûn kun-tūi iáu tī sì-ûi kong-siâⁿ ê sî, ông ǹg A-la-pa ê hong-hiòng tô-cháu.

5Pa-pí-lûn ê kun-peng tui-jip Se-tí-ka -ông, tī Iâ-lī-ko ê pêng-goân jip-tio̍h i; i ê choân-kun lóng khì-sak i sì-sòaⁿ.

6Pa-pí-lûn ê kun-peng lia̍h-tio̍h Se-tí-ka, kā i lia̍h-khì tī Lī-pí-la ê Pa-pí-lûn -ông hia, tī hia siū sím-phòaⁿ.

7In thâi-sí Se-tí-ka ê kiáⁿ, hō͘ i chhin-ba̍k khòaⁿ--tio̍h, koh ó͘ i nn̄g lúi ba̍k-chiu, ēng tâng-liān kā i liān--teh, tòa-khì Pa-pí-lûn.

8Pa-pí-lûn -ông Nî-pò͘-kah-nî-sat tē-cha̍p-káu nî, gō͘-ge̍h chhoe-chhit, Pa-pí-lûn -ông ê jîn-sîn sī-ōe-tiúⁿ Nî-pò͘-sat-la-tàn chìn-ji̍p Iâ-lō͘-sat-léng,

9ēng hé sio Siōng Chú ê sèng-tiān, ông-kiong, kap Iâ-lō͘-sat-léng só͘-ū ê chhù, í-ki̍p só͘-ū kùi-cho̍k ê chhù.

10Só͘-ū tè sī-ōe-tiúⁿ ê Pa-pí-lûn kun-peng, chiong Iâ-lō͘-sat-léng sì-ûi ê siâⁿ-chhiûⁿ lóng thiah-húi.

11Hit-sî, sī-ōe-tiúⁿ Nî-pò͘-sat-la-tàn chiong lâu tī siâⁿ-lāi só͘ chhun ê jîn-bîn, kap tâu-hâng Pa-pí-lûn -ông ê lâng, í-ki̍p só͘ chhun ê lâng lóng lia̍h--khì.

12M̄-kú sī-ōe-tiúⁿ ū lâu chi̍t-kóa siōng sòng-hiong--ê, hō͘ in tī phû-tô-hn̂g kap chhân-hn̂g chèng-choh.

13Pa-pí-lûn -lâng chiong Siōng Chú tiān-lāi ê tâng-thiāu, phûn-chō, kap tâng-hái lóng phah-phòa, chiong hiah-ê tâng ūn-khì Pa-pí-lûn.

14In mā chiong tiáⁿ, thuh-á, teng-sim ê chián-to, khǹg hiuⁿ ê phiat-á, kap sèng-tiān só͘-ū tâng ê khì-khū lóng poaⁿ--khì;

15khǹg hé-thòaⁿ ê phûn, pôaⁿ, só͘-ū kim-khì ê kim, gûn-khì ê gûn, sī-ōe-tiúⁿ lóng the̍h--khì.

16Koh chiong Só͘-lô-bûn -ông ūi Siōng Chú ê tiān só͘ chō nn̄g ki thiāu, chi̍t ê tâng-hái, kap hiah-ê phûn-chō tòa--khì; chiah-ê khì-khū ê tâng chōe kah bōe-chhìn--tit.

17Chit nn̄g ki thiāu siâng-khoán, múi chi̍t ki koân poeh kong-chhioh, téng-bīn ū tâng ê thiāu-táu; thiāu-táu koân chi̍t kong-chhioh saⁿ-cha̍p kong-hun; thiāu-táu ê chiu-ûi ū tâng chòe ê bāng-á kap sia̍h-liû.

18Sī-ōe-tiúⁿ Nî-pò͘-sat-la-tàn lia̍h tōa-chè-si Se-lâi-ngá, hù-chè-si Se-hoan-ngá, kap saⁿ ê sèng-tiān mn̂g-kháu ê siú-ōe;

19koh tùi siâⁿ-lāi lia̍h chi̍t ê koán-peng ê koaⁿ-oân, ông ê gō͘ ê chhin-sìn, kap teng-bō͘ peng-sū ê hù-chí-hui-koaⁿ, í-ki̍p tī siâⁿ-lāi tú--tio̍h ê la̍k-cha̍p ê kok-bîn.

20Sī-ōe-tiúⁿ chiong chiah-ê lâng tòa-khì tī Lī-pí-la ê Pa-pí-lûn -ông hia.

21Pa-pí-lûn -ông tī Hap-má tōe-khu ê Lī-pí-la lóng kā in thâi-sí. Án-ni, Iû-tāi ê jîn-bîn siū-lia̍h lī-khui in pún-tōe.

22Pa-pí-lûn -ông Nî-pò͘-kah-nî-sat siat-li̍p Sa-hoan ê sun, A-hi-kam ê kiáⁿ Ki-tāi-lī chòe chóng-tok, tī-lí bô hō͘ Nî-pò͘-kah-nî-sat -ông lia̍h--khì, lâu tī Iû-tāi só͘ chhun ê jîn-bîn.

23Chèng kun-koaⁿ kap sio̍k in ê peng-sū, thiaⁿ-kìⁿ Pa-pí-lûn -ông siat-li̍p Ki-tāi-lī koán-hat in, Nî-thàm-ngá ê kiáⁿ Í-si̍t-má-lī, Ka-lī-a ê kiáⁿ Iok-hap-lân, Nî-tô-hoat -lâng Tan-hō͘-be̍k ê kiáⁿ Se-lâi-ngá, Má-ka -lâng ê kiáⁿ Ngá-sat-nî-a, kap sio̍k in ê peng-sū, chiū lóng lâi Bí-su-pa kìⁿ Ki-tāi-lī.

24Ki-tāi-lī tùi in kap sio̍k in ê peng-sū chiù-chōa, kóng, “Lín m̄-bián kiaⁿ Pa-pí-lûn ê koaⁿ-oân; lín thang an-sim tòa tī chit-tè thó͘-tōe, ho̍k-sāi Pa-pí-lûn -ông, lín chiū ōe pêng-an bô-sū.”

25Hit-nî ê chhit--ge̍h, ông-chhin Í-lī-sa-má ê sun, Nî-thàm-ngá ê kiáⁿ Í-si̍t-má-lī, chhōa cha̍p ê lâng lâi Bí-su-pa, thâi-sí Ki-tāi-lī, koh thâi-sí kap i chòe-hé ê Iû-tāi -lâng kap Pa-pí-lûn -lâng.

26Tùi án-ni, só͘-ū ê lâng bô-lūn tōa-sòe, kap hiah-ê kun-koaⁿ, in-ūi kiaⁿ Pa-pí-lûn -lâng chiū lóng tô-cháu khì Ai-ki̍p.

27Pa-pí-lûn -ông Í-bī Bí-lô-ta̍t tī i chē-ūi hit-nî, chiū-sī Iû-tāi -ông Iok-ngá-kun siū-lia̍h liáu-āu tē-saⁿ-cha̍p-chhit nî, cha̍p-jī-ge̍h jī-cha̍p-chhit ji̍t, te̍k-sià Iû-tāi -ông Iok-ngá-kun, pàng i chhut-kaⁿ,

28koh ēng hó-ōe an-ùi i, hō͘ i pí siū-lia̍h tī Pa-pí-lûn kî-tha kok-ka ê ông ū khah-koân ê tōe-ūi.

29Iok-ngá-kun thǹg-khì kaⁿ-lāi só͘ chhēng ê saⁿ, chi̍t-sì-lâng kap Pa-pí-lûn -ông chòe-hé chia̍h.

30Iok-ngá-kun oa̍h--teh ê sî, Pa-pí-lûn -ông siúⁿ-sù i só͘ su-iàu ê seng-oa̍h hùi-iōng.

← Chapter 24 Jump to: