2 Kings 17

Chinese TTVR (現代台語譯本羅馬字版)

← Chapter 16 Jump to: Chapter 18 →

1Iû-tāi -ông A-hap-su tē-cha̍p-jī nî, Í-la ê kiáⁿ Hô-sè-a tī Sat-má-lī-a khai-sí choh-ông, thóng-tī Í-sek-lia̍t káu nî.

2I chòe Siōng Chú khòaⁿ-chòe pháiⁿ ê sū, m̄-kú bô chhin-chhiūⁿ í-chêng Í-sek-lia̍t chiah-ê ông.

3A-su̍t -ông Sat-bān-í-sek chiūⁿ-lâi kong-kek. Hô-sè-a tâu-hâng, kā i chìn-kòng.

4Āu-lâi, Hô-sè-a phài sù-chiá khì kìⁿ Ai-ki̍p -ông So, chhéng-kiû oān-chō͘, bô chhin-chhiūⁿ kè-khì múi-nî chìn-kòng A-su̍t -ông. A-su̍t -ông chai Hô-sè-a pōe-poān, chiū kā i lia̍h--khí-lâi, koaiⁿ tī kaⁿ--ni̍h.

5A-su̍t -ông chiūⁿ-lâi kong-táⁿ Í-sek-lia̍t, ûi-khùn Sat-má-lī-a saⁿ nî kú.

6Hô-sè-a tē-káu nî, A-su̍t -ông kong-chhú Sat-má-lī-a, koh chiong Í-sek-lia̍t -lâng lia̍h-khì A-su̍t, hō͘ in tòa tī Hap-la̍h, Ko-sàn tōe-khu ê Hap-phok hô-piⁿ, í-ki̍p Bí-tí-a -lâng ê siâⁿ.

7Che sī in-ūi Í-sek-lia̍t -lâng tek-chōe Siōng Chú — in ê Siōng-tè; I ū chhōa in chhut Ai-ki̍p -tōe, thoat-lī Ai-ki̍p -ông Hoat-ló ê chhiú, in khiok khì pài pa̍t-ê sîn-bêng,

8khì tè hō͘ Siōng Chú tī Í-sek-lia̍t -lâng bīn-chêng kóaⁿ-chhut ê lia̍t-kok kap Í-sek-lia̍t lia̍t-ông só͘ siat ê hong-sio̍k kui-lē.

9Í-sek-lia̍t -lâng àm-tiong chòe m̄-tio̍h ê sū, tek-chōe Siōng Chú — in ê Siōng-tè, tī in só͘-ū khiā-khí ê só͘-chāi, tùi kan-ta ū siú-bōng-tâi ê chng-siā kàu ū pó-lúi ê siâⁿ, khí soaⁿ-thâu-tôaⁿ.

10In tī ta̍k-ê koân ê soaⁿ-lûn-á, ta̍k-châng chhiⁿ-chhùi ê chhiū ē-bīn, chō chio̍h-thiāu-siōng kap A-sià-la lú-sîn;

11koh tī ta̍k-ê soaⁿ-thâu-tôaⁿ sio-hiuⁿ, o̍h hiah-ê hō͘ Siōng Chú tī in bīn-chêng kóaⁿ-chhut ê lia̍t-kok ê só͘-chòe, chòe siâ-ok ê sū kek Siōng Chú siū-khì;

12koh pài Siōng Chú kìm-chí in pài ê ngó͘-siōng.

13Siōng Chú bat chhe-khián chèng sian-ti kap sian-kiàn kéng-kài Í-sek-lia̍t kap Iû-tāi, kóng, “Tio̍h lī-khui lín ê pháiⁿ hêng-ûi, chip-siú góa ê kài-bēng kap kui-lē; tio̍h chun-siú góa choân-pō͘ ê lu̍t-hoat, chiū-sī góa bēng-lēng lín ê lia̍t-chó͘, kap thong-kè góa ê po̍k-jîn chèng sian-ti thoân hō͘ lín--ê.”

14M̄-kú in m̄ thiaⁿ-thàn, chhin-chhiūⁿ in ê lia̍t-chó͘ ngī-sim kò͘-chip, m̄-khéng hóe-kái, m̄ sìn-ho̍k Siōng Chú — in ê Siōng-tè.

15In khì-sak Siōng Chú ê kui-lē, í-ki̍p I kap in ê lia̍t-chó͘ só͘ li̍p ê iok, m̄ thiaⁿ I ê kéng-kài, khì pài hu-ké ê sîn-bêng, tì-kàu ka-kī chiâⁿ-chòe khang-hu. Sui-jiân Siōng Chú bat bēng-lēng in m̄-thang o̍h chiu-ûi lia̍t-kok ê só͘-chòe, in iû-goân khì o̍h in.

16In khì-sak Siōng Chú — in ê Siōng-tè só͘-ū ê kài-bēng, ūi ka-kī chù-chō nn̄g chiah gû-á ê siōng, chòe A-sià-la lú-sîn ê thiāu-siōng, kèng-pài thiⁿ-téng ê bān-siōng, ho̍k-sāi Pa-le̍k.

17In sio in ê kiáⁿ cha-bó͘-kiáⁿ hiàn-chòe chè, koh thiu-chhiam pok-kòa, kiâⁿ siâ-su̍t, chòe Siōng Chú khòaⁿ-chòe pháiⁿ ê sū, lâi chhut-bōe ka-kī, kek Siōng Chú siū-khì.

18Só͘-í Siōng Chú tùi Í-sek-lia̍t -lâng hoat tōa siū-khì, tùi I ê bīn-chêng kā in kóaⁿ--chhut-khì; chí-ū chhun Iû-tāi chi̍t ê chi-cho̍k.

19Iû-tāi mā bô chun-thàn Siōng Chú — in ê Siōng-tè ê bēng-lēng, tian-tò o̍h Í-sek-lia̍t ê hong-sio̍k kui-lē.

20Siōng Chú khì-sak Í-sek-lia̍t só͘-ū ê hō͘-tāi, kā in khó͘-chhó͘, chiong in kau hō͘ chhiúⁿ-toa̍t in ê lâng, chòe-āu tùi I ê bīn-chêng kā in kóaⁿ--chhut-khì.

21Í-sek-lia̍t tùi Tāi-pi̍t -ke hun-lia̍t chhut--khì, chiū siat-li̍p Nî-pat ê kiáⁿ Iâ-lô-pho-an choh-ông. Iâ-lô-pho-an ín-iú Í-sek-lia̍t, hō͘ in bô sūn-thàn Siōng Chú, hām-lo̍h tōa-chōe.

22Í-sek-lia̍t -lâng kè-sio̍k hoān Iâ-lô-pho-an lóng-chóng ê chōe.

23Chòe-āu, Siōng Chú kā Í-sek-lia̍t tùi I ê bīn-chêng kóaⁿ--chhut-khì, tú-tú chiàu I thong-kè I ê po̍k-jîn chèng sian-ti só͘ kóng--ê. Án-ni, Í-sek-lia̍t siū-lia̍h lī-khui in ê ka-hiong khì kàu A-su̍t, ti̍t-kàu kin-á-ji̍t.

24A-su̍t -ông tùi Pa-pí-lûn, Kó͘-tha, A-óa, Hap-má, kap Se-hoat-óa-im, chhian-sóa lâng lâi tòa tī Sat-má-lī-a ta̍k-ê siâⁿ, tāi-thòe Í-sek-lia̍t -lâng; in chiū chiàm-léng Sat-má-lī-a, tòa tī hiah-ê siâⁿ.

25In tú-á tòa tī hia ê sî, bô pài Siōng Chú, só͘-í Siōng Chú chiū hō͘ sai ji̍p-khì in tiong-kan, kā-sí chi̍t-kóa lâng.

26Ū lâng tùi A-su̍t -ông kóng, “Lí chhian-sóa khì tòa tī Sat-má-lī-a hiah-ê siâⁿ ê ta̍k-cho̍k ê lâng, m̄ chai hit só͘-chāi ê Siōng-tè ê kui-lē, só͘-í I hō͘ sai ji̍p-khì in tiong-kan, kā-sí in, in-ūi in m̄ chai hit só͘-chāi ê Siōng-tè ê kui-lē.”

27A-su̍t -ông chiū bēng-lēng kóng, “Tio̍h hō͘ tùi hia lia̍h--lâi ê chi̍t ê chè-si tò--khì, hō͘ i tòa tī hia, ēng hit só͘-chāi ê Siōng-tè ê kui-lē kàu-tō in.”

28Án-ni, chiū ū chi̍t ê tùi Sat-má-lī-a hō͘ lâng lia̍h--khì ê chè-si tò--lâi, tòa tī Pek-te̍k-lī, kà in tio̍h án-chóaⁿ kèng-ùi Siōng Chú.

29M̄-kú ta̍k-cho̍k ê lâng tī in khiā-khí ê siâⁿ chō in ka-hiong ê sîn-bêng, an-tì tī Sat-má-lī-a -lâng í-chêng chō ê soaⁿ-thâu-tôaⁿ.

30Pa-pí-lûn -lâng chō So͘-kat Pí-la̍p ê siōng, Kó͘-tha -lâng chō Le̍k-kah ê siōng, Hap-má -lâng chō A-sī-má ê siōng,

31A-óa -lâng chō Le̍k-hap kap Tha-ní-tha ê siōng, Se-hoat-óa-im -lâng sio kiáⁿ-jî hiàn hō͘ Se-hoat-óa-im ê sîn-bêng A-tek-bí-le̍k kap A-ná-bí-le̍k.

32In pài Siōng Chú, m̄-kú mā tùi in tiong-kan siat-li̍p lâng chòe soaⁿ-thâu-tôaⁿ ê chè-si, thòe in tī soaⁿ-thâu-tôaⁿ hiàn-chè.

33In pài Siōng Chú, koh chiàu in ta̍k-kok ê hong-sio̍k kui-lē ho̍k-sāi ka-kī ê sîn-bêng.

34Kàu kin-á-ji̍t, in iû-goân chiàu í-chêng ê hong-sio̍k teh chòe, bô kèng-ùi Siōng Chú, bô chun-thàn Siōng Chú hoan-hù Ngá-kok hō͘-tāi ê kui-lē, bēng-lēng, lu̍t-hoat, kap kài-bēng; Siōng Chú ū kā Ngá-kok hō-miâ kiò-chòe Í-sek-lia̍t.

35Siōng Chú bat kap in li̍p-iok, hoan-hù in, kóng, “M̄-thang pài pa̍t-ê sîn-bêng; m̄-thang kūi-pài in, m̄-thang ho̍k-sāi in, mā m̄-thang kā in hiàn-chè.

36Chí-ū hit-ūi chhun-chhut tōa koân-lêng ê chhiú chhōa lín chhut Ai-ki̍p ê Siōng Chú, lín tio̍h kèng-ùi I, kūi-pài I, tùi I hiàn-chè.

37Góa siá hō͘ lín ê kui-lē, bēng-lēng, lu̍t-hoat, kap kài-bēng, lín eng-kai éng-oán chip-siú sūn-thàn; m̄-thang pài pa̍t-ê sîn-bêng.

38Góa kap lín li̍p ê iok, lín m̄-thang bōe-kì--tit, mā m̄-thang pài pa̍t-ê sîn-bêng.

39Chí-ū tio̍h kèng-ùi Siōng Chú — lín ê Siōng-tè, I chiū ōe kiù lín thoat-lī lín it-chhè tùi-te̍k ê chhiú.”

40M̄-kú in m̄ thiaⁿ-thàn, iû-goân chiàu í-chêng ê hong-sio̍k teh chòe.

41Án-ni, chiah-ê tùi lia̍t-kok chhian-sóa--lâi ê lâng pài Siōng Chú, koh ho̍k-sāi in ê ngó͘-siōng; in ê kiáⁿ-kiáⁿ-sun-sun kàu kin-á-ji̍t mā lóng o̍h in ê chó͘-sian án-ni teh chòe.

← Chapter 16 Jump to: Chapter 18 →