2 Kings 4 — Chinese TTVR (現代台語譯本羅馬字版)

1Ū chi̍t ê sian-ti ê ha̍k-seng ê bó͘, tùi Í-lī-sa ai-kiû kóng, “Lí ê po̍k-jîn, góa ê tiōng-hu í-keng sí; lí chai i sī kèng-ùi Siōng Chú ê lâng. Taⁿ chè-chú lâi beh lia̍h góa nn̄g ê kiáⁿ khì chòe lô͘-lē.”

2Í-lī-sa mn̄g i kóng, “Lí ài góa kā lí chòe sím-mi̍h? Lí kā góa kóng, lí chhù-lāi ū sím-mi̍h?” I kóng, “Lí ê lú-pī chhù-lāi chhun chi̍t pân iû, í-gōa ta̍k-hāng lóng bô.”

3Í-lī-sa kóng, “Lí khì kā chhù-piⁿ chioh khang ê khì-khū, jú-chōe jú-hó;

4jiân-āu ji̍p-khì chhù-lāi, koaiⁿ-mn̂g, kap lí hiah-ê kiáⁿ tiàm lāi-bīn, thîn-iû tī só͘-ū ê khì-khū; thîn-móa--ê hē chi̍t pêng.”

5Hū-jîn-lâng tńg--khì, koaiⁿ-mn̂g, kap i hiah-ê kiáⁿ tiàm lāi-bīn; kiáⁿ tòa khì-khū lâi hō͘ i, i chiū thîn-iû.

6Hiah-ê khì-khū lóng thîn-móa, i kā i ê kiáⁿ kóng, “Koh the̍h khì-khū lâi hō͘ góa.” Kiáⁿ kóng, “Í-keng bô khì-khū lah.” Iû chiū bô koh lâu--chhut-lâi.

7Hū-jîn-lâng khì kā Siōng-tè tiōng-iōng ê lâng pò-kò, i chiū tùi hū-jîn-lâng kóng, “Lí khì bōe iû lâi hêng-chè; só͘ chhun--ê, lí kap lí ê kiáⁿ thang tō͘-oa̍h.”

8Ū chi̍t ji̍t Í-lī-sa lâi kàu Su-liām, tī hia ū chi̍t ê hó-gia̍h ê hū-jîn-lâng, kiông-kiông lâu i chia̍h-pn̄g; āu-lâi Í-lī-sa ta̍k-piàn tùi hia keng-kè, chiū ji̍p-khì hia chia̍h-pn̄g.

9Hū-jîn-lâng kā i ê tiōng-hu kóng, “Siông-siông tùi lán chia keng-kè hit-ê lâng, góa khòaⁿ i sī sèng-chiá, sī Siōng-tè tiōng-iōng ê lâng.

10Lán lâi tī chhù-téng khí chi̍t keng sòe keng pâng-keng, lāi-bīn hē bîn-chhn̂g, toh-á, í-á, teng-tâi, hō͘ i lâi lán chia ê sî, thang ji̍p-khì hioh-khùn.”

11Ū chi̍t ji̍t Í-lī-sa lâi kàu hia, chiū ji̍p-khì hit-keng pâng-keng hioh-khùn.

12Í-lī-sa kā i ê po̍k-jîn Ki-hap-se kóng, “Lí chhiáⁿ chit-ê Su-liām ê hū-jîn-lâng lâi.” I khì chhiáⁿ i lâi, hū-jîn-lâng chiū lâi.

13Í-lī-sa kā i ê po̍k-jîn kóng, “Lí kā i kóng, ‘Lí ūi-tio̍h goán hùi chin chōe sim-su, taⁿ góa tio̍h ūi-tio̍h lí chòe sím-mi̍h? Lí ài góa thòe lí kā ông á-sī goân-sòe chhéng-kiû sím-mi̍h?’” Hū-jîn-lâng ìn kóng, “Góa kap góa ê tông-pau chòe-hé khiā-khí, bô khiàm sím-mi̍h.”

14Í-lī-sa mn̄g Ki-hap-se, kóng, “Án-ni, góa ōe-tàng ūi-tio̍h i chòe sím-mi̍h?” Ki-hap-se kóng, “I bô kiáⁿ, i ê tiōng-hu mā lāu ah.”

15Í-lī-sa koh kóng, “Chhiáⁿ i lâi.” Ki-hap-se chiū chhiáⁿ i lâi. Hū-jîn-lâng lâi khiā tī mn̂g-kháu.

16Í-lī-sa kóng, “Mê-nî chit-ê sî, lí ōe phō chi̍t ê ta-po͘-kiáⁿ.” Hū-jîn-lâng kóng, “Góa ê chú, Siōng-tè tiōng-iōng ê lâng, mài kā góa phiàn.”

17Hū-jîn-lâng kó-jiân hoâi-īn, kàu keh-nî chit-ê sî siⁿ chi̍t ê ta-po͘-eⁿ, tú chiàu Í-lī-sa só͘ kóng ê ōe.

18Gín-á tōa-hàn; ū chi̍t ji̍t chhut-khì kàu i ê lāu-pē kap siu-koah ê lâng hia.

19I tùi lāu-pē kóng, “Góa ê thâu-khak, góa ê thâu-khak!” I ê lāu-pē kā po̍k-jîn kóng, “Kín kā phō-khì in lāu-bú hia.”

20Po̍k-jîn chiū kā phō-khì i ê lāu-bú hia; gín-á chē tī lāu-bú ê kha-thâu-u, kàu tiong-tàu chiū sí.

21Lāu-bú phō i ê kiáⁿ peh-khí-khì lâu-téng, chiong i ê kiáⁿ hē tī Siōng-tè tiōng-iōng ê lâng ê bîn-chhn̂g, koaiⁿ-mn̂g chhut--lâi.

22I kiò i ê tiōng-hu lâi, kā i kóng, “Chhiáⁿ chhe chi̍t ê po̍k-jîn khan chi̍t chiah lû lâi góa chia; góa beh kóaⁿ-kín khì chhē Siōng-tè tiōng-iōng ê lâng, chiah tò--lâi.”

23Tiōng-hu kóng, “Kin-á-ji̍t m̄-sī chhoe-it, mā m̄-sī An-hioh-ji̍t, sī-án-chóaⁿ lí beh khì i hia?” Hū-jîn-lâng kóng, “Bô sím-mi̍h tāi-chì!”

24Lû chún-pī hó-sè, i chiū kā po̍k-jîn kóng, “Kiâⁿ, kóaⁿ-kín lâi-khì! Góa nā bô kā lí kóng, m̄-thang bān--lo̍h-lâi.”

25Hū-jîn-lâng chiū khì Ka-bi̍t-soaⁿ, Siōng-tè tiōng-iōng ê lâng hia. Siōng-tè tiōng-iōng ê lâng hn̄g-hn̄g khòaⁿ-tio̍h hū-jîn-lâng, kā i ê po̍k-jîn Ki-hap-se kóng, “Lí khòaⁿ, Su-liām ê hū-jîn-lâng lâi ah.

26Lí cháu-khì gêng-chiap i, mn̄g i kóng, ‘Lí pêng-an--bô? Lí ê tiōng-hu pêng-an--bô? Gín-á pêng-an--bô?’” Hū-jîn-lâng ìn kóng, “Lóng pêng-an.”

27Hū-jîn-lâng chiūⁿ-soaⁿ, khì kàu Siōng-tè tiōng-iōng ê lâng hia, kā Í-lī-sa ê kha mo͘h--teh. Ki-hap-se chìn-chêng beh kā i chhia-khui; Siōng-tè tiōng-iōng ê lâng kóng, “Chhut-chāi i, in-ūi i sim-lāi thòng-khó͘; Siōng Chú tùi góa ún-môa chit-ê tāi-chì, bô kā góa kóng.”

28Hū-jîn-lâng tùi Í-lī-sa kóng, “Góa kiám bat tùi góa ê chú kiû kiáⁿ? Góa kiám bô kóng mài kā góa phiàn?”

29Í-lī-sa kā Ki-hap-se kóng, “Lí tio̍h chún-pī thang chhut-hoat, gia̍h góa ê koáiⁿ-á, kóaⁿ-kín khì. Nā tú-tio̍h lâng, m̄-thang kā in chhéng-an; lâng nā kā lí chhéng-an, mā m̄-thang ìn. Tio̍h chiong góa ê koáiⁿ-á hē tī gín-á ê bīn.”

30Gín-á ê lāu-bú kóng, “Góa kí éng-oa̍h ê Siōng Chú kap lí ê sìⁿ-miā chiù-chōa, góa it-tēng bô beh lī-khui lí.” Í-lī-sa chiū khí--lâi, tè i khì.

31Ki-hap-se tāi-seng kàu-ūi, chiong koáiⁿ-á hē tī gín-á ê bīn; m̄-kú gín-á bô chhut-siaⁿ, bô hoán-èng. Ki-hap-se tò-tńg--khì, tú-tio̍h Í-lī-sa, kā i kóng, “Gín-á bô chhíⁿ.”

32Í-lī-sa kàu-ūi, ji̍p-khì chhù-lāi, khòaⁿ-tio̍h gín-á í-keng sí, hē tī i ê bîn-chhn̂g.

33I ji̍p--khì, chiū koaiⁿ-mn̂g, chí-ū in nn̄g ê tī lāi-bīn; i chiū kî-tó Siōng Chú.

34I peh-khí-khì bîn-chhn̂g phak tī gín-á ê seng-khu, chhùi tùi chhùi, ba̍k-chiu tùi ba̍k-chiu, chhiú tùi chhiú. I kui seng-khu àⁿ tī gín-á ê téng-bīn ê sî, gín-á chiām-chiām hôe-ho̍k thé-un.

35I lo̍h--lâi, tī chhù-lāi kiâⁿ chi̍t lìn, koh peh--khí-khì, kui seng-khu àⁿ tī gín-á ê téng-bīn. Gín-á phah-ka-chhiùⁿ chhit piàn, ba̍k-chiu chiū thí-khui.

36Í-lī-sa kiò Ki-hap-se, kóng, “Lí kiò chit-ê Su-liām ê hū-jîn-lâng lâi.” Ki-hap-se chiū khì kiò i. I chiū ji̍p--lâi, Í-lī-sa tùi i kóng, “Kā lí ê gín-á phō--khí-lâi.”

37Hū-jîn-lâng phak tī Í-lī-sa ê kha-chêng, pài i, jiân-āu phō i ka-kī ê kiáⁿ chhut--khì.

38Ū chi̍t piàn, kok-lāi hoat-seng ki-hng, Í-lī-sa tńg-lâi Kiat-kah. Sian-ti ê ha̍k-seng chē tī i ê bīn-chêng, i hoan-hù po̍k-jîn kóng, “Lí khí-hé, ēng tōa ê e-á chú chhài-thng hō͘ ha̍k-seng chia̍h.”

39Ū chi̍t ê lâng khì hn̂g--ni̍h bán-chhài, khòaⁿ-tio̍h chi̍t châng iá-koe-tîn, chiū bán chin chōe iá-koe tò--lâi; chhiat-chhiat--leh lok tī chú chhài-thng ê e-á; in m̄ bat hit-ê sī sím-mi̍h.

40Chú hó, tò chhut-lâi hō͘ tāi-ke chia̍h. In chia̍h ê sî, lóng hoah kóng, “Siōng-tè tiōng-iōng ê lâng, e-á lāi ê mi̍h-kiāⁿ chia̍h-liáu ōe sí.” In chiū m̄-káⁿ chia̍h.

41Í-lī-sa kóng, “The̍h chi̍t-kóa mī-hún lâi.” I chiong mī-hún iā tī e--ni̍h, kóng, “Tò chhut-lâi hō͘ tāi-ke chia̍h.” E-á lāi ê mi̍h-kiāⁿ chiū bô koh ū to̍k.

42Ū chi̍t ê lâng tùi Pa-le̍k Sa-lī-sa lâi, tòa chho͘-se̍k ê tōa-be̍h chòe ê piáⁿ jī-cha̍p ê, kap sin ê be̍h-sūi, tóe tī tē-á, sàng hō͘ Siōng-tè tiōng-iōng ê lâng. Í-lī-sa kóng, “Chiong chiah-ê hō͘ tāi-ke chia̍h.”

43I ê po̍k-jîn kóng, “Chiah-ê kiám ū kàu hō͘ chi̍t-pah ê lâng chia̍h?” Í-lī-sa kóng, “Chòe lí pun hō͘ tāi-ke chia̍h, in-ūi Siōng Chú án-ni kóng, ‘In beh chia̍h kàu pá, koh ū chhun.’”

44I ê po̍k-jîn chiū pun hō͘ tāi-ke. Chiàu Siōng Chú só͘ kóng ê ōe, in lóng chia̍h kah pá, koh ū chhun.