Psalms 102

Chinese TTVR (現代台語譯本羅馬字版)

← Chapter 101 Jump to: Chapter 103 →

1Siōng Chú ah, kiû lí thiaⁿ góa ê kî-tó, hō͘ góa kiû-kiò ê siaⁿ thàu kàu lí ê bīn-chêng.

2Góa tī gûi-kip ê ji̍t, m̄-thang bīn oa̍t-cháu m̄ khòaⁿ góa; kiû lí àⁿ hī-khang thiaⁿ góa. Góa kiû-kiò ê sî, kiû lí sûi-sî ìn góa.

3In-ūi góa ê sìⁿ-miā chhin-chhiūⁿ ian siau-sòaⁿ; góa ê kut-thâu chhin-chhiūⁿ chhâ tī hé-lô͘ lāi teh sio.

4Góa ê sim siū-siong, chhin-chhiūⁿ chháu ta--khì, liân pn̄g to bô ài chia̍h.

5Góa thó͘-khùi haiⁿ-haiⁿ-chhan; góa siau-sán-lo̍h-bah.

6Góa chhin-chhiūⁿ khòng-iá ê thê-ô͘, chhin-chhiūⁿ hong-po͘ ê àm-kong-chiáu.

7Góa kui-mî bô khùn, chhin-chhiūⁿ chhù-téng ko͘-toaⁿ ê chiáu-á.

8Góa ê tùi-te̍k kui-ji̍t bú-jio̍k góa; thí-chhiò góa ê lâng ēng góa kā lâng chiù-chó͘.

9Góa ēng hé-hu chún pn̄g chia̍h, só͘ lim--ê lóng chham ba̍k-sái.

10Che sī in-ūi lí khí sèng-tē hoat siū-khì, kā góa giâ--khí-lâi koh hiat--lo̍h-khì.

11Góa ê sìⁿ-miā chhin-chhiūⁿ ji̍t chhiâ, chhin-chhiūⁿ chháu ta--khì.

12Chí-ū Siōng Chú lí éng-oán chûn-chāi, hō͘ lâng kì-liām kàu bān-tāi.

13Lí beh khí-lâi lîn-bín Sek-an; in-ūi hiān-chāi sī si-un ê sî, chí-tēng ê ji̍t í-keng kàu.

14Lí ê po̍k-jîn ì-ài Sek-an ê chio̍h-thâu, liân i ê thô͘-hún to pó-sioh.

15Lia̍t-kok ōe kèng-ùi Siōng Chú ê miâ; sè-chiūⁿ ê kun-ông lóng ōe kèng-ùi lí ê êng-kng.

16In-ūi Siōng Chú tiông-kiàn Sek-an ê sî, beh tī I ê êng-kng tiong hián-hiān.

17I àⁿ-lo̍h thiaⁿ sàn-chhiah-lâng ê kî-tó, bōe khòaⁿ-khin in ê khún-kiû.

18Tio̍h ūi-tio̍h hō͘-tāi ê lâng kì-chài Siōng Chú ê chok-ûi, hō͘ chiong-lâi chhut-sì ê lâng thang chheng-chàn I.

19Siōng Chú tùi chì-koân ê sèng-só͘ khòaⁿ--lo̍h-lâi, tùi thiⁿ-téng khòaⁿ lo̍h tōe.

20I beh thiaⁿ siû-hoān ê thó͘-khùi, beh kái-kiù siū phòaⁿ sí-hêng ê lâng,

21hō͘ lâng thang tī Sek-an thoân-iông Siōng Chú ê miâ, tī Iâ-lō͘-sat-léng thoân-pò͘ chheng-chàn I ê ōe;

22hit-sî lia̍t-kok ōe chū-chi̍p, bān-bîn ōe ho̍k-sāi Siōng Chú.

23I hō͘ góa ê khùi-la̍t bī-ló-sian-soe, hō͘ góa ê sìⁿ-miā sok-té.

24Góa kóng, “Góa ê Siōng-tè ah, m̄-thang tī góa tiong-liân ê sî thó góa ê sìⁿ-miā.” Lí ê nî-ji̍t kàu bān sè-tāi bû-kiông-chīn!

25Lí tī khí-thâu kā tōe hē tōe-ki; thiⁿ mā-sī lí chhin-chhiú chhòng-chō.

26Thiⁿ-tōe lóng ōe siau-sit, m̄-kú lí éng-oán chûn-chāi. In ōe chhin-chhiūⁿ saⁿ chhēng phòa--khì; lí ōe kā in thòe-ōaⁿ chhin-chhiūⁿ ōaⁿ-saⁿ, in chiū bô--khì.

27Chí-ū lí bōe kái-piàn; lí ê hè-siū bû-kiông-chīn.

28Goān lí po̍k-jîn ê kiáⁿ-sun kú-tn̂g an-ún khiā-khí, in ê hō͘-tāi tī lí bīn-chêng kian-kò͘ khiā-chāi.

← Chapter 101 Jump to: Chapter 103 →