Psalms 107

Chinese TTVR (現代台語譯本羅馬字版)

← Chapter 106 Jump to: Chapter 108 →

1Lín tio̍h kám-siā Siōng Chú, in-ūi I chì-siān! I ê chû-ài éng-oán chûn-sio̍k!

2Siōng Chú só͘ kiù-sio̍k ê lâng, I tùi tùi-te̍k chhiú-tiong só͘ kiù-sio̍k ê lâng,

3tùi ta̍k-kok, tùi tang tùi sai, tùi lâm tùi pak, só͘ chū-chi̍p ê lâng lóng tio̍h án-ni kóng.

4In tī khòng-iá pha-hng ê lō͘ liû-lōng, chhē bô siâⁿ thang khiā-khí.

5In ia̍h iau ia̍h chhùi-ta; in ê sim-sîn hūn--khì.

6In tī khó͘-lān tiong ai-kiû Siōng Chú, I chiū kái-kiù in thoat-lī hoān-lān.

7I chhōa in kiâⁿ ti̍t ê lō͘, hō͘ in kàu thang khiā-khí ê siâⁿ.

8In-ūi Siōng Chú ê chû-ài kap I tùi sè-kan-lâng só͘ chòe ê kî-sū, lâng lóng tio̍h chheng-chàn I.

9I hō͘ chhùi-ta ê lâng ti-chiok, hō͘ iau-gō ê lâng ū hó-mi̍h chia̍h kàu pá.

10Chē tī o͘-àm sí-ìm tiong ê lâng, siū khùn-khó͘ kap thih-liān khún-pa̍k ê lâng,

11in-ūi in pōe-ge̍k Siōng-tè ê ōe, khòaⁿ-khin Chì-koân Siōng-tè ê chí-ì,

12só͘-í I ēng lô-khó͘ kā in kà-koai; in poa̍h-tó, bô lâng hû-chō͘.

13In tī khó͘-lān tiong ai-kiû Siōng Chú, I chiū kái-kiù in thoat-lī hoān-lān.

14I tùi o͘-àm sí-ìm tiong chhōa in chhut--lâi, chhoah-tn̄g pa̍k in ê soh.

15In-ūi Siōng Chú ê chû-ài kap I ūi-tio̍h sè-kan-lâng só͘ chòe ê kî-sū, lâng lóng tio̍h chheng-chàn I.

16In-ūi I phah-phòa tâng ê mn̂g, chām-tn̄g thih ê mn̂g-chhòaⁿ.

17Gōng-lâng in-ūi in ka-kī ê kè-sit, koh in-ūi in ê chōe-ok, siū khó͘-chhó͘.

18In iàm-ò͘ⁿ ta̍k-khoán ê chia̍h-mi̍h, í-keng óa-kūn sí-bông ê mn̂g.

19In tī khó͘-lān tiong ai-kiû Siōng Chú, I chiū kái-kiù in thoat-lī hoān-lān.

20I chhut bēng-lēng i-hó in, kiù in thoat-lī sí-bông.

21In-ūi Siōng Chú ê chû-ài kap I tùi sè-kan-lâng só͘ chòe ê kî-sū, lâng lóng tio̍h chheng-chàn I.

22Goān in hiàn kám-siā ê chè, ēng hoaⁿ-hí ê si-koa kóng-khí I ê só͘-chòe.

23Chē-chûn kè hái, tī tōa-hái chòe seng-lí ê lâng,

24in ū khòaⁿ-kìⁿ Siōng Chú ê só͘-chòe, kap I tī chhim-ian só͘ chòe ê kî-sū.

25Siōng Chú chi̍t-ē bēng-lēng, kông-hong chiū khí, hái-tiong ê éng giâ--khí-lâi.

26In chiūⁿ kàu kiong-chhong, lo̍h kàu hái-tóe, in-ūi gûi-hiám, sîn-hûn siau-sòaⁿ.

27In tian-tian-tó-tó, tang-tó-sai-oai, chhin-chhiūⁿ chiú-chùi ê lâng; in ê kang-hu lóng bô lō͘-ēng.

28In tī khó͘-lān tiong ai-kiû Siōng Chú, I chiū tùi hoān-lān tiong kiù in chhut--lâi.

29I hō͘ kông-hong thêng, hái-éng chiū pêng-chēng.

30Hong thêng, éng chēng, in chiū hoaⁿ-hí, I chiū chhōa in kàu só͘ ài khì ê káng-kháu.

31In-ūi Siōng Chú ê chû-ài kap I ūi-tio̍h sè-kan-lâng só͘ chòe ê kî-sū, lâng lóng tio̍h chheng-chàn I.

32Goān in tī jîn-bîn ê chū-hōe tiong chun I chòe chì-koân, tī tiúⁿ-ló ê gī-hōe tiong chheng-chàn I.

33I hō͘ kang-hô pìⁿ-chòe khòng-iá, hō͘ chúi-chôaⁿ pìⁿ-chòe ta-sò ê tōe.

34I hō͘ pûi-tōe pìⁿ-chòe kiâm-tōe, che lóng sī in-ūi khiā-khí tī hia ê lâng ê chōe.

35I hō͘ khòng-iá pìⁿ-chòe chúi-thâm, hō͘ ta-tōe pìⁿ-chòe chúi-chôaⁿ.

36I hō͘ iau-gō ê lâng tiàm tī hia, hō͘ in khí-chō siâⁿ thang khiā-khí,

37koh chèng-choh chhân-hn̂g, chai phû-tô, tit-tio̍h hong-hù ê thó͘-sán.

38I sù hok-khì, hō͘ in siⁿ-thòaⁿ chin chōe, hō͘ in ê cheng-siⁿ bô kiám-chió.

39In koh in-ūi ap-pek, hoān-lān, iu-khó͘, jîn-kháu kiám-chió, hō͘ lâng khòaⁿ-khin.

40I hō͘ kùi-cho̍k siū bú-jio̍k, liû-lōng tī hong-hòe bô lō͘ ê só͘-chāi.

41M̄-kú I thê-poa̍t sàn-chhiah-lâng, hō͘ in thoat-lī khó͘-lān, hō͘ in ka-cho̍k heng-ōng chhin-chhiūⁿ iûⁿ-kûn hiah chōe.

42Chèng-ti̍t ê lâng khòaⁿ--kìⁿ chiū hoaⁿ-hí; pháiⁿ-lâng lóng tiām--khì bô ōe thang kóng.

43Tì-hūi ê lâng tio̍h chù-ì chiah-ê tāi-chì, tio̍h siàu-liām Siōng Chú ê chû-ài.

← Chapter 106 Jump to: Chapter 108 →