Psalms 73

Chinese TTVR (現代台語譯本羅馬字版)

← Chapter 72 Jump to: Chapter 74 →

1Siōng-tè si̍t-chāi hó khoán-thāi Í-sek-lia̍t, hó khoán-thāi hiah-ê sim chheng-khì ê lâng.

2Sui-jiân án-ni, góa ê kha hiám-hiám ta̍h thu̍t--khì; góa ê kha-pō͘ hiám-hiám kiâⁿ phian--khì.

3In-ūi góa ū khòaⁿ-tio̍h pháiⁿ-lâng kap kiau-ngō͘ ê lâng heng-ōng, góa chiū oàn-tò͘ put-pêng.

4In it-seng lóng m̄-bat kan-khó͘, seng-khu ióng-chòng hó-khòaⁿ.

5In bô chhin-chhiūⁿ pa̍t-lâng thoa-bôa lô-khó͘, mā bô chhin-chhiūⁿ pa̍t-lâng siū-tio̍h chai-hō.

6Só͘-í in ēng kiau-ngō͘ chòe phoa̍h-liān kòa tī ām-kún, ēng pō-le̍k chòe saⁿ chhēng.

7In seng-khu pûi, ba̍k-chiu ham, sim chhiong-móa siâ-liām.

8In thí-chhiò, ok-ì tiòng-siong lâng; in kóng tōa-siaⁿ-ōe ap-chè lâng.

9In ê chhùi siat-to̍k thiⁿ; in ê chi̍h chiù-mē tōe.

10Liân Siōng-tè ê chú-bîn to kui-óa in, choân-pôaⁿ chiap-siū in só͘ kóng ê ōe.

11In kóng, “Siōng-tè ná ōe chai? Chì-koân Siōng-tè kiám ōe bat?”

12Khòaⁿ, chiah-ê sī pháiⁿ-lâng; in put-sî bô-hoân-bô-ló, châi-pó ná ke-thiⁿ.

13Góa pó-siú góa ê sim chheng-khì si̍t-chāi bô-chhái-kang; góa sóe-chhiú bô bak-tio̍h chōe-ok mā-sī khang-khang.

14In-ūi góa kui-ji̍t tú-tio̍h chai-lān, ta̍k chá-khí siū-tio̍h khiàn-chek.

15Góa nā kóng góa beh chiàu in án-ni kóng, chiū tùi lí ê chú-bîn bô tiong-si̍t.

16Góa siūⁿ-beh liáu-kái chit-ê tāi-chì, m̄-kú bô hoat-tō͘;

17kàu ji̍p-khì Siōng-tè ê sèng-só͘, góa chiah bêng-pe̍k in ê kiat-kio̍k.

18Lí it-tēng ōe kā in khǹg tī ku̍t-ku̍t ê só͘-chāi, hō͘ in siak-tó bia̍t-bông.

19In hō͘ khióng-pò͘ thun-bia̍t, chi̍t-ba̍k-nih-kú chiū bia̍t-bông.

20Chhin-chhiūⁿ lâng khùn-chhíⁿ chiū chai in ê bîn-bāng sī hoàn-sióng, Chú ah, lí chi̍t-ē khí--lâi, pháiⁿ-lâng mā án-ni siau-sit.

21Góa ê sim chin sng, góa ê sim-chêng khó͘-thàng.

22Góa gû-gōng, bû-ti, tī lí ê bīn-chêng chhin-chhiūⁿ cheng-siⁿ.

23Chóng-sī góa put-sî kap lí chòe-hé; lí khan góa ê chiàⁿ-chhiú,

24ēng lí ê kà-sī ín-chhōa góa, chiap-la̍p góa, hō͘ góa tit-tio̍h chun-êng.

25Tī thiⁿ-téng, lí í-gōa góa ū sím-mi̍h-lâng? Tī tōe-chiūⁿ, lí í-gōa góa bô só͘ ì-ài.

26Góa ê jio̍k-thé, góa ê sim-sîn ōe soe-jio̍k, m̄-kú Siōng-tè éng-oán sī góa ê khùi-la̍t kap sán-gia̍p.

27Lī-khui lí hn̄g-hn̄g ê lâng it-tēng bia̍t-bông; pàng-sak lí, pōe-poān lí ê lâng, lí lóng ōe kā in siau-bia̍t.

28Tùi góa lâi kóng, chhin-kūn Siōng-tè siōng hó; góa chhē Chì-koân ê Siōng Chú chòe pī-lān-só͘, hō͘ góa thang soan-iông lí it-chhè ê chok-ûi.

← Chapter 72 Jump to: Chapter 74 →