Psalms 142

Chinese TTVR (現代台語譯本羅馬字版)

← Chapter 141 Jump to: Chapter 143 →

1Góa tōa-siaⁿ kiû-kiò Siōng Chú, chhut tōa-siaⁿ khún-kiû Siōng Chú.

2Góa tī I bīn-chêng thò͘-lō͘ góa ê khó͘-chêng, tī I bīn-chêng kóng-chhut góa ê hoān-lān.

3Góa ê sim-sîn sit-chì, kiông-beh hūn--khì, lí chai góa ê lō͘; tī góa kiâⁿ ê lō͘, in àm-tiong kā góa siat lô-bāng.

4Kiû lí khòaⁿ góa ê chiàⁿ-pêng, tī hia bô lâng ūi góa; góa bô só͘-chāi thang bih, mā bô lâng koan-sim góa.

5Siōng Chú ah, góa tùi lí ai-kiû, kóng, “Lí sī góa ê pī-lān-só͘; góa iáu oa̍h--teh ê ji̍t, lí sī góa ê it-chhè.”

6Kiû lí àⁿ hī-khang thiaⁿ góa ê kiû-kiò, in-ūi góa hām-lo̍h kàu siōng pi-chhám ê tōe-pō͘; kiû lí kiù góa thoat-lī khún-pek góa ê lâng, in-ūi in pí góa khah kiông.

7Kiû lí kiù góa thoat-chhut kaⁿ-lô, hō͘ góa thang chheng-chàn lí ê miâ. Gī-lâng ōe ûi-lûi tī góa sin-piⁿ, in-ūi lí ēng un-tián tùi-thāi góa.

← Chapter 141 Jump to: Chapter 143 →