Psalms 149

Chinese TTVR (現代台語譯本羅馬字版)

← Chapter 148 Jump to: Chapter 150 →

1Ha-lé-lú-iah, chheng-chàn Siōng Chú! Tio̍h tùi Siōng Chú chhiùⁿ sin ê koa, tī sèng ê chú-bîn ê chū-hōe tiong chheng-chàn I.

2Goān Í-sek-lia̍t in-ūi in ê Chhòng-chō-chú lâi hoaⁿ-hí; goān Sek-an ê chú-bîn in-ūi in ê Ông lâi khoài-lo̍k.

3Goān in thiàu-bú chheng-chàn I ê miâ, phah-kó͘ tôaⁿ-khîm, chhiùⁿ-koa o-ló I.

4Siōng Chú ì-ài I ê chú-bîn; I ōe ēng kiù-un chòe khiam-pi ê lâng ê chng-thāⁿ.

5Goān sèng ê chú-bîn in-ūi só͘ tit--tio̍h ê êng-kng lâi hoaⁿ-hí; goān in kui-mî chhut hoaⁿ-hí ê siaⁿ.

6Goān in ê chhùi chheng-chàn Siōng-tè chòe chì-koân, in ê chhiú gia̍h siang-bīn-lāi ê kiàm,

7pò-èng gōa-pang, hêng-hoa̍t lia̍t-kok,

8ēng thih-liān pa̍k in ê kun-ông, ēng thih-khàu só in ê jîn-sîn,

9tī in ê sin-chiūⁿ chip-hêng só͘ tēng ê phòaⁿ-koat; che sī I sèng ê chú-bîn ê êng-kng. Ha-lé-lú-iah, chheng-chàn Siōng Chú!

← Chapter 148 Jump to: Chapter 150 →