Psalms 80

Chinese TTVR (現代台語譯本羅馬字版)

← Chapter 79 Jump to: Chapter 81 →

1Í-sek-lia̍t ê Bo̍k-chiá, chhōa Iok-sek chhin-chhiūⁿ teh chhōa iûⁿ-kûn ê Siōng-tè ah, kiû lí àⁿ hī-khang thiaⁿ; chē tī thiⁿ-sài ki-lō͘-pek pó-chō téng ê Chú ah, kiû lí hoat-chhut kng.

2Kiû lí tī Í-hoat-liân, Piān-ngá-bín, Má-ná-se ê bīn-chêng, hián-chhut lí ê koân-lêng lâi kiù goán.

3Siōng-tè ah, kiû lí hō͘ goán ho̍k-heng, hō͘ lí ê bīn hoat-kng chiò goán, goán chiū tit-tio̍h kái-kiù.

4Siōng Chú — Bān-kun ê Thóng-sòe Siōng-tè ah, lí tùi lí chú-bîn ê kî-tó hoat siū-khì beh kàu jōa kú?

5Lí hō͘ goán ēng ba̍k-sái chòe pn̄g chia̍h, ēng kui-óaⁿ ba̍k-sái chòe chúi lim.

6Lí hō͘ keh-piah-kok in-ūi goán saⁿ-chiⁿ, tùi-te̍k chòe-tīn kā goán thí-chhiò.

7Bān-kun ê Thóng-sòe Siōng-tè ah, kiû lí hō͘ goán ho̍k-heng, hō͘ lí ê bīn hoat-kng chiò goán, goán chiū tit-tio̍h kái-kiù.

8Lí tùi Ai-ki̍p sóa chi̍t châng phû-tô-chhiū, kóaⁿ-chhut lia̍t-pang, kā i chai-chèng tī chia.

9Lí ūi-tio̍h i chéng-tōe; i ê kun tèng chhim, siⁿ-thòaⁿ móa-tōe.

10I ê iáⁿ jia-ba̍t chèng-soaⁿ; i ê ki jia-khàm tōa-châng ê pek-hiuⁿ-chhiū.

11I ê ki chhun kàu Tōe-tiong-hái; i ê tîn thòaⁿ kàu Iù-hoat-la-tí-hô.

12Taⁿ lí sī-án-chóaⁿ thiah-húi i ê lî-pa, chhut-chāi só͘-ū kè-lō͘ ê lâng bán phû-tô,

13chhut-chāi chhiū-nâ lāi ê soaⁿ-ti chau-that, chhut-chāi chhân-iá ê cháu-siù thun-chia̍h?

14Bān-kun ê Thóng-sòe Siōng-tè ah, kiû lí oa̍t tò-tńg, tùi thiⁿ àⁿ-lo̍h khòaⁿ, chiàu-kò͘ chit-châng phû-tô-chhiū,

15pó-hō͘ lí chiàⁿ-chhiú só͘ chai-chèng ê chhiū, kap lí ūi ka-kī só͘ chiàu-kò͘ ê iù-ki.

16Hiah-ê ēng hé sio, ēng to chhò phû-tô-chhiū ê lâng, kiû lí hoat siū-khì kā in siau-bia̍t.

17Goān lí ê chhiú pó-hō͘ lí chiàⁿ-pêng ê lâng, chiū-sī lí ūi ka-kī só͘ kéng-soán ê lâng.

18Án-ni, goán chiū bōe pōe-poān lí; kiû lí kā goán kiù oa̍h, goán chiū beh kiû-kiò lí ê miâ.

19Siōng Chú — Bān-kun ê Thóng-sòe Siōng-tè ah, kiû lí hō͘ goán ho̍k-heng; hō͘ lí ê bīn hoat-kng chiò goán, goán chiū tit-tio̍h kái-kiù.

← Chapter 79 Jump to: Chapter 81 →