Psalms 90

Chinese TTVR (現代台語譯本羅馬字版)

← Chapter 89 Jump to: Chapter 91 →

1Chú ah, lí sè-sè-tāi-tāi sī goán ê pī-lān-só͘.

2Chèng-soaⁿ iáu-bē siū-chō, tāi-tōe kap sè-kài iáu-bē chō-chiâⁿ, lí éng-éng-oán-oán sī Siōng-tè!

3Lí hō͘ thô͘ chō ê lâng kui-hôe thô͘-hún, kóng, “Lâng ah, tio̍h hôe-kui goân-pún.”

4Tùi lí lâi khòaⁿ, chi̍t-chheng nî chhin-chhiūⁿ kè--khì ê chā-ji̍t, chhin-chhiūⁿ àm-mî ê chi̍t kiⁿ.

5Lí ēng tōa-chúi kā lâng chhiong-cháu; jîn-seng chhin-chhiūⁿ chi̍t tiûⁿ bîn-bāng, chhin-chhiūⁿ chháu chá-khí-sî puh-íⁿ;

6chá-khí-sî hoat--khí-lâi, bō͘-sēng, àm-sî tiau-siā, ta--khì.

7Goán in-ūi lí ê siū-khì siau-bia̍t, in-ūi lí ê tōa siū-khì kiaⁿ-hiâⁿ.

8Lí chiong goán ê chōe-kò pâi tī lí bīn-chêng; goán pì-bi̍t ê chōe tī lí bīn-chêng po̍k-lō͘--chhut-lâi.

9Goán ê ji̍t-chí lóng tī lí ê siū-khì ē kè--khì; goán ê it-seng chhin-chhiūⁿ thó͘ chi̍t ê khùi.

10Goán ê hè-siū put-kò sī chhit-cha̍p, nā ióng-kiāⁿ thang kàu poeh-cha̍p. Goán ōe-tàng khoa-kháu--ê put-kò sī lô-khó͘ iu-chhiû; jîn-seng chhin-chhiūⁿ teh pe, chi̍t-ba̍k-nih-kú chiū kè--khì.

11Siáⁿ-lâng kám-siū ōe tio̍h lí siū-khì ê ui-le̍k? Siáⁿ-lâng liáu-kái lí siū-khì ê khó-phàⁿ?

12Kiû lí kà goán ōe-hiáu sǹg ka-kī ê ji̍t-chí, hō͘ goán ê sim ū tì-hūi.

13Siōng Chú ah, lí sím-mi̍h sî chiah beh kái-piàn sim-ì? Kiû lí lîn-bín lí ê po̍k-jîn.

14Kiû lí thàu-chá chiū hō͘ goán hióng-siū lí ê chû-ài, hō͘ goán chi̍t-sì-lâng chhiong-móa hoaⁿ-hí khoài-lo̍k.

15Lí hō͘ goán it-seng ū jōa-chōe kan-khó͘ chai-lān, kiû lí mā hō͘ goán it-seng hióng-siū hiah chōe hoaⁿ-hí khoài-lo̍k.

16Kiû lí hō͘ lí ê po̍k-jîn khòaⁿ-kìⁿ lí ê chok-ûi, hō͘ goán ê kiáⁿ-sun khòaⁿ-kìⁿ lí ê êng-iāu.

17Chú — goán ê Siōng-tè ah, kiû lí sù-hok hō͘ goán! Kiû lí hō͘ goán it-chhè ê kang-chok sūn-lī; kiû lí hō͘ goán ê só͘-chòe lóng heng-thong.

← Chapter 89 Jump to: Chapter 91 →