Psalms 132

Chinese TTVR (現代台語譯本羅馬字版)

← Chapter 131 Jump to: Chapter 133 →

1Siōng Chú ah, kiû lí ōe-kì-tit Tāi-pi̍t só͘ siū it-chhè ê khó͘-lān,

2ōe-kì-tit i án-chóaⁿ tùi Siōng Chú chiù-chōa, tùi Ngá-kok ê Tāi-lêng-chiá hē-goān,

3“Góa it-tēng bōe ji̍p-khì góa ê chhù, mā bōe chiūⁿ góa ê bîn-chhn̂g;

4góa bōe hō͘ góa ê ba̍k-chiu khùn--khì, mā bōe iông-ún góa ê ba̍k-chiu-phê ha̍p-óa;

5thèng-hāu góa ūi-tio̍h Siōng Chú chhē-tio̍h só͘-chāi, ūi Ngá-kok ê Tāi-lêng-chiá chhē-tio̍h khiā-khí ê só͘-chāi.”

6Goán thiaⁿ-kìⁿ iok-kūi tī Í-hoat-tha, tī Ngá-ní ê chhân chhē--tio̍h.

7Goán beh ji̍p-khì Siōng Chú khiā-khí ê só͘-chāi; goán beh tī I ê kha-tiam thâu-chêng kūi-pài.

8Siōng Chú ah, kiû lí khí--lâi; lí kap lí ū khùi-la̍t ê iok-kūi chòe-hé ji̍p-khì lí hioh-khùn ê só͘-chāi.

9Goān lí ê chè-si ēng kong-gī chòe saⁿ chhēng; goān lí sèng ê chú-bîn chhut hoaⁿ-hí ê siaⁿ.

10Kiû lí in-ūi lí ê po̍k-jîn Tāi-pi̍t ê iân-kò͘, m̄-thang khì-sak lí boah-iû kéng-soán ê kun-ông.

11Siōng Chú ēng sìn-si̍t tùi Tāi-pi̍t li̍p-sè, it-tēng bōe kái-piàn, kóng, “Góa beh hō͘ lí chi̍t ê kiáⁿ chē lí ê pó-chō.

12Lí ê kiáⁿ-sun nā chun-siú góa ê iok, kap góa beh hō͘ in ê kà-sī, in ê kiáⁿ-sun mā ōe éng-oán chē lí ê pó-chō.”

13Siōng Chú ū kéng Sek-an, chòe I pún-sin khiā-khí ê só͘-chāi, kóng,

14“Che sī góa éng-oán hioh-khùn ê só͘-chāi; góa beh tiàm chia, in-ūi sī góa só͘ ì-ài.

15Góa beh hō͘ Sek-an bí-niû hong-sēng, ēng chia̍h-mi̍h hō͘ i ê sàn-chhiah-lâng kàu-gia̍h thang chia̍h.

16Góa beh hō͘ i ê chè-si ēng kiù-un chòe saⁿ chhēng; I sèng ê chú-bîn ōe chhut tōa hoaⁿ-hí ê siaⁿ.

17Góa beh hō͘ Tāi-pi̍t ê ông-koân khok-tián chòng-tāi, ūi-tio̍h góa boah-iû kéng-soán ê kun-ông chún-pī kng-teng.

18Góa beh hō͘ i ê tùi-te̍k ēng kiàn-siàu chòe saⁿ chhēng; chóng-sī ông tì ê ông-koan ōe hoat-chhut kong-chhái.”

← Chapter 131 Jump to: Chapter 133 →