Psalms 141

Chinese TTVR (現代台語譯本羅馬字版)

← Chapter 140 Jump to: Chapter 142 →

1Siōng Chú ah, góa kiû-kiò lí; kiû lí kín lâi pang-chān góa! Góa kiû-kiò lí ê sî, kiû lí àⁿ hī-khang thiaⁿ góa ê siaⁿ.

2Goān góa ê kî-tó chhin-chhiūⁿ hiuⁿ chhèng kàu lí bīn-chêng; goān góa gia̍h-khí ê siang-chhiú, chhin-chhiūⁿ ē-hng-sî ê chè-sū siū lí chiap-la̍p.

3Siōng Chú ah, kiû lí iok-sok góa ê chhùi, khàn-siú góa chhùi ê mn̂g.

4Kiû lí m̄-thang hō͘ góa ê sim phian-ǹg siâ-ok, kap chòe pháiⁿ ê lâng tàu-tīn chòe pháiⁿ; m̄-thang hō͘ góa kap in kâng-toh lim-chia̍h.

5Lêng-khó hō͘ gī-lâng ēng jîn-chû phah góa, chí-chèng góa, mā m̄ hō͘ pháiⁿ-lâng tī góa thâu-khak boah-iû hoan-gêng góa. Sui-jiân pháiⁿ-lâng chòe pháiⁿ, iáu-kú góa beh kè-sio̍k kî-tó.

6In ê chip-chèng-chiá siū hiat-lo̍h soaⁿ-khàm, in chiū ōe chai góa ê ōe sī chin-si̍t.

7Chhin-chhiūⁿ thô͘ hō͘ lôe lôe-sòaⁿ, in ê kut-thâu ōe sòaⁿ kah kui bōng-kháu.

8Chì-koân ê Siōng Chú ah, góa chù-ba̍k khòaⁿ lí; kiû lí pó-hō͘ góa bián tì-kàu sí-bông.

9Kiû lí pó-hō͘ góa bián hām-lo̍h in kā góa siat ê lô-bāng, í-ki̍p chòe pháiⁿ ê lâng ê khoân-thò.

10Kiû lí hō͘ pháiⁿ-lâng hām-lo̍h ka-kī ê lô-bāng, hō͘ góa an-choân thoat-lī.

← Chapter 140 Jump to: Chapter 142 →