Psalms 144

Chinese TTVR (現代台語譯本羅馬字版)

← Chapter 143 Jump to: Chapter 145 →

1Siōng Chú góa só͘ óa-khò ê chio̍h-pôaⁿ, eng-kai tit-tio̍h chheng-chàn; I hùn-liān góa ê chhiú gâu cheng-chiàn, kà góa ê chńg-thâu-á ū ki-khiáu gâu sio-thâi.

2I sī éng-oán thiàⁿ góa ê Siōng-tè, góa ê iàu-sài, sī góa ê pó-lúi, góa ê Chín-kiù-chiá, sī góa óa-khò ê tún-pâi. I hō͘ lia̍t-pang hâng-ho̍k tī góa ē-bīn.

3Siōng Chú ah, lâng sǹg sím-mi̍h, lí iáu hiah-ni̍h koan-sim! Thô͘ chòe ê lâng sǹg sím-mi̍h, lí iáu hiah-ni̍h chiàu-kò͘!

4Lâng ê sìⁿ-miā chhin-chhiūⁿ chhoán chi̍t ê khùi; i ê ji̍t-chí chhin-chhiūⁿ iáⁿ chin kín chiū siau-sit.

5Siōng Chú ah, kiû lí thí-khui thiⁿ, chhin-sin kàng-lîm, bong soaⁿ, hō͘ soaⁿ chhèng-ian.

6Kiû lí hoat-chhut sih-nà kā tùi-te̍k kóaⁿ-sòaⁿ; kiû lí siā-chìⁿ, hō͘ in sì-sòaⁿ.

7Kiû lí tùi téng-bīn chhun-chhiú kiù góa, kiù góa thoat-lī tōa-chúi, kái-kiù góa thoat-lī gōa-pang-lâng ê chhiú.

8In ê chhùi kóng pe̍h-chha̍t; in gia̍h chiàⁿ-chhiú choh gūi-chèng.

9Siōng-tè ah, góa beh tùi lí chhiùⁿ sin ê koa, ēng cha̍p tiâu hiân ê sek chhiùⁿ-koa chheng-chàn lí.

10Lí hō͘ kun-ông tek-sèng, kiù lí ê po̍k-jîn Tāi-pi̍t thoat-lī thâi-lâng ê to.

11Kiû lí kái-kiù góa thoat-lī gōa-pang-lâng ê chhiú. In ê chhùi kóng pe̍h-chha̍t; in gia̍h chiàⁿ-chhiú choh gūi-chèng.

12Goān goán ê ta-po͘-kiáⁿ siàu-liân ióng-chòng, chhin-chhiūⁿ chhiū-á bō͘-sēng; goán ê cha-bó͘-kiáⁿ chin súi, chhin-chhiūⁿ ông-kiong tiau-khek ê chio̍h-thiāu.

13Goān goán ê chhek-chhng móa-móa, ū tún ta̍k-chióng ê bí-niû, goán ê iûⁿ tī soaⁿ-iá siⁿ-thòaⁿ, chiâⁿ-chheng chiâⁿ-bān.

14Goān goán ê gû pûi koh gâu siⁿ. Siâⁿ-chhiûⁿ bô siū lòng-phòa, bô lâng siū-lia̍h khì īⁿ-pang, koe-chhī bô ai-khàu ê siaⁿ.

15Hióng-siū chit-khoán kéng-hóng ê chú-bîn chin ū hok-khì! Jīn Siōng Chú chòe in ê Siōng-tè ê chú-bîn chin ū hok-khì!

← Chapter 143 Jump to: Chapter 145 →