Isaiah 30

Zande

← Chapter 29 Jump to: Chapter 31 →

1“Na gberẽ he fu agude samungu,” wo poi Yekova, “nga agu yo namanga rugapai, ono gimi te; nga agu yo namanga kpamiatise, ono be gi toro te, ya i mangi ingapai ku ri ingapai;

2nga agu yo naguari ka ndu ku Ezipeta yo, ka i asana nga re mbata ya, ka gbu rogo gu nyakasatise nga ga Faro, ka gbata bagbuko rogo nzereme Ezipeta!

3Si du gu nyakasatise nga ga Faro adú ni uzee fu roni, na gu bagbuko du nzereme Ezipeta yo adú ni upayasi roni.

4Bambiko ka gako abazogo vura du ku Siona yo vurũ, gako abamokedi da ku Anesa yo,

5i adú dunduko na zee be agu aboro arengba nga ka i u be yo ya, nga agu yo afu nga undahe na u a ya, ono kina pa zee, na gbarasarimo.”

6Gu pa rungo du tipa agu anya du Negebe yo. Ti gu ringara nga ga fudifudipai na ima, yo nabahu ayé ni na bara, yo du wo ni na gu kere wo nagu agu, yo i natinda gayo aũkumuko ni ri paranga abaadongi, na gayo kikiipa ahe ri ngongo akameri, fu agu aboro ka i au nga be yo ya.

7Bambiko ga Ezipeta undahe si gbua, pai rogo ho te, si du mi naya ti he, “Raba, nga gu ri nasunga gbua.”

8Mo ndú awere, mo ké he ku bangiriyo ti kpasakpasa mbia, ki ke he rogo kitabu a, ya si du tipa gu rago nikaye ni dezirepai nye anye kindi.

9Bambiko i nga aboro samungu, agude zire, nga agu agude agia nga pa agu arugute nga ga Yekova ya;

10naya fu ababiapai wẽ, “Ka oni bi nga pai ya;” na fu anebi, “Ka oni gúmba nga gu pai ru aru fu rani ya; ono oni gúmba kina wene fugo fu rani, oni gúmba pa nangaahe,

11oni gúari ti gene, oni aria ti roni ku bani ngba gene, ka ani gí nga pa ga Yisaraere Ziazia Ko ngbaroni berewe ya.”

12Si du ga Yisaraere Ziazia Ko naya, “Bambiko oni gindiga pa gi pai re, ki nikida kuti rungosiro na gbegberẽ ringi, ki songodi tironi kuti ni;

13si du gi irairapai adu fu roni re wa gu sarisari rago nikati ati, ukua ti vuro gbanga ngapa bakporo, tigoho adú ni tunguotunguo pai rure;

14pa kuadi he du wa pa kuadi ga bameakambu akambu nakuadi akuadi rukutu zanga nunga, si du ka i abi nga wiri ngbadi dagba ha ka i rogo kingiri we ku rogo ho ba we yo ya, watadu ka tu ime na ni due ime yo a ya.”

15Bambiko ya Gbia MBORI wẽ, nga ga Yisaraere Ziazia Ko, “Mbiko pa karaga oni tironi na mbiko ongoda si oni ka bata ti ni; rogo du zezeredi na du zukazuka si oni ka du ti ni na ome.” Ono oni akpi nga nyemu he te,

16ono oni aya, “Ai! Bambiko ani aora ri afarasi,” si du oni ka ora ti ni; oni aya a, “Ani aóra ri ipiipi afarasi,” si du agu yo nado fuo roni ka ipisa tiyo ti ni.

17Aboro 1,000 aóra be fugo boro sa, oni aóra be fugo aboro bisue, daho oni ka nye ni wa kina ngua yugohe ri bagangara yo, wa gu yuguyuguhe du ri bagangara yo.

18Si du Yekova nasunguda roni ti ni ka du na undahe fu roni; si du du ko ti ni ni kiisikiisi pako ka ina pai fu roni. Bambiko Yekova nga Mbori ruru sarangbanga; maku du fu agu yo dunduko nasunguda ko.

19Ako aboro Siona naraka Yerusarema yo: ni rengo oni akpára nga kpe berewe te Ko adú na undahe fu roni ni rengo kuti paa gaoni kpe; ho ko ka gia ha ni, ko akaraga pai fu roni.

20Ono ka Gbia vura fu riahe fu roni nga ga gberãngbi na gu ime nga ga rungo vurũ, i aóka nga gaoni Bayugupai berewe te, ono bangironi abi gaoni Bayugupai abi.

21Turoni agia pai agia ku gii roni yo, naya, “Gene du re, oni ndu ngba ha,” ho ka oni sa tironi ni ku kumbabe, watadu ho ka oni sa tironi ni ku garebe.

22Oni agbarasa gu dadidadi he du ti gaoni sese kpiahe nga ga feda na gu du ti gaoni zaragasizaragasi kpiahe nga ga dahabu. Oni abá ha aba ku sa yo wa bibinko he; oni ayá fu he, “Oni gúari erẽ!”

23Ko nikafu mai tipa gaoni tunga ahe nga gu oni narú he ku sende yo, na zende ahe nga ga sende, si aida ki zu kpaima. Ni gu rago re gaoni zogozogo anya arika rogo bakere abanambu;

24abaabagara a wo, na gu paranga abaadongi nasopa bino ami ari wene riahe du na tikpo rogo ho nga gu i aigita ha rogo úigitahe na rogo úpehe a.

25Ime afú ti gege gene ime ri gbanga abaagangara yo dunduko, na ri bagbanga gangara yo dunduko, rago bakere imo aboro, ho tumbatumba kirikiri agbata ka tiwa ni.

26Ku ri gere ni kina gu rago Yekova ka voda agu aoro ni nga ga gako aboro, ka wiisa bangiri gayo aoro ko ahogi yo na ni, ima diwi adu wa ima uru, ima uru ki du wa ka si kĩ bara saba, wa gu imarago nga ga uru saba.

27Mo ngére, rimo Yekova naye tuturu, nagbi be gako zinga, na rogo nanaga ndute ngime nagundo; ngbako hi be imisiri ngbaduse, mirãko wa kina gu we narita ahe;

28ongako wa kina gu wiridi nafu buza da kina ku ngba gose; ka igita arikaaboro ti kangirã gbarasapai, ka maa gu giri rugangba ku biringangba aboro yo nairasi yo.

29Oni abi bia wa ku yuru ho i namanga ziazia pumbo ni; ki du pusiapusia kpotoroni yo, wa ho boro nandu ni na naíiri ka ye sa gu bagangara nga ga Yekova, sa gu Mbia nga ga Yisaraere.

30Ono Yekova arúga fugoko du na taarimo ya i gi he, ki bi waĩbeko ata boro, rogo gu imisiri ngbaduse nga ga gako zinga na rogo gu miráwe narita ahe, na rogo gu mamu uru nasumba asumba na bayuge na morogumba.

31Mbiko gu fugo nga ga Yekova aAsuro akio be he, ho ko ka ta yo ni ni gako ngbondo

32Gu ta boro na ngau kpata dunduko, nga gu Yekova ka ta yo na ni, si adú tii woro agaza na akundi; ko aso vura kuti yo ki tumba beko sa kpata.

33Bambiko i ambakadi ba Tofeta bakuru yo; ii, tipa bakindo si ima rengba, i ge he dudungura ni bakere he, we na nyake du ni dungu he; onga Yekova natiga ha wa su baruti.

← Chapter 29 Jump to: Chapter 31 →