Isaiah 48

Zande

← Chapter 47 Jump to: Chapter 49 →

1Ako ngbatunga Yakoba, oni gi gere, nga agu roni i ayambu roni ti rimo Yisaraere, nakuru rogo agu aime yo nga ga Yuda; nazunga he ti rimo Yekova, ki pe pa gu Mbori nga ga aYisaraere ko, ono rogo rengo yo na rurupai te

2I nayamba tiyo ti rimo kparakpara ziazia bakporo, ki kida kuti ga Yisaraere Mbori; rimoko nga Yekova nga ga arimbasa ko.

3“Mi Yekova taki pande pa agu apai naadu mbata tona bakuru yo, si akuru ngbare yo mi ayugu pa ha; mi ki mangi he ni tunguotunguo ho si ki mangi wo

4Bambiko mi ini he ya boro nyakari nga mo goro wa gbaga marã, kpanga kpakpuro kĩ wa singi

5Si du mi ataki pande paha foro bakuru yo, mbata ragoho mkada mi ayugu he foro, mo ka ya, ‘Gi kpiahe namangi he, na gi sese kpiahe na gi zaragasizaragasi kpiahe narugu he.’

6“Mo agi he; awere mo bi agi apai dunduko re; na oni, oni atáka nga pande paha te? Mi yugu vovo apai tona ti gi rago re mo gi he, nga okooko apai nga gu mo ata aina nga paha mbata ya.

7I namanga ha kina awere, ono bakuru yo te; ono mbata fu gi uru re mo agia nga paha te, mo ka ya, ‘Oni ngere, mi aini he.’

8Mo agia nga ha mbata te, mo aina nga paha mbata a te, turo aza nga ni gu rago bakuru yo te. Bambiko mi aini he ya mo amánga pai ni biriki ki susi, i ki yambu ro nga boro tindika tona ti kina rago batika ro.

9“Ono bambiko mbiko rimore mi ambu gi zinga ti ni, mbiko gi tambuahe mi ambu he foro ya mi adia nga ro ku sa yo te

10Mo ngére, mi furusi ro, ono wa feda te; mi asodi ro ku gbigiwi yo nga ga gberãngbi.

11Mbiko kina gi pai, bambiko kina gi pai, mi namanga ha amanga, mbiko waĩ ka i gbarasi rimore? Mi afú nga gi taarimo fu kura boro te.

12“Ako Yakoha, mo dege turo kono du mi ni, na Yisaraere yambu mi ro! Mi nga ko, mi nga bambata ko, mi nga yangara ko a.

13Bere namoi mburu kpotosende, kumbabere naazaraga angbangbaturũ; ho mi ayambu he ni, si naru ku ari wa sa.

14“Oni dúngura tironi, oni dunduko ka gia pai! Gini boro du dagba yo yo nataki pande pa agi apai re? Mi Yekova nakpi nyemu ni; mi amanga gu pai mi akpi nyemu he kuti Babera, ono bere adú kuti aKasado

15Mi, kina re a, gumba ha, mi yambu ko, mi ye na ko, ko amanga gako pai si ki u au.

16Oni yé mbembedi kono du mi ni, oni gi gere; ho rago aenge ni mi agumba nga pai ni gbugbu he te, ti gu rago si adu mi adu kina yo.” Awere Gbia MBORI kedi re na gako Toro.

17Ya Yekova wẽ, nga gu Ko natumo ro, nga ga Yisaraere Ziazia Ko; “Mi nga Yekova ga Mbori, nayugo pai foro sa u, nga gu ko nangbe ku mbata yo foro ngba gu gene mo ka ndu ngba ha.

18Ako! ka mo adege turo sa gimi arugute! Si du ka ga zereda adu ti ni wa di, na ga rurupai wa ngiri baime;

19ngbatungaro ki nge a wa ngume; awiro ki nge wa kina rukutu ngume; ka i adia nga rimoro ku sa yo ki gbarasi yo bara bangire wa sa ya.”

20Oni gúari Babera yo, oni óro Kasada yo, oni táki pande pa ha ki ngbiko ni ngbarago, oni gúmba pa ha, ki kedi pa ha dati digida kpotosende yo a; oni yá, “Yekova tumo gako moyambu nga Yakoba!”

21Gomoro ime amanga nga yo ho ko angbe ni ku mbata yo fu yo rogo angbi ngume te; ko amangi aime si nikuru ti ambia tipa yo; ko asari mbia a, aime ki gbadi ti ni

22“Zereda ho te fu gbegberẽ aboro,” wo poi Yekova.

← Chapter 47 Jump to: Chapter 49 →