Isaiah 58

Zande

← Chapter 57 Jump to: Chapter 59 →

1Yekova aya: “Oni pói ku ari, ka oni mbu nga ha ya, oni tumba fugoroni ku ari wa nambongo ki taki pande pa ga gimi aboro samungu fu yo, na pa ga ngbatunga Yakoba ingaapai fu yo

2Ono i nagbata re na uru, rago ki ngba ti yo ka ina gimi apai, wa gu rikaaboro naamanga rurupai ka i ambu nga gu sarangbanga nga ga gayo Mbori ya; i nasana re tipa ruru rugapai, rago angba ti yo ka mbeda na Mbori

3I naya, ‘Tipagine ani nagina riahe ti ni ka mo abi nga ha ya? Tipagine ani arungosi tororam ti ni, ka mo ama nga pa ha ya?’ Oni ngére, rago gaoni uru gina riahe oni nagbata kina gaoni pa ngbarago, ki nirungosi gaoni aborosunge dunduko.

4Oni ngére, oni nagina riahe tipa kina pa kpata na tikangu na ka yawa boro ni mangbondo gbegberẽpai. Wa oni nagina riahe rogo gi uru re i agia nga fugoroni ari yo mbiko ho te.

5Gure nga gu ngbatunga gina riahe sia mi he nga uru rungosi boro toroni ti ni? si nga ni tumusa ku sende wa bisimo, ka gbaraga mbuzaroko ku tii ni yo na kuke a? Oni aya ti gere wẽ gina riahe nga ha, nga gu uru ngba ti re nga Yekova?

6“A nga gere nga gu gina riahe mi asia ha te? nga ka zogarasi agiri gbegberẽpai, ka zaka azogbo gonga, ka ida ha fu zizi aboro i kuru ni aramriyo, ki kuadi agonga dunduko?

7A nga si nga ka gama ga riahe fu aboro gomoro te? na ka rimisa agu airarungo ku dimo kpuroni yo i aba yo ku sa yo; ho oni nibi boro ni ni kundiri ni, oni ki ukadi ni ni roko, te? ka oni aoka nga tironi ti agumeroni ya?

8Si du gaoni imarago ka kura ti ni wa girarago, pa husa roni ki kuru ni ngarã; gaoni rurupai ki ngbe ku mbata yo fu roni, gu taarimo nga ga Yekova ki du fuo roni

9Si du oni ayamba he, mi Yekova akáraga pai; oni akpára, mi ayá, Mi du re. “Ka oni mbu pa maa gonga dagba roni, na pa taã wirmzagaroni, na pa fura ni gbegberẽhe,

10ka oni fu gaoni riahe fu aboro gomoro, ki mbisi rungosirungosi aboro, si gaoni imarago ka ahasa rago ti ni rogo bitimo gaoni nduunduu bitimo ki ha wa bebere uru

11Mi angbé ku mbata yo fu roni kindi, ki mmbisi tororoni rago ugure, ki mnyakasi amemeroni, oni adú wa kina tuditudi ati, wa gugaabi aime, nga gu aimehe auguda nga ya,

12Angbatungaroni adúa gaoni kuru aba nagberẽ; oni anyakasa tunga arikaaboro ni dungu yo; i ayá ti roni bambakadi gu pai nakpa, abakaraga agene i niraki ti ni.

13“Ka oni sa tironi rago sabiti ti manga kina pa gu pai ngba ti roni ti gi kparakpara ziazia uru, ki niya ti rago sabiti ngba ha angba gbe, nga gi ziazia uru du ni irisiirisi he; ki niirisi he, ka oni amanga nga gaoni apai ya, ka oni agbata nga kina gu pai ngba ti roni a ya, watadu gumba kina pa gaoni apai a ya;

14si du rago ka ngba ti ni ti roni mbiko re nga Yekova, mi ki idi he fu roni oni nioro ri gu batumbatumba arago nga ga kpotosende; mi ki mrigi roni na agu ahe nga ga Yakoba nga baroni, bambiko mi Yekova gumba ha wo.”

← Chapter 57 Jump to: Chapter 59 →