Isaiah 41

Zande

← Chapter 40 Jump to: Chapter 42 →

1Ako aringara ti ngba gango baime yo oni óngo kii bara bangire; rikaaboro úngasi omeyo berewe; i yé mbembedi, i ki fura tie; ani mongo yé mbembedi sa sarangbanga.

2Da nawo ti boro uroyo nga gu ni diabese adu fu ni na uru dú? Ko nakusa arikaaboro ku bara bangiriko, ya ko nisimbi abakindo ku tii nduko yo; ko nasa yo wa nvutu na gako basape, i ki du wa yaya nganziri morú be gako mboto.

3Ko nado fuo yo, ki susi yo zezeredi, ngba gu gene ko andu nga mbata ngba ha ya

4Da namangi gere ki nyasi he, nayambu arikaaboro tona ho rago aenge ni? Mi nga Yekova, nga bambata ko, mi du nga yangara ko; mi nga Ko.

5Aringara ti ngba gango baime yo abi he ki nigunde, digida kpotosende ki nikio; i ye mbembedi ki da

6I aunda akurayo ni ba sa sa, aboro ni ba sa sa ki ya fu awirinayo, “Oni ngarãsi tironi!”

7Si du basekengua ki ningarãsi pangu dahabu, gu ni nazerengesa kpoto mará ni bande ni ki ningarãsi gu ni namera mará ri nabande, ki nigumba pa zungaha ya, “Ngba ha angba”; i ki banga ha na anen ku ba ha ya ka si wo nga ya.

8Ono mo, Yisaraere, gi moyambu, nga Yakoba, gu ko mi asia ko, nga ngbatunga Abarayama nangia wene badiare;

9mo mi adi ro ti digida kpotosende, ki yambu ro ti adurugaduruga ha yo, ki ya foro, “Mo nga gi moyambu, mi asia ro mi ambu nga ro te”;

10ka mo gunde nga ya, mbiko mi du na mo, ka mo kio nga ya, mbiko mi nga ga Mbori; mi anyákasa ro, mi aúnda ro, mi asongoda ro ni kumbabere du na gi rurupai.

11Mo ngére, agu yo dunduko zingi kuti ro adú na zee ki mungo; agu yo nati kangu na mo i adú nga ni he te i akpíka akpika

12Mo agbáta agu yo ti kangu na mo, ono mo abi nga yo te; agu yo naso vura kuti ro adú nga ni he wa sa te.

13Bambiko mi nga Yekova nga ga Mbori, nazada kumbabero; mi du naya foro, “Ka mo gúnde nga ya, mi aúnda ro.”

14Ka mo gúnde nga ya, mo Yakoba nga gbiro, na oni nga akumba du Yisaraere yo! Mi aúnda roni, wo poi Yekova; nga gu ko natumo roni nga ga ga Yisaraere Ziazia Ko

15Oni ngére, mi asá roni wa vovo ti ti mará taahe du na arindihe; oni akuadi abaagangara ki taki he rukutu, oni asá agangara wa umu he;

16oni apéda ha yuge ki ya na ni ku sa yo, gugugu yuge agbandaka ha. Oni angí rogo Yekova yo; oni asámbua tironi rogo ga Yisaraere Ziazia Ko.

17Ho rungorungo boro na irazingohe agbata ime ni ka si adu nga ya, goróyo yo ki ugu be gomoro ime, mi nga Yekova akaraga pai fu yo, mi nga Mbori nga ga Yisaraere ko mi ambú nga yo te

18Mi azá adi ri kungba gbangagba nga arago yo, na agugaabi rogo angboongboorago; mi asá ngbakungba ni munga ime, ugu sende ni ime agugaabi

19Mi arúka kedara rogo ngbakungba, na agu angua du wa mbegure, na adasi, na aeraya; mi amáa kupuresa ku rogo ngbi ngume, na ngua wa zawa na gu kura ha du wa kupuresa wa sa;

20ya aboro bi he, ki ini he, ki berẽ pa ha ki mongo rugu tiyo na ni, ya be Yekova nimangi gere, ga Yisaraere Ziazia Ko afu he.

21Oni kúsi gaoni apai, wo poi Yekova; oni ringbisi gaoni nyanyaki nduapai, wo poi Bakindo nga ga Yakoba ko

22I ríngbisi pai ni ba sa sa, ki taki pande pa agu apai fu rani nikamanga. Oni táki pande pa gu bambata apai, gine nadu, ya ani berẽ pa ha, ka ina gaha yangara apai; watadu oni yugu gu pai fu rani nikaye.

23Oni táki pande pa agu apai fu rani nikaye ku mbata yo, ani ini ti ni ya oni nga ambori; oni mángi wenepai, watadu oni mangi gbegberẽ pai, ya ani kio, ki mongo bi he

24Oni ngére, he nga oni te, gaoni sunge nga kina pa kungba pai gbua; kere gbegberẽ boro nga gu ni nasia roni.

25Mi awo ti boro nodiyo, ni ima ye, yo uru nakura ni, ni ayamba rimore; ni asímba abazogo wa i nasi pere, wa agu abameakoro nasimba pere

26Da nataki pande pa ha ho rago aenge ni, ya ani ini he? na mbata fu gure, ya ani ya, “Ko nga ruru boro”? Boro adu nga ho sa napeke paha te, boro adu nga ho sa nayugu paha a te, boro adu nga ho sa nagi gaoni apai a te

27Mi agumba ha mbata fu Siona, mo bí yo, mo bi yo, mi kedi boro fu Yerusarema nga gu ni ye na wene pangbanga

28Ho mi angere ni ka boro adu nga ya; dagba yo yo barugupai yo wa sa te, nga gu ni ho mi ka sana he ni, nikarengba ka karaga pai fere.

29Oni ngére, i dunduko gayo mangapai nga kina ruka na kungbapai gbua; gayo zaragasizaragasi kpiahe du wa kina yuge na kungba he.

← Chapter 40 Jump to: Chapter 42 →