Isaiah 66

Zande

← Chapter 65 Jump to:

1Ya Yekova wẽ: “Ngbangbaturũ nga gi mbatabakindo kpotosende nga gbada ndure; gini ngbatunga bambu oni ka dua ha fere? gi baongoda nikangia gine?

2Bambiko kina bere namangi agi ahe re dunduko, si du agi ahe re ka du ti ni re ni gimi, wo poi Yekova.” Ono mi angéra koyo du gi ni ni re, du toroni ni rungorungo ho na ni imisiripai, nakio be gi pai.

3“Gu ni naimo babagara ni wa kina gu ni naimo boro; gu ni natumo na wiri kandoro, ni wa kina gu ni nakita gorõ ango; gu ni nafu gamunihe nga ga riahe ni wa gu ni natumo na kure mukuru; gu ni nazo wene fuõngua ni tingidapai ni wa gu ni nafu maku fu kpiahe. Agi yo re asia gayo apai tigayo, rago nangba ti toroyo mbiko gayo kere gbegberẽ asino;

4mi tigimi asia fudifudiapai tipa kina yo, mi ki ye na kina gu pai i agunde be he k u ri yo; bambiko ho mi ayambu he ni, boro sa akaraga nga pai fere te, ho mi afu ni i adega nga tuyo a te; ono i amangi gu pai gberẽ agberã bangire, ki sia gu pai rago angba nga ti re be he ya.”

5Oni gí ga Yekova pai, agu roni nakio be gako pai: “Agu awirinaroni nasoga roni nabafa roni ku zegi yo tipa rimore, i ya, ‘I táasi rimo Yekova, ya ani bi gaoni ngbarago’; ono i nga agu yo mi ka ba zee ku ri yo.

6“Oni gí nga, fugo gbarakagbaraka pai ye bakporo yo! Fugo ye yekaru yo! Nga fugo Yekova, nafu mosoro rengbe fu avurako!

7“Mbata de nikaima ri abatika; mbata fu tona ima vunga ri abatika kumbagude.

8Da nagi ngbatunga agi apai re? Da nabi ngbatunga agi apai re? Ka i vungu ringara ti kina uru sa? Ka i vungu rikaaboro rogo ngbutuko rago? Bambiko ho Siona atona ka ima ni si avungu awirihe.

9Ka mi ye na he sa vunga ka mi amanga nga ha si batika ya? wo poi Yekova; wa du mi nga gu ko namanga ha si vungu, mi akísa rukumbu? wo poi gaoni Mbori.

10“Oni ngí na Yerusarema, oni dú pusiapusia mbiko ho, agu roni dunduko nakpi nyemu he; oni ngí ni ngbarago na ni, agu roni dunduko nakpara ni nunga tipa ha;

11ya oni ha mamuhe ki mbiki be gaha wasa; oni ki mbiri mai ki du na ngbarago mbiko gaha taarimo du kpaima.”

12Bambiko ya Yekova wẽ: “Oni ngére, mi akiisa zereda fu he wa di, na gu taarimo nga ga arikaaboro wa fufu wiridi; si oni ka ha ha, i atinda roni pa dimose, i atíkita roni ri kpakpu mboso.

13Wa gu boro nani angárãsa ni, wo mi ka angárãsa roni; i angárãsa roni Yerusarema yo.

14Oni abí he, kpotoroni yo ki ningi angi; amemeroni ki nisono wa kia nvuo; i aina ha ya be Yekova du koyo du gako amoyambu ni, ko du na ima ngbaduse kuti avurako.

15“Bambiko oni ngére, Yekova ayé rogo we yo, gako angbagidavura adú wa bakamikami yuge, ko azínga ni ngariangaria zinga, na gako zahe adú wa mirãwe.

16Bambiko Yekova asara ngbanga ni we fu aboro du na ni gako basape a; agu yo Yekova ka imo yo i adú ni dungu yo.

17“Agu yo nakpara tiyo ziazia, ki girisi tiyo ka ndu ku aati yo, gu ni fuo kura ni, niri pasio mukuru, na anyakorokpa, na kuri, payo adiga adiga wa sa, wo poi Yekova.

18“Bambiko mi ini gayo mangaapai na gayo aberã, ragoho da mi naye ka dungura arikaaboro na afugoyo du; i ayé ki bi gi taarimo,

19mi amáa yuguyuguhe dagba yo. Mi akéda agu yo nabati dagba yo yo fu arikaaboro, ku Tarusisa yo, ku Pura yo, na ku Ruda yo, nga agu yo nadarã mboto, ku Tubara yo na ku Yavana yo, na sa agu aringara du ti ngba gango baime turú aturã gbe, nga gu naagia nga pa gi worimo ya, abi nga gi taarimo a ya; i atáka pande pa gi taarimo ku dagba arikaaboro.

20I ayé na awirinaroni dunduko yo du arikaaboro ni du wa gamunihe fu Yekova ku ri gi kparakpara ziazia bagangara nga Yerusarema, i ayé ri afarasi, na rogo ngbagidavura, na ri akpanga, na ri abaadongi, na ri paranga akameri, wo poi Yekova, wa awiri Yisaraere aye na gayo gamunihe rogo gigiri aúsunge ku rogo ga Yekova bambu yo.

21Ono mi aróga agu yo dagba yo yo tipa sunge boromotumo na ni aRevi, wo poi Yekova.

22“Bambiko wa vovo angbangba turu na vovo kpotosende nga gu mi ka manga ha, nikanye anye ku bara bangire kindi, wo poi Yekova; wo angbatungaroni na rimoroni nikanye anye a.

23Si ayé ka du wa gere ya ti fogo diwi dati kura fogo diwi, na ti rago sabiti na dati kura rago sabiti, aboro dunduko ayé ka fu irisa bara bangire, wo poi Yekova.

24“Ono i akúra ka ngera ku ri kangba agu aboro naasa mungu kuti re; mbiko gayo agbiirẽ akpi nga te, gayo we abísa nga a te, i adú ni kere gbegberẽ he bangiri aboro dú.”

← Chapter 65 Jump to: