Isaiah 44

Zande

← Chapter 43 Jump to: Chapter 45 →

1“Ako Yakoba gi moyambu, mo gi pai awere, Yisaraere nga gu ko sia mi ko!

2Ya Yekova wẽ nga gu ko namangi ro, nambakadi ro ku rukumbu yo nga gu ko nikaunda ro: Ako Yakoba gi moyambu, ka mo gúnde nga ya, mo Yesuruna nga gu ko sia mi ko.

3Bambiko mi aúka ime ku ringara gomoro ime, na mai kpaima ku ri ugusende; mi aúka Torore ku ri ngbatungaro, ki fu gi maku fu atitaro.

4I akúra wa nvuo rogo ime, wa angua sarizi pangba adi.

5Gu boro ayá, ‘Mi nga ga Yekova ni,’ gu kura ni ki yambu tini ni rimo Yakoba, gu kura ni ki ke pai ti beni nga, ‘Ga Yekova ni,’ ki yambu kura rimoni nga Yisaraere.”

6Ya Yekova wẽ, nga Bakmdo Yisaraere nga gu Ko natumo ko, nga Yekova nga ga arimbasa ko: “Mi nga bambata ko, mi nga yangara ko; mbori ho fuo re berewe te

7Ono da du wa mi? Ni gumba ha, ki táki pande pa ha ki rugu he ku bara bangire. Da naringbisi agu apai bakuru yo nikaye? I táki pande pa agu apai fu rani ka aye a.

8Ka oni gúnde nga ya, ka oni kio nga a ya: mi ataka nga pande pa ha fu roni bakuru yo ki yugu he te? Oni nga gimi adezire! Kura Mbori ho berewe fuo re? Ai! Mbia du nga ho te; mi ama nga pa gu ni sa te.”

9Agu yo nambakada kpiahe i dunduko nga kina kungba he, agu ahe ngba bangiriyo i au nga mbiko ho te; gayo adezire abi nga he te i aina nga pai a te, ya i ba zee ku ri yo.

10Da nambakadi mbori watadu mbakada zaragasizaragasi kpiahe, nga gu he boro ka au nga mbiko ho ya?

11Mo ngere, akurani dunduko i adu na zee, aborosunge i nga kina aboro; i amongo dungura tiyo dunduko, i rú ku ari, i agúnde, i amongo du na zee.

12Pangu nata ha ki mangi sunge he ri kingiriwe; ki mbakadi he na abande, ki nita ha na nyanyaki beko; ko na gomoro, omeko ki bati, ko ambira nga ime te, he ma ko.

13Basekengua nagba gene, ko nagbaka ha na wiringua waraga; ko nase he na marã kpengua, ko nagbaka ha ni kirikiri he; ki se kpia ha wa kpia boro, wa du pa wene ngbanya boro, si niraki dimo kpuko yo.

14Ko dewe angua kedara ku sande, watadu ko sia ngua kupuresa na gero ki mbu he dagba angua bire yo; si nyakadi fu ko; ko narú gu ngua nga oreni mai nasonosa ha.

15Si du si ki du ni nyake tipa boro; ni nadia gu bete paha ki faadi he; ni naginda we ki zo kpokuta ngba ha; ni nase kpia mbori rogo gu ki niirisi he, ni namanga ha ni sese kpiahe ki ti sande barangba ha.

16Ni ki zo gu bete paha ni we; ki ri pasio pati gu, ni ki zo pasio ngba gu ki mbi; ni ki faadi we, ki ya “Eke, kpotore foi, mi bi we!”

17Gu yangara ha nye ni ki mangi mbori rogo ho, nga kina gani kpiahe; ni ki ti sande barangba ha ka irisa ha; ki nikpari kpe fu he ki niya, “Mo bátasi re, mbiko mo nga gi mbori!”

18I aina nga pai te, i aberã nga pai a te; bambiko ko kisi bangiriyo, ya ka i rengbe nga na bi he ya, na gayo berã, ya ka i rengbe nga na ruga tiyo na pai ya.

19A nga boro sa tingidi pai te, inahe na rugatinapai si ho a te, ka ni ya, “Mi zo bete he ku we yo, mi zo kpokuta a ri kingirihe, mi zo pasio ki ri he; mi sa gu yangara ha ni gbegberẽ kere sino he? Mi ti sande ka irisa rigo ngua?”

20Ni nari kina akuke; gu berã nga ga nangahe sa ni ku bani, ni arengba nga na batasa tini te, watadu ya nga, “Zire rogo kumbabere te?”

21Ako Yakoba, mo tingidi pa agi apai re; na Yisaraere, bambiko mo nga gi moyambu; mi mbakadi ro, mo nga gi moyambu; Ako Yisaraere, bangire ago nga ti ro te.

22Mi gbandaka ga samungu wa nananga dubo, na gamo ingaapai wa kina nduro; mo káraga tiro kono du mi ni, bambiko mi tumo roni.

23Ako angbangbaturũ, oni bi bia, bambiko Yekova mangi he; Ako oni dudungura apapara kpotosende yo; oni ngbiko; Ako oni nga abaagangara, oni ríkita ka bi bia na oni nga bire, na agu angua dunduko du rogo ho yo! Bambiko Yekova tumo Yakoba, ko adú ni taasitaasi ko rogo Yisaraere yo.

24Ya Yekova wẽ, nga gu Ko natumo ro, nga gu ko nambakadi ro ku rukumbu yo: “Mi nga Yekova, namangi ahe dũ, nazaraga angbangbaturũ ni sa re, nakparaka kpotosende ku tururú rago yo ― Da naadu na mi?―

25mi nga gu ko nazangasi gu ngbanga nga ga airazire, nasa airasoroka ni airapupo; nasa tatamana aboro ku sa yo, ki sa gayo inahe ni mungo;

26nanyakasa gu fugo nga ga gako moyambu, ki nimangi gu rugapai nga ga gako abamokedi; naya tipa Yerusarema, ‘Aboro aráka rogo ho,’ na tipa agu abaakporo du Yuda yo, ‘I adúdua ha berewe, mi ambákada gaha kungba aba berewe’;

27mi du naya fu ngirimo, ‘Mo úgudi, mi aúgudisa gamo adi dũ’;

28nagumba pai tipa Kurese, ‘Ko nga gi babanda akandoro, ko adígisa pa gu pai mi akpi nyemu he dunduko’; niya tipa Yerusarema a, ‘I adúa ha adua,’ na tipa yekaru, ‘I amáa mburu he amaa.’ ”

← Chapter 43 Jump to: Chapter 45 →