Isaiah 37

Zande

← Chapter 36 Jump to: Chapter 38 →

1Ho Bakindo Izikiya agi he ni, ko ki sipi gako aroko, ki ukadi tiko ni mbuzaroko, ki ndu ku tii ga Yekova bambu yo.

2Ko ki kedi Eriyakima nadu ku ri aborokporo koyo du Yesaya ni nangia nebi nangia wiri Amosa, na Sebena nangia bakeapai, na abaakumba aboromotumo, ni ukadiukadi tiyo ni mbuzaroko.

3I ki ya fu ko, “Ya Izikiya wẽ, ‘Gi uru re nga uru fudifudipai, na uru zapai, na uru gbarasarimo; bambiko rago batika agude du, ono ome ho ka batika yo te.

4Ka ngia Yekova nga ga Mbori agia agu apai nga ga Rabasake, nga gu ko bairako akedi ko nga bakindo aAsuro ko gbarasi rimo unga Mbori, agu apai Yekova agi he nga ga Mbori, si ngia ko azá ha; si du mo kpári kpe tipa gu yangara aboro nanye.’”

5Si du ga Bakindo Izikiya amoyambu aye ti ni koyo du Yesaya ni,

6Yesaya ki ya fu yo, “Oni ayá fu bairaroni, ‘Ya Yekova wẽ: Ka mo gúnde nga be agu apai gi mo ho nga gu ga bakindo aAsuro amoyambu agberã ngbayo yo na ni fere ya.

7Mo ngere, mi amáa toro ku rogo ko yo, ko agia mboimboi pai, ko akáraga tiko kina ku rogo gako ringara; mi afu ko ko ti ngba basape kina rogo gako ringara.’ ”

8Si du Rabasake akaraga tiko ti ni, ki da bi bakindo aAsuro ko niso vura kuti Ribina; bambiko ko agi he ya bakindo guari Rakisa yo.

9Bakindo ki gi pai tipa Tiraka nangia bakindo aEtiopia naya, “Ko ye ka so vura kuti ro.” Ho ko agi he ni ko ki kedi asunge koyo du Izikiya ni, niya,

10“Oni gúmba pai fu Izikiya nga bakindo aYudo, ki ya: ‘Ka mo ídi nga ha fu ga Mbori ko nángi ro ya, nga gu ko mo nakida kuti ko naaya i afu nga Yerusarema ku be bakindo aAsuro te.

11Mo ngére, mo agi pa agu apai abakindo aAsuro anamanga fu aringara dunduko, wa i agbarasi he kpakaya. Waĩ mo ka bata?

12Agu angbatunga rikaaboro atitare agbarasi yo gayo ambo ri abatasi yo nga Gozana, na Arana, na Rezefe, na awiri Edene naadu Terasara yo?

13Wari du bakindo Amata ni? na bakindo Arupada, na agu abakindo nga ga agu abaakporo nga Sefarewayima, na Ena na Ivo a?’”

14Izikiya ki di gu waraga re be asunge, ki gedi he; Izikiya ki ndu ku tii ga Yekova bambu yo, ki zara ha ku bara bangiri Yekova.

15Izikiya ki kpari fu Yekova, ki ya:

16“Ako Yekova nga ga arimbasa ko, ga aYisaraere Mbori, ninasunga ri akeruba, mo nga Mbori, kina mo sa, du ri angbi dunduko nga ga kpotosende; mo namangi ngbangbaturũ na kpotosende a.

17Ako Yekova mo yé turo, ki gi pai; Ako Yekova, mo zá bangiro ki bi pai; mo gí agu apai dunduko Saneriba akedi he ka gbarasa rimo unga Mbori.

18Ako Yekova, rengo nga ha, ya abakindo aAsuro anabafa arikaaboro dunduko na gayo aringara,

19ki nibafu gayo ambori ku we yo; mbiko si angia nga ambori te, ono kina sabe aboro nadu, nga ngua na mbia; si du i agbarasi yo ti ni.

20Ako Yekova gaani Mbori, si du awere, mo bátasi rani be ko tie, ya angbi dunduko nga ga kpotosende ini he ya kina ro sa nga Yekova.”

21Yesaya nangia wiri Amosa ki kedi sunge koyo du Izikiya ni, niya, “Ya Yekova nga ga aYisaraere Mbori wẽ: Wa kpari mo fere tipa Saneriba bakindo aAsuro,

22gere nga pai gumba Yekova tipa ko: Agu aboro nga aboro Siona i payasi ro ― ki sira ro ni mongo: na agu yo nga aboro Yerusarema― i pikipo riyo ti ro giiro yo.

23“ ‘Da nga gu ni mo agbarasi rimoni ki gberẽ ngbaro yo fu ni? Mo atuka fugo ni ngbaro kuti da nizara bangiro ni enda? Kina kuti ga Yisaraere Ziazia Ko!

24Mo agbarasi rimo Gbia ku ngba gamo amoyambu, mo aya, Mi naye na rimbasa gimi angbagidavura ku ri gbangagbanga abaagangara yo, sa gu tuturu papara rago kina boro bebere Rebanona yo; mi adewe gaha gbangagbanga akedara, na gaha bawene siasia angua mi nga kupuresa a, mi arimi da ku rogo gaha bangbadarago du tuturu, nga bire gaha idiidi zuzu ahe.

25Mi ageteke adue ime ki mbiri ime, ari augudisi adi Ezipeta yo dunduko ni kina kpandure.

26“ ‘Mo nga bakindo aAsuro, mo agia nga ha wa mi amangi he bakuru yo te? Gu pai mi aberẽ pa manga ha ti gu rago nadu bakuru yo kina ha mi namanga wa du rago re, nga mo ka gbarasa agu abaakporo ngapa, si du ni baguguda gbarasigbarasi ahe,

27ome araki yo du ni umba ha, i yungura, zee ki mangi yo, i ki du wa rũkurũku ahe ati yo wa fogo kpepasio, wa nvuo ri abambu yo, wa zende ahe niwara mbata fu nyaka ha.

28“ ‘Ono mi ini pa ga sunga na pa ga kura ku zegi yo na pa ga rima ku dimo yo a, na pa ga zinga kuti re.

29Bambiko wa du mo na zinga kuti re, na pa ga kiisa pa tiro ye da ku ture yo, si du mi ka maa gi kombe ti ni ku õro yo na gi marã rugangba ku ngbaro yo, mi akáraga ro kina ngba gu gene mo aye ngba ha.’

30“Gere adú ni yuguyugupai foro: oni ari kina futuhe ni gi garã re, na ti ue garã gu nikakura ti fuo ho; ti biata garã oni arú he ki ke he, ki ruku bakakue aati yo, ki niri zuzuhe.

31Gu yangara ngbatunga aYudo nabati, tarãyo aríma berewe ku sende yo, si ki nisono ku ari ki nizuku;

32bambiko Yerusarema yo yangara yo ka kura ni, agu yo bati i akúra Bagangara Siona yo. Gu kenapai nga ga Yekova nga ga arimbasa ko nikamanga gere.

33“Si du were poi Yekova tipa bakindo aAsuro: Ko ayé nga ku rogo gi bakporo te re, ko abá nga guanza koyo a te, ko ayé nga sa ni na vurakube te, watadu ba kanda kuti ni a te.

34Ngba gu gene ko aye ni, ko akáraga tiko kina ngba ha, ko ayé nga ku rogo gi bakporo te re, wo poi Yekova.

35Bambiko mi abánda gi bakporo re ka batasa ha, mbiko kina gimi pai na mbiko ga gi moyambu pai nga Dawidi.”

36Ga Yekova maraika ki kuru, ki imi aAsuro rogo gayo bataya wa aboro 185,000; ho aboro azingi ni ngbatutu wiso, oni ngére, agu yo re ki du ni kina ku kangba aboro dú.

37Si du Saneriba bakindo aAsuro aguari ti ni ki ga ki niraki Nineve yo.

38Si ki ta du wa gere, wa ko afu irisa rogo ga Niseroka bambu yo nangia gako mbori, aAduramereke na Saresere nangia awiriko ki imi ko ni basape, i ki mere ku ringara Ararata yo. Esaradona ki zogo rago ku bako nangia wiriko.

← Chapter 36 Jump to: Chapter 38 →