Proverbs 1

Zande

Jump to: Chapter 2 →

1Agu asanza nga ga Soromo wiri Dawidi, nangia bakindo aYisaraere, ko ake he:

2Ya boro ini tatamana na rugapai, ki ini agu apai nga ga rugatinapai,

3ki idi pa rugapai tipa manga pai ni tatamana, na rurupai, na ruru sarangbanga, na pa du apai rengbe arengba;

4ya i yugu birĩ fu azangainahe, na inahe na sia pa apai fu paranga aboro

5boro tatamana gi pai ki nikii rogo wirikapai yo, boro rugatinapai ki da ti ndikidi birĩ,

6ka ruga tini na sanza na ringbisa pa pai, na pa agu apai nga ga airatatamana, na gayo masaku.

7Gunde ti Yekova nga tonatona mburu inahe; ono mumungo aboro napayasi pa tatamana na rugapai.

8Ako wire, mo gí ga bamo rugapai, ka mo mbú nga ga namo yugopai ya;

9bambiko si adu ni kpakpari undahe ku riro, ni wene ũfongo ku goro.

10Ako wire, ka aboro ingapai so kpekpe foro, ka mo niídi nga ha ya.

11Ka i ya, “Mo yé fuo rani, ani súngu ka sunguda uka kure, ani gbú ka imo boro wenesa ni wia;

12ani mbíri yo dunduko ni ungayo wa Baatoro kpikpi aboro wa agu yo nazorã ku Due yo;

13ani abí kikiipa ahe dunduko, ani ahísa gaani abambu na gbugbu ahe;

14mo dú na ani sa, ani dunduko adú na mangu marã sa”―

15Ako wire, ka mo tá nga na yo rogo gayo pai ya, mo aría nduro ngba gayo agene;

16bambiko nduyo gbidi ka ora sa gbigbitapai, i naipisa tiyo ka uka kure.

17Bambiko i gbaragi pio gbua ku barangba zire;

18ono agi aboro re nasunga ka uka kina kureyo ni sa yo, i nagbuka tipa imo kina ungayo ni sa yo.

19Wo du pa agu aboro ni ba sa sa naroga mokiisa be pa zuu; si nadia pa unga airaha ku sa yo.

20Tatamana nakpara ni wawa ti gene bakporo, si natumba fugoho rogo ababagaahe yo;

21si nakpara ku ari rogo badungurati yo; si nagumba pai ti angbadimo bakporo:

22“Ako oni nga azangainahe, rago adu waĩ, oni nikpi nyemu du ni azangainahe? Rago adu waĩ rago ningba ti abapayasi pa pai, mumungo aboro ki nisogo inahe a?

23Oni sá tironi ka gia gi zapai; oni ngére, mi aúka torore ku ri roni; mi ayúgo gimi apai fu roni.

24Bambiko mi yambu he oni ki ka aka ka dega turoni, mi taĩ bere ka boro aberã nga pa ha ya,

25ono oni sa sangbare dunduko wa kina kungba pai gbua, oni akpi nga nyemu gi zapai a te,

26mi amóma amoma rago gaoni gberãngbi; mi aúmo roni ho gbudagbuda ka zia roni ni,

27ho gbudagbuda ka zia roni ni wa bakamikami yuge, gaoni gberãngbi ki ye wa gugugu yuge, ho fudifudipai ka ye ni na imisiri ku ri roni.

28I ayámba re ni gu rago re, ono mi akáraga nga pai te; i agbáta re nyanyaki, ono i abí nga re te.

29Bambiko wa i asogo inahe ka i asia nga gunde ti Yekova ya,

30ka i akpi nga nyemu gi rugapai a ya, ki nipayasi pa gi zapai dunduko,

31si du i ka ri kina zuzu gayo mangaapai ti ni ki mbiki be gayo sangaapai.

32Bambiko gu tikusayo nga ga azangainahe si nikaimo yo, na gu pai dũ ni wene he bangiri mumungo aboro si nikagbarasa yo;

33ono gu boro nikadega tuni kono du mi ni, ni aráka ni bandabanda ni, ki du zezeredi, zanga gunde be gbigbitapai.”

Jump to: Chapter 2 →