Proverbs 7

Zande

← Chapter 6 Jump to: Chapter 8 →

1Ako wire, mo ká kuti gimi apai, ki niigi sangbare ku kpotoro yo;

2mo ká kuti gimi arugute ka nye ni ungaro, ki ka kuti gimi yugopai wa zende bangiro;

3mo vódi he kuti awirinzagaro, mo ké he kpotoro yo ku ngbaduro yo.

4Mo yá fu tatamana wẽ, “Mo nga dawire,” ki ya ti rugatinapai de ngbanya du;

5si banda ro be kungba de, na be wiri kungba boro navuro ro na gari wene apai.

6Mi angere ku zegi yo dagba watawata ngua, ti bangiri gi bambu,

7mi ki bi boro dagba azangainahe, mi ki ini boro dagba paranga aboro yo, nga paranga kumba naadu nga na rugatinapai ti ko ya,

8naasusa ti gene mbembedi pati tukpu gari bambu, ko ki ndu gene ku kpuri yo,

9ngba nzinzii rago, ho uru ati ni, yuru ti rago bitimo.

10Mo ngére, de ki gbia ko, naukadi tiri na roko debari, vuroro ki du ku kpotori yo.

11Ri nataka wawa ki nimangi kina gu pai ri akpi nyemu he, ka ri asunga nga ku kpuri yo ya;

12awere ri ngba gene bakporo, awere ri babagaahé yo, ki nisungudi boro ti durugaduruga rago yo dunduko.

13Ri zi ko ki dungo ko, ki nyoro ngbako, ki ya fu ko zanga zee kpakpuri yo:

14“Mi afu amotumo zereda, areme mi nifu gi marã zungahe;

15si du mi niye ti ni ka gbia ro, ka gbata ro nyanyaki, mi bi ro.

16Mi mbakadi gi ba na kendegekendege aroko, nga gbafiogbafto aroko nga ga giri nzibi Ezipeta.

17Mi migidi gi barame na wene fuõ mure, na ngua aaroi na zuzu kinanona.

18Mo yé, ani nyási gaani nyemuse ki da ku wiso; ani fú wasa fu bororani ni nyemuse.

19Bambiko kumbami tii kporo te; ko ndu gbanga nunguro;

20ko nindu na marã rogo mangu; ko ayéga diwi ki du ni kpakpu bandimo.”

21Ri ki nisosodi ko na gari vuroro du ngbari; ri ki nangi ko na gari wene fugo, ko ki idi pa ri.

22Ko ki nindu fuo ri ni ba sa, wa babagara nandu tipa imo ru, watadu wa gu bangbiimo zi yo ru nyanyaki,

23daho guanza ka kora vuru ni dati aúvuru yo; wa zire naipisa tiru sa gbina, ka u aina nga ha nga ũ kpioru nga ha ya.

24Ako awire, oni dége turoni awere kono du mi ni, ki ye turoni sa agu apai du ngbare.

25Ka oni niídi nga kpotoroni yo tipa gari apai ya, ka oni ndú nga ngbuongbuo ngba gari agene ya;

26bambiko ri bafu badungu aboro ku sande na aoro; ii, agu yo imi ri yo dunduko nga dungu rimbasa airaome.

27Gari bambu nga gene ku Baatoro kpikpi aboro yo, nandu ku sende yo sa agu abambu nga ga kpio.

← Chapter 6 Jump to: Chapter 8 →