Proverbs 11

Zande

← Chapter 10 Jump to: Chapter 12 →

1Biriki ringbisahe nga kere gbegberẽ he bangiri Yekova; ono ruru ringbisa baroãhe nga gu ngba ti ko.

2Ho ruka naye ni, pa wasiro naye a; ono tatamana du fu agu yo du ni bayee yo.

3Gu ruru sino nga ga ruru aboro ninangbe ku mbata yo fu yo, ono gu keretu nga ga airabiriki nagbarasa yo.

4Kumuko au nga ti uru dingidingi ngbaduse te, ono rurupai nabatasa boro be kpio.

5Gu rurupai nga ga zangabiriki naruga gani pai nzunzu, ono gbegberẽ boro nati be kina gani gbegberẽ pai.

6Gu rurupai nga ga ruru yo nabatasa yo, ono agu yo namanga pai ni biriki i azía yo kina rogo gayo nyemuhe.

7Ho gbegberẽ boro nakpi ni, gani maabangirise nakpi a, gu sogima nga ga azangasinombori ki du gbua.

8I nabatasa ruru boro rago fudifudipai, ono gbegberẽ ni ki ti ku rogo ho ku ba ruru boro.

9Zangasinombori nagbarasa kurani ni kina ngbani, ono bambiko inahe ka i batasi ruru yo ti ni.

10Ho pai nandu ni wenengaĩ fu ruru aboro, bakporo nangi angi; ho gbegberẽ boro nakpi ni, ngbiko na ngbarago ki du.

11Bambiko gu maku nga ga ruru aboro, bakporo ki du ni kiisikiisi pa ha, ono i bafu he bambiko fugo gbegberẽ aboro.

12Gu boro napayasi kurani wene berã ti ni te, ono boro rugatinapai niongo aonga.

13Gu ni nandu kirikiri wa boro totoroto nakusa okooko apai, ono gu ni du na toro rengo ti ni naoka pai.

14Ho adu nga bangbe ku mbata yo ni ya, aboro nati ati, ono bambiko rimbasa aboro rondo, yo du pa zereda ni.

15Gu ni du tipa tumo ga kungba boro pai, kina ni nikaegerã tipa ha, ono gu ni nasoga pa tumo tipa kurani, ni naraka zezeredi.

16Gu de nga iraundahe nabi taarimo, na airazuu nabi aũkumuko.

17Gu boro naina pai ni namanga wenepai tipa kina mbisimoni, ono kere boro naimisa kina tini.

18Gbegberẽ boro nabi gbegberẽ mosoro sunge, ono gu ni narú rurupai ni nadia wene mosoro be he.

19Gu boro du nyanyaki rogo rurupai yo ni anyé ni ungani, ono gu ni nado fuo gbigbitapai akpí akpi.

20Agu yo du na gbegberẽ berã ti yo du ni kere gbegberẽ aboro ku bangiri Yekova, ono agu yo zanga biriki apai, i ngba ti ko.

21Oni i íni he ni rengo ya gbigbita boro azánga nga mbusa te, ono agu yo du ni ruru yo abáta abata.

22Wa fongo dahabu õ mukuru yo, wo du wene de zanga sia pa apai.

23Gu nyemuhe nga ga ruru yo nada ti kina wenepai; ono gu sogima nga ga gbegberẽ boro nada ti dingidingi ngbaduse.

24Gu boro kina ho nafu ahe gbe, ono ni ki du ni irakumuko ki susi; gu kura ni kina ho nabengeta aboro ka ni afu nga gu rengbe ya, zingo ahe namanga ni amanga kindi.

25Iragamahe azuga azuga gbe, ono i nisuka age ku akoro akura ra yo.

26Aboro natiwa gu boro naka na zendeahe, ono maku du ku ri gu ni nabaga ha.

27Gu ni nagbata wenepai ngangarã nagbata gu pai ngba angba, ono gu ni nagbata gbigbitapai, kina ha nikaye fu ni.

28Gu ni nakida kuti kina gani aũkumuko apáya apaya, ono ruru boro afúna wa fogo kpengua.

29Gu ni narungosi gani aborokporo ni adía kina yuge, mumungo boro adú ni ga iratatamana moyambu.

30Gu zuzuhe nga ga ruru boro nga ngua unga, iratatamana nagbata aboro ka batasa yo.

31Ka i fu mosoro ga ruru boro basapai fu ni auru kpotosende, waĩ ka ga gbegberẽ boro na ga boro ingapai ka du!

← Chapter 10 Jump to: Chapter 12 →