Proverbs 8

Zande

← Chapter 7 Jump to: Chapter 9 →

1Tatamana ayamba nga he, te? rugatinapai apaa nga ku ari, te?

2Si narunda ngboso agene yo, ri tumbatumba arago yo pangba gene;

3pati angbadimo ku barangba bakporo yo, ti abarima ku bakporo yo si napaa ku ari ki niya:

4“Ako aboro, mi nayamba roni, gi kpe du fu awiri aboro.

5Ako oni nga azangainahe, oni rúgu tironi na pa birĩ; Ako airamungo, oni dú na rugatinapai.

6Oni gí he, bambiko mi agúmba pa bakumba apai fu roni, ono agu apai mi ka za ngbare na ni, si adú ni rurupai;

7bambiko ngbare agúmba kinaku rengo; gbegberẽpai du ni kere he fu ngbare.

8Agu apai dunduko du ngbare nga kinaku rurupai; a nga pai ngbare du ni iraira ha, na gberãringi te.

9Si dunduko nzunzu fu gu ni naruga tini na pa ha, ni ruru he fu agu yo ini pa inahe.

10Oni rogo gi rugapai ku ba feda, na inahe ku ba siasia dahabu;

11bambiko tatamana ngba susi ti ngungungu ambia fongahe, agu ahe dunduko ka oni akpi nyemu he i aringbisa nga ha na tatamana te.

12Mi nga tatamana naraka na wene birĩ, mi ki bi inahe na sia pa apai.

13Gunde ti Yekova nga soga gbigbitapai. Ruka na kiisapatise, na gbigbita sino na fugo biriki, si mi nasoga.

14Rugapai du ngbare, na ndikidi tatamana, mi du na inahe, ki du na ngarã a.

15Bambiko re abakindo azoga rago ti ni, agbia ki nir ũ ruru ndika.

16Bambiko re abazogo azoga rago ti ni, na abaakumba ki nisapu ngbanga auru kpotosende no.

17Mi kpi nyemu agu yo nakpi nyemu re, agu yo nagbata re sirisiri i abí re.

18Aũkumuko na taarimo du be re, ii, nyenye kumuko na u a.

19Gi zuzuhe ngba ki susi dahabu, zavura wene dahabu vurũ, gu he nazuka fere si susi siasia feda.

20Mi nata ngba kina gene rurupai, ngba agene ruru sarangbanga,

21nifu ũkumuko fu agu yo nakpi nyemu re, ki nihihiisi gayo baiga amarã.

22“Yekova afu re ti tonatona rago gako sunge, mbata fu kuru gako mangaapai.

23Mi adu kina ho bakuru yo, ti tonatona rago, mbata kpotosende nikatona.

24Ho angirimo adu nga ni ya, mi adu kina ho, ho agugaabi adu nga ni na ime rogo ho a ya.

25Mbata abaagangara nikadu, na mbata fu agangara, mi adu kina ho;

26ho Mbori ata manga nga kpotosende ni, na aati ya, watadu ka nvutu ata du nga zegino a ya.

27Ho ko anyakasi angbangbaturũ ni, mi adu kina yo, ho ko ambakadi he ni ni gidigidi he auru ngirimo,

28ho ko amangi vuro angbangbaturũ ni ni nyanyaki he ku ari ho ko ageteke ngirimo gugaabi ni nyanyaki,

29ho ko akpara bangbanda abaime ni, ya ka ime agu nga auru sangbako ya, ho ko amoi ba amburu kpotosende ni,

30mi adu kina pati ko, wa bangbasia boro sunge; rago angba ti ko mbiko re na auru dunduko, mi ki ningi na auru bara bangiriko,

31ki ningi mbiko pa gako kpotosende aboro naraka auru he, rago angba ti re mbiko awiri aboro.

32“Ako awire, oni dége turoni awere kono du mi ni: rago nangba fu agu yo naka kuti gimi apai.

33Oni gí rugapai ki du na tatamana, ka oni bása nga ha ya.

34Rago ngba fu gu boro nagia sangbare, ki nisungudi gimi angbadimo bakporo na uru, ki nisungu ti gimi angbadimo.

35Bambiko gu boro bi re ni bi unga, ki nibi wene apai be Yekova;

36ono gu ni abi nga re ya ni nagbarasa kina tini; agu yo dunduko nasoga re nakpi nyemu kina kpio.”

← Chapter 7 Jump to: Chapter 9 →