Proverbs 23

Zande

← Chapter 22 Jump to: Chapter 24 →

1Ho mo ka sunga ni ka ri he na bazogo, mo kpária pa gu he nyanyaki du bara bangiro;

2ki zogo tiro yee, ka si du wa mo nga boro nyemu riahe gbe.

3Ka mo dú nga na nyemu gani bawene riahe ki susi ya, bambiko si nga gu riahe nananga boro ananga.

4Ka mo nifúdi nga tiro tipa du ni irakumuko ya; ono mo dú na tatamana rengbe na mbu pa ha.

5Bambiko ho bangiro nibi he ni, si niima go; bambiko aukumuko naga wa zire nizara puporu ka gu, wa dingimo nagu ku ari yo.

6Ka mo nirí nga gu riahe nga ga boro kere ngera ya; ka mo kpí nga nyemu gani bawene riahe a ya;

7bambiko wa du gani berã ku kpotoni yo, wo du ni, ni naya foro we “Mo ri he ki mbiri he!” ono ka kpotoni yo adu nga na mo ya.

8Gu bete riahe mo niri mo asúka ha asuka, ki gbarasi pa gamo wene apai.

9Ka mo nifúra nga ho ka mumungo boro gi he ni ya, bambiko ni apáyasi pa ga tatamana fugo.

10Ka mo nigbísi nga kuru bangbanda kporo ya, watadu ndu ku rogo ga awirinyaure aati yo a ya;

11bambiko Batumoyo nga nyanyaki boro; ko azúngadi he tipa gayo pai kuti ro.

12Mo moi berãro tipa rugute, na turo sa agu apai nga ga inahe.

13Ka mo mbú nga ruga gude ya; bambiko ka mo ta ni na kpudu, ni akpi nga te.

14Ono ka mo ta ni na kpudu mo abátasa toroni be Baatoro kpikpi aboro.

15Ako wire, ka kpotoro yo du na tatamana, kpotore yo adú na ngbarago a.

16Mbisimore angi a ho mo ka gumba ruru apai ni ni ngbaro.

17Ka mo nikpí nga aboro ingapai ku kpotoro yo ya, ono mo dú na gunde Yekova ti ro kindi na auru pitipiti.

18Ni rengo pai kina ku mbata yo, I adía nga ga maabangirise ku sa yo te.

19Ako wire, mo gí he, ki du ni iratatamana, ki nirugu berãro rogo pai.

20Ka mo dú nga dagba abambiri imekakue yo ya, watadu dagba airaangbu abari pasio a ya;

21bambiko bakpiimekakue na iraangbu adá ti rungo, boro raturatu rame si aukadi ni na kina kpatakpata aroko.

22Mo dége turo fu bamo navungu ro, ka mo nipáyasi nga namo ho ri nagbinza ni ya.

23Mo ngbé rengo, ka mo bági nga ha ya; mo ngbé tatamana, na rugute, na rugatinapai a.

24Ba ruru boro angi ni bakere he; gu ni batika tatamana gude adú na ngbarago tipa gani pai.

25Mo ídi bamo na namo dú na ngbarago, na gu ri navungu ro ri ngí.

26Ako wire, mo fú kpotoro yo fere, gimi apai ki ngba bangiro ki susi.

27Bambiko debari du wa dudungura due; na kungba de wa fitikiri due.

28Ri napi ka pida rago wa batuka, ki ningeesi airabiriki dagba aboro.

29Ako, da du na ima? Da du na rungo? Da du na darãpai? Da nakpakana he? Da du na aoro zanga nduhe? Da bangirini azama?

30Agu yo naima ku pati imekakue, agu yo nagbata kodikodi imekakue.

31Ka mo ngére nga ku rogo imekakue ho si nangbi ni, ki zamu ku inga yo ya, na ho si nangba ni gose yo ya.

32Ti digidaha si ade boro wa wo, egetere he ki du wa ga kpokowo.

33Bangiro abí mbisimo iiriwo apai, ga berã agúmba apai ni biriki.

34Mo adú wa gu ni pi bebere baime tikpo yo, watadu wa gu ni napi ri dangba kurungba.

35Mo ayá, “I yawa re, ono mi aima nga te; i nari re, ka mi aina nga ha ya. Ni gini rago mi akazinga rame yo? Mi agbáta kura mbirimbiri he berewe.”

← Chapter 22 Jump to: Chapter 24 →