Proverbs 3

Zande

← Chapter 2 Jump to: Chapter 4 →

1Ako wire, ka bangiro nigó nga ti gi yugopai ya, ono ngbaduro niká kuti sangbare;

2bambiko si afú zereda foro kpaima, na gbanga arame na agarã ungaro.

3Ka mo nimbú nga pa weneringise na rengo ya; mo vódi he ku goro kirikiri, mo ké he ku ngbaduro yo.

4Si du mo ka ngba ti ni bangiri Mbori na aboro a, ki du na wene rugatinapai.

5Mo kída kuti Yekova na kpotoro yo dunduko, ka mo nikída nga kuti gamo rugatinapai ya.

6Mo rá fu ko rogo gamo apai dunduko, Mo arúga gamo apai foro nzunzu.

7Ka mo tigamo nibérẽ nga ha ya mo du ni iratatamana ya; ono mo gúnde ti Yekova, ki guari pati gbigbitapai.

8Si adú ni ũhusa ro fu ungaro, ni nzeme ngua fu amemero a.

9Mo írisi Yekova na gamo ahe du, na amakawa gamo bambata zuzu ahe naida;

10si du gamo agbamu ka hika ti ni be dungu ahe, gamo ba aũ piraahe ki du wa ka si sumbu asumba be vovo imekakue.

11Ako wire, ka mo gíndiga nga pa gu rugapai nga ga Yekova ya, watadu ka mo ambú nga be gako zapai a ya,

12bambiko Yekova naruga gu ni ko nakpi nyemu ni, wa kina bagude na gu wirini ngba ti ni.

13Boro ngbarago nga gu ni ini tatamana, na gu boro du na rugatinapai,

14bambiko mokiisa ha ngba ki susi mokiisa baga feda, gu mokiisa du ti ni si ki susi ga dahabu.

15Si ngba ki susi ti ngungungu ambia fongahe, he ho mo akpi nyemu he, ka rengbe na ni te.

16Gbanga arame du rogo kumbabehe; rogo garebehe du aũkumuko ni na irisa.

17Gaha apai nga agene wene apai, na gaha agene dunduko nga agene pa zereda.

18Si nga ngua unga fu agu yo zadi he; ngbarago du fu agu yo dunduko ka kuti ni nyanyaki.

19Yekova amoi mburu zegino be tatamana; be rugatinapai ko ambakadi angbangbaturũ ti ni;

20be gako inahe angirimo adewe gaha agene ti ni, adubo ki nifu ndomo.

21Ako wire, mo ká kuti ndikidi tatamana na sia pa pai; ka si nigó nga bangiro ya;

22si du si akadu ti ni ni unga fu mbisimoro, ni aũfongo ku goro.

23Si du mo atá rogo gamo apai ni bandabanda ro, ka nduro akóta nga ya.

24Ka mo sungu sande, mo adú nga na gunde te; ho mo akapi ni sande, ga rame anidu ni wene he.

25Ka mo nigúnde nga be tunguotunguo gbudagbuda ya, watadu be gbarasa he nga ga gbegberẽ aboro, ni gu rago si niye a ya;

26bambiko Yekova adú ni ga zukazukapai, ko abánda nduro be zia ha.

27Ka mo niká nga na manga wenepai fu agu yo du he fu yo ya, ho rengbe mo arengba ni namanga ha.

28Ka mo niyá nga fu kuaro wẽ, “Mo ndú, ki ye berewe, gba mi afú he foro” ― ho du he ni kina be ro, ya.

29Ka mo nisángi nga gbigbitapai kuti kuaro ya, wa du he nga ko naraka ni bandabanda ko pati ro.

30Ka mo nitá nga kpata na boro zanga nduhe ya, ho ni aimisa nga ro ni ya.

31Ka mo nikpí nga boro zuu ya, ka mo nisía nga gu sino sa nga gani ya;

32bambiko irakeretu nga kere gbegberẽ boro bangiri Yekova; ono ruru boro du rogo gako pa du zukazuka.

33Ga Yekova motiwa du ri ga gbegberẽ boro bambu, ono ko nafu maku ku ri ga agu yo kporo nga ruru yo.

34Ni rengo ko napayasi abapayasi pa apai, ono ko nayugo inapai fu agu yo naumbasi tiyo.

35Iratatamana adía ũkumbo taarimo, ono mumungo aboro adu na kina zee.

← Chapter 2 Jump to: Chapter 4 →