Proverbs 24

Zande

← Chapter 23 Jump to: Chapter 25 →

1Ka mo nikpí nga pa ga gbigbita aboro pai ya, ka mo nikpí nga nyemu ka du na yo a ya;

2bambiko gayo berã nasanga pa zuu, ngbayo nagumba fudifudipai.

3Boro nidua bambu be tatamana, ni ki nyakasi he be rugatinapai;

4be inahe ni nihisi avuru bambu yo ti ni, na kikiipa wene ahe dunduko ngba angba nga ga aukumuko.

5Boro tatamana du na ome; na irainahe nakiisa tandu;

6bambiko mbiko tatamana ruga ro si mo ka so ga vura ti ni nzunzu, mbiko rimbasa aboro rondo, yo du diabese ni.

7Turú tatamana aturã ki susi fu mumungo boro; ni aza nga ngbani bangbanga bakporo yo a te.

8Gu boro naberã pa sanga gbigbitapai, aboro ayá ti ni ni nga basangi biriki.

9Berã pa manga mumungo pai nga ingapai, ono bapayasi aboro nga kere gbegberẽ boro bangiri aboro.

10Ka he amaka ro ti uru gberãngbi, omero adu toni gbua.

11Mo bátasi agu yo i andu na yo sa kpio; mo ká na agu yo i naima ringbisa yo sa imo yo.

12Ka mo ya, “Mo ngére, ani aina nga pa gi te re,” gu ko ninawisiga kpoto yo aina nga pa ha te? Na gu ko ninabanda tororo ko aina nga pa ha a te; Ati ko afú mosoro fu aboro rengbe na kina gayo mangaapai?

13Ako wire, mo ri nzeme anyege, bambiko si nga wene he, na gu natoga ti pepere anyege, du ni nzinziri he ngbaro.

14Mo aina ha ya kina wo du tatamana fu mbisimoro; ka mo bi he, wenepai adú foro ku mbata yo, i adía nga ga maabangirise ku sa yo te.

15Ka mo nipídi nga ga ruru boro kporo wa gbegberẽ boro ya; ka mo nigbárasi nga gani kporo ni zuu ya;

16bambiko ruru boro nati bara saba, ki niguari berewe; ono gbegberẽ aboro nitiwi atiwa be gberãngbi.

17Ka mo ngí nga ho vuraro niti ni ya, ka kpotoro yo awása nga ho ni nakotoka ni a ya;

18Yekova ka bi he, si ki gberẽ ti ko, ko ki di gako zinga ti ni ku sa yo.

19Ka mo nifúdi nga tiro bambiko amangi gbigbitapai ya, ka mo akpi nga ga gbegberẽ aboro apai a ya;

20bambiko wenepai adú nga fu gbigbita boro ku mbata yo te; ga gbegberẽ boro we atara abísa abisa.

21Ako wire, mo gúnde ti Yekova na be bakindo a, ka mo kpámia nga tiro na agu yo inidi pa satise a ya;

22bambiko gberãngbi akúra be yo rure; da ini pa gu gbarasahe nikaye be yo wa du yo ue?

23Agi apai re a nga fugo airatatamana. Kpara pa boro rogo sarangbanga nangba nga te.

24Gu ni naya fu gbegberẽ boro wẽ, “Mo nga boro wenesa,” aboro atiwa ni, arikaaboro ki nisogo ni;

25ono agu yo naza gbegberẽ aboro adú na ngbarago, wene maku ki du ku ri yo.

26Gu boro nakaraga ruru karagapai nanyora ngba boro.

27Mo mbákadi pa ga sunge zegi yo, ki mbakadi pai tipa ro ati yo; fuo gure mo ki dua ga bambu.

28Ka mo dú nga ni dezire kuti kuaro zanga nduhe ya, ka mo nángi nga he ni ngbaro ya.

29Ka mo yá nga “Mi amánga fu ni a wa ni amangi he fere; mi agása he fu boro rengbe na gani sunge,” a ya.

30Mi asusi pati ga iramungo ati, pati ati bakakue nga ga gu boro zanga wene berã;

31mo ngére, akiwe asono asona ri he dú; abagambu ki di he, gu ngapa mbia nadu pati he kirikiri akuadi ku sande.

32Mi abi he ki berẽ pa ha wenengaĩ; mi angere, si ki yugu pai fere.

33Wiri rame toni, yukura toni a, uya be a toni ka ongoda,

34si du rungo ayé ku ri ro wa batuka, ga zingoahe wa boro vura.

← Chapter 23 Jump to: Chapter 25 →