Proverbs 4

Zande

← Chapter 3 Jump to: Chapter 5 →

1Ako awire, oni gí ga baroni rugapai, oni dége turoni ka ina pa rugatinapai;

2bambiko mi nafu wene andika fu roni: ka oni nimbú nga gi rugapai ya.

3Ho mi adu ni ni gude na buba, ka mi ata nyakada nga ya, ni bangisa re bangiri nina,

4ko ayugu pai fere, ki ya fere, “Mo nidíka gi gimi apai re ku ngbaduro yo; ki ka kuti sangbare, mo ki nye ni ungaro;

5ka bangiro nigó nga ti ni ya, ka mo bása nga agu apai du ngbare ya. Mo nigbáta tatamana, mo nigbáta rugatinapai.

6Ka mo nimbú nga ha ya, si abanda ro; mo kpí nyemu he, si abátasa ro;

7Tonatona mburu tatamana nga gere: Mo nigbáta tatamana, ii, na ku ri agu apai dunduko bi mo, mo nigbáta rugatinapai a.

8Mo sámbua ha gbe, si akíisa paro; si afú irisa foro ho mo ka dia ha ni ku gume.

9Si afú kpakpari undahe ku riro yo; si akúsa kpakpari taarimo foro a.”

10Ako wire, mo gí gimi apai ki di he ku gume, garã ungaro ki du ni dungu he.

11Mi yugu pa gene tatamana foro; mi ngbe ku mbata yo foro ngba agene rurupai.

12Ho mo ka ta ni, he ho nikaza ro te; ka mo aóra, mo akóta nga a te.

13Mo ká kuti rugute nyanyaki, ka mo nimbú nga ha si merẽ ya; mo nibánda pa ha bambiko si nga ungaro.

14Ka mo nirími nga ngba gene gbegberẽ aboro ya, ka mo nitá nga ngba gene amangi gbegberẽpai a ya.

15Mo né he; ka mo nindú nga ngba ha ya; mo ária tiro ngba ha ki susi ku mbata yo.

16Bambiko i arengba nga ka ra te, kina gu ka i mangi gbegberẽpai; i nidi rame ku sa yo bangiriyo yo, kina gu ka i mangi kura aboro i koto.

17Bambiko i nari gu riahe nga ga gbegberẽpai, ki nimbiri gu imekakue nga ga zuu.

18Ono ga ruru aboro gene du wa gu imarago nga ga ngbawiso, nakĩ akĩ ki susi ki da ti kina bebere uru.

19Ono ga gbegberẽ aboro pai dũ wa kina nduunduu bitimo; i aina nga gu he i akotoka ti ni te.

20Ako wire, mo dége turo sa gimi apai; mo yé turo sa gi gumba apai.

21Ka mo nimbú nga ha si go bangiro wa sa ya; mo niígi he kina ku ngbaduro yo.

22Bambiko si nga unga fu gu ni bi he, ni ũhusa fu kpotoni dunduko.

23Mo nibánda kpotoro yo ngangarã; bambiko yo unga naye ni.

24Mo nimbú gumba iraira fugo, mo bá fugo keretu tuturũ ti ro.

25Bangiro ningére ku mbata yo diiri, mo ki ningere ku mbata yo bara bangiro.

26Mo nimbákadi ba nduro kpasakpasa, si du gamo apai ka du ti ni dunduko ni mbakadimbakadi he.

27Ka mo nisá nga tiro ku kumbabe na ku garebe yo a ya; mo ária nduro ti gbegberẽpai.

← Chapter 3 Jump to: Chapter 5 →