Proverbs 6

Zande

← Chapter 5 Jump to: Chapter 7 →

1Ako wire, ka si du wa mo du tipa tumo kuaro, ki kido he tipa kungba boro;

2ka ngia mo ni zizi ro be gu pai kuru ngbaro yo, ni vovo ro be gu pai gumba mo ho;

3Ako wire, mo mángi gere, ka batasa tiro, wa du mo kina ku ba kuaro; mo ndú, ki umbasi tiro, ka zungadi tiro fu kuaro.

4Ka mo rá nga ya, ka rame zí nga puku bangiro a ya;

5Mo bátasi tiro wa gbangbaria be bamangi ru, na wa zire be baimi ru.

6Ako iranyomoro, mo ndú koyo du angbari ni; mo bérẽ pa, gaami mangaapai ka du ni iratatamana.

7Nga agu ra adu nga gbia ku ri ra ya, babiapai watadu barugupai a te.

8Ami nambakada gaami riahe kita, ki nidungura gaami riahe ti regbo ke ahe.

9Ako iranyomoro, mo apí yo tipa rago waĩ? Ni gini rago mo ka zinga be ga rame?

10Wiri rame mbata toni, wiri yukura a toni, ki uya bero ngbutuko ka ongoda,

11si du ga rungo ka ye ti ni wa ga yaura rago zingohe wa boro vura.

12Gu boro are nga na pai ya, nga boro irairapai, ni nata na kina pa biriki ngbani,

13ni napira bangirini, ki nibakaya rago ni nduni, ki niyugu pai ni wirinzagani,

14ni nasanga gbigbitaapai na gu biriki du kpotoni yo kindi, ki nienge tikangu dagba aboro;

15si du gberãngbi ayé ku ri ni ni tunguotunguo ho rure; tipa ngbutuko rago pai akúadi ni gasi husa ni.

16Apai ho sita Yekova nasoga ha, ii, apai saba nga kere gbegberẽ he ku bangiriko:

17nga ngera ruka, na gu mirãse nare zire, gu be nauka kure boro wenesa,

18na gu ngbaduse nasanga gbigbitapai, gu ndue naipisa tihe ka ora sa gbigbitapai,

19irazire dezire nagumba kina azire, na gu ni naenga pa tikangu dagba awirinani.

20Ako wire, mo ká kuti sangba bamo, ka mo mbú nga gu yugopai nga ga namo ya.

21Mo nidi he ku ngbaduro yo kindi, mo ki nivo ho kuti goro.

22Ho mo ka ta ni, si nikangbe foro ku mbata yo; ho mo ka ra ni, si nikabanda ro, ho mo ka zinga ni rame yo, si nikafura na mo.

23Bambiko sangbayo wa ima baro, yugopai ki du wa imarago, gu zapai nga ga rugapai si nga gene unga,

24ka banda ro be gbegberẽ de, na be gu zomiapai nga ga mirã kungba de.

25Ka mo nikpí nga nyemu ri kuti ngbanyari kpotoro yo ya, watadu ida fu ri ri gbe ro ni sanza bangiriri a ya;

26bambiko i ngbe natakuari na kina mbusuru riahe, ono debari nagbata kina unga boro.

27Boro rengbe ka dia we kuti ngbaduni ka gani roko agbi nga ya?

28Watadu boro rengbe ka ta ri kingiri we, ka nduni arubaga nga a ya?

29Wo du gu ni narima fuo dia kurani, gu ni ka zadi ri ni agá nga zanga mbusa te.

30Aboro napayasi nga iradĩ ka ni dĩ he ka za gani gomoro ho si amanga ni ni, te?

31Ono ka i zi ni, ni akáraga genoho wa bara saba; ono ni anifu gani ahe afu dunduko du dimo kpuni yo.

32Gu boro namanga bari wene berã ti ni te; gu ni namanga gu pai re nagbarasa kina tini.

33Aoro na zee nikazia ni, ka gani pa zee ago nga ya.

34Bambiko deringo nazingisa boro, ka ni ambú nga ha ti uru irabape ya.

35Ni áida nga pa wiri motumo tipa ha wa sa te, ka mo vura ngeesa gamahe ni azéra nga a te.

← Chapter 5 Jump to: Chapter 7 →