Proverbs 30

Zande

← Chapter 29 Jump to: Chapter 31 →

1Agura wiri Yake nangia boro Masa, sangbako du re. Gu boro naya fu Itiere, fu Itiere na Ukara wẽ:

2Ni rengo mi wa kina gbogoro adu nga wa boro ya, du nga mi na gu rugatinapai nga ga boro te.

3Mi awirika nga pa tatamana te, mi aina nga pa gu Ziazia Ko a te.

4Da naga ku ngbangbaturũ yo ki zorõ kono? Da nadungura nga yuge ku duguru beni yo? Da navo nga ime ku rogo roko yo? Da nanyakasi adigida kpotosende dunduko? Rimoni nga da, rimo wirini a nga da? Mo ini he, ni rengo!

5Ga Mbori apai dunduko du ni ndikidi rengo; ko nga vurakube fu agu yo nakida kuti ko.

6Ka mo agbía nga kura pai kuti gako apai ya, ko ka za ro, mo ki du ni irazire.

7Mi nasana ro tipa apai ue; ka mo ká nga na ni be re mbata mi nikakpi ya;

8Mo gbísi pa ruka ti re tuturu na gumbazire; ka mo fú nga rungo fere watadu aukumuko a ya; ono mo rígi re ni kina gu riahe rengbe fere;

9mi ka mbi, ki oro rimoro, ki ya, “Da nga Yekova?” watadu mi ka du ni rungorungo boro, ki dĩ he, ka gbarasa rimo gi Mbori.

10Ka mo rungba nga pai ti rimo moyambu fu bairani ya, ni ka tiwa ro, mo ki du na ngbanga ku ri ro.

11Aboro kina ho nagberã ngbayo yo fu abayo, ka i afu nga irisa fu anayo ya.

12Aboro kina ho du ziazia bangiriyo, ono i gigiri ti gayo biriko te.

13Aboro kina ho Ako! na kii payo bangiriyo, wawa! i nazara ngakaĩyo!

14Aboro kina ho du rindiyo wa kina abasape, na gburukayo wa asape, ka rita rungorungo aboro auru kpotosende, na airazingohe dagba aboro.

15Wiri amatundu ni anara ue nakpara niya, “Mo fú he. Mo fú he.” Ahe ho biata ambi nga ya, ii, si ho biama a naya nga, “Si rengbe” a ya:

16Nga Baatoro kpikpi aboro, na rukumbu zangada, kpotosende nahi nga be ime ya, na we aya nga “Si rengbe,” a ya.

17Gu bangiri boro nawia bani ki nipayasi pa gia sangba nani, agu anguku du ngboongboorago yo amófa bangirini amofa, paranga adingimo ki riti he.

18Ahe ho biata iriwo ti re ki susi; ii, si ho biama mi aruga nga tire na pa ha ya:

19nga, pa gu gu nga ga dingimo ari yo, pa ga wo nduge ri mbia yo, pa nduge bakurungba ri baime, na pa ga kumba pai na ngasu de.

20Gere nga gu pai nga ga debari: ri nari he, ki wege ngbari, ki ya, “Mi amanga nga gbegberẽpai te.”

21Be ahe biata zegino nakio be he; ono be ahe biama si arengba nga na ru ku ba ha te:

22ho kanga nisa tini ni ni bakindo, ho mbi gu boro zanga wene berã ni be riahe;

23ho gbegberẽ sino de nidi kumba ni, na ho kangade nidi ba nairari ni.

24Anya na agbiro ho biama du ni rukutu ra auru kpotosende, ono ami nga airatatamana ki susi:

25Angbari nga agu agbiro adu nga nyanyaki ya, ono ami nadungura gaami riahe kita;

26anya du wa ndakuta adu nga na ome ya, ono bambura kina sii ambia yo;

27ayere adu nga na bakindo ya, ono ami dunduko nandu na rikara;

28na garamura mo rengbe ka zia ru na bero ono u kina rogo ga abakindo abambu yo.

29Ahe ho biata nandu ni wene nduge; ii, si ho biama nandu nduge wenengaĩ:

30bahu nga gu ru susi dagba anya dunduko, u ane nga gene fu gu nya te;

31farasi vura; bameme a, na bakindo nandu mbata yo fu gako aboro.

32Ka mo mangi pai ni mungo ni kiisa pa tiro, watadu mo aberẽ pa sanga gbegberẽpai, mo moi bero ti ngbaro.

33Bambiko kina kama mamunya nakusa nzemehe, ka kafio õse nakusa kure, na zinga ni ome nakusa kpata.

← Chapter 29 Jump to: Chapter 31 →