Hebrews 10

Ewe 2014 (EƲEGBE BIBLIA)

← Chapter 9 Jump to: Chapter 11 →

1Yudatɔwo ƒe se la la, nu nyui siwo le vava ge la ƒe vɔvɔli ko wònye, menye eyae nye nu vavãtɔ la o. Esia ta se la mate ŋu ato vɔsasa siwo wowɔna ƒè sia ƒè la dzi awɔ ame siwo tena vaa Mawu gbɔ la, woade blibo gbeɖe o.

2Ɖe wòate ŋu awɔ ame wòade blibo la, anye ne amewo dzudzɔ vɔsasa. Nenye ɖe subɔla siwo ta wosa vɔ ɖo la ŋuti kɔ zi ɖeka ko la, anye ne woƒe dzitsinya maganɔ fɔ bum wo be nuvɔ̃ le wo ŋuti o.

3Ke vɔsasa siawo gaɖoa ŋku amewo ƒe nuvɔ̃wo dzi na wo ƒe sia ƒe,

4elabe nyitsu kple gbɔ̃tsu ƒe ʋu mate ŋu aɖe nuvɔ̃ ɖa le ame ŋu akpɔ o.

5Esia ta esi Kristo gbɔna ɖe xexea me la, egblɔ na Mawu be: “Menye vɔsasa kple nunanawo dim nèle o, ke boŋ èwɔ ŋutilã nam.

6Numeme nunanawo kple nuvɔ̃ɖeɖeɖa nunanawo medzea ŋuwò o.

7Tete megblɔ be: ‘Yoo Mawu, meva be mawɔ wò lɔlɔ̃nu’, abe ale si woŋlɔe ɖe mawunya me le ŋutinye ene.”

8Gbã la, egblɔ be: “Menye vɔsasa, nunanawo, numemewo kple nu siwo wonana ɖe nuvɔ̃ ta lae nèdi alo woawoe dzea ŋuwò o.” Evɔ wònye se la nue wonaa nu siawo ɖo hafi.

9Egagblɔ hã be: “Yoo, meva be mawɔ wò lɔlɔ̃nu.” Eɖe ɖoɖo gbãtɔ la ɖa be yeatsɔ evelia aɖo eteƒe.

10Esi Yesu Kristo wɔ Mawu ƒe lɔlɔ̃nu hetsɔ eƒe ŋutilã na zi ɖeka ko ɖe ɣeyiɣiawo katã nu ta la, Mawu kɔ mía ŋuti.

11Nunɔla ɖe sia ɖe tsia tsitre ɖe Mawusubɔƒe la gbe sia gbe. Etsɔa nunana mawo ke saa vɔe edziedzi, togbɔ be womate ŋu aɖe nuvɔ̃wo ɖa akpɔ o hã.

12Ke esi Kristo va sa vɔ ɖeka ma ko ɖe nuvɔ̃wo ta hena ɣeawo katã ɣi la, eyi ɖabɔbɔ nɔ anyi ɖe Mawu ƒe ɖusime.

13Tso ɣe ma ɣi dzi la, ele lalam va se ɖe esime woatsɔ eƒe futɔwo awɔ eƒe afɔɖodzinui.

14Kristo sa vɔ zi ɖeka ko ɖe ɣeyiɣiawo katã nu, eye wòwɔ ame siwo ŋu wokɔ la bliboe.

15Le nyateƒe me la, Gbɔgbɔ Kɔkɔe la hã ɖi ɖase na mí le esia ŋuti. Gbã la, egblɔ be:

16“Aƒetɔ la gblɔ be: ‘Le ŋkeke mawo megbe la, nu, si mabla kpli wo la nye esi: Matsɔ nye sewo ade woƒe dzime, eye maŋlɔ wo ɖe woƒe susu me.’ ”

17Egblɔ kpe ɖe eŋu be: “Nyemagaɖo ŋku woƒe nuvɔ̃wo kple woƒe vodadawo dzi o.”

18Ne wotsɔ nu siawo ke la, megahiã be woasa vɔ ɖe nuvɔ̃ ta o.

19Eya ta nɔviwo, dzi ɖo mía ƒo be míage ɖe Kɔkɔeƒe ƒe Kɔkɔeƒe la to Yesu ƒe ku si wòku la dzi.

20Etsɔ eƒe ŋutilã ɖe mɔ gbagbe yeye na mí to xɔmetsovɔ la me.

21Ale esi nunɔla triakɔ si le Mawuƒe la nu la le mía si la,

22mina míate ayi Mawu gbɔ kple dzi si toa nyateƒe, xɔse si li ke sesĩe, dzi si ƒe dzitsinya vɔ̃ɖi woklɔ ɖa keŋkeŋ kple ŋutilã si wole tsi zɔzrɔ̃e na nyuie la.

23Mina míalé nu si me míeʋu hele mɔ kpɔm na la me ɖe asi sesĩe maʋamaʋãe, elabe ame si do ŋugbe la na mí la, nuteƒewɔla wònye.

24Mina míabu ale si míanyɔ mía nɔewo ɖe nɔvilɔlɔ̃ kple agbenɔnɔ nyui ŋu la ŋu.

25Migana míagbe míaƒe takpeƒewo yiyi, abe ale si mia dometɔ aɖewo wɔna la ene o. Ke boŋ mina míade dzi ƒo na mía nɔewo ɖe edzi vevie wu, esi míenya be ŋkeke la tu aƒe ta.

26Elabe ne míenya nyateƒe la vɔ keŋ, hafi gaɖoe le nuvɔ̃ wɔm la, ekema vɔsasa aɖeke megali aɖe nuvɔ̃ la ɖa o.

27Ke ɖeko míanɔ mɔ kpɔm kple vɔvɔ̃ na fɔbubu kple dzo bibi gã si afia Mawu ƒe futɔwo la.

28Ne ame aɖe da Mose ƒe se la dzi la, womekpɔa nublanui nɛ o, ɖe wowunɛ; ɖasefo eve alo etɔ̃ koe hiã.

29Ke ne ame aɖe tu afɔ Mawu Vi la dzi, eye mebu nubabla ƒe ʋu si kɔ eŋuti la ɖe naneke me o, eye wòdo vlo Mawu ƒe Gbɔgbɔ si vea ame nu la, ɖe medze be woahe to nɛ vevie wu oa?

30Elabe míenya eya, ame si gblɔ be: “Nyee nye hlɔ̃biala; nye la, maɖo eteƒe.” Egagblɔ hã be: “Aƒetɔ la adrɔ̃ ʋɔnu eƒe dukɔ.”

31Baba na ame si ge ɖe Mawu gbagbe la si me!

32Ke miɖo ŋku ŋkeke siwo va yi, esime miedze si Mawu teti la dzi. Ɣe ma ɣi la, miedo dzi, ʋli sesĩe eye miekpe fu geɖe hã.

33Ɣe aɖewo ɣi la, wodzua mi gɔ̃ hã le dutoƒo, eye miexaxana, eye ɣe aɖewo ɣi hã la, wobua mi dea ame siwo ŋuti wowɔa esiawo ɖo la dome.

34Le nyateƒe me la, mia kple gamenɔlawo miekpe fu, eye togbɔ be amewo xɔ miaƒe nunɔamesiwo le mia si sesẽtɔe hã la, mieɖe asi le wo ŋu na wo faa kple dzidzɔ, elabe miawo ŋutɔ mienya be nunɔamesi siwo nyo wu emawo, eye woanɔ anyi ɖaa la le mia si.

35Eya ta migana dzi naɖe le mia ƒo o, elabe fetu gã aɖe li na mi.

36Ehiã be miado dzi ale be miate ŋu awɔ Mawu ƒe lɔlɔ̃nu, eye miaxɔ nu si ŋugbe wòdo la.

37Elabe mawunya gblɔ be: “Esusɔ ʋɛ ko ne ame si gbɔna la nava ɖo; matsi megbe o.

38Ke nye ame dzɔdzɔe la anɔ agbe elabe exɔ dzinye se. Evɔ ne ehe ɖe megbe la, nyemagakpɔ ŋudzedze le eŋu o.”

39Míawo ya la, mímele ame siwo hena ɖe megbe hetsrɔ̃na la dome o, ke boŋ míele ame siwo si xɔse le, eye wole agbe la dome.

← Chapter 9 Jump to: Chapter 11 →