Hebrews 5

Ewe 2014 (EƲEGBE BIBLIA)

← Chapter 4 Jump to: Chapter 6 →

1Elabe nunɔlagã ɖe sia ɖe si wotia tso amewo dome la, ɖe woɖoe anyi be wòanɔ Mawu kple amewo dome awɔ dɔ ɖe amewo teƒe. Eƒe dɔe nye be wòanɔ amewo teƒe atsɔ nunanawo na Mawu, eye wòasa vɔ ɖe woƒe nuvɔ̃wo ta.

2Nunɔlagã sia te ŋu gbɔa dzi blewuu na ame manyanuwo kple mɔtralawo, elabe eya ŋutɔ hã gbɔdzɔna.

3Le esia ta, ele nɛ be wòasa vɔ ɖe eya ŋutɔ ƒe nuvɔ̃wo kple ame bubuwo tɔ siaa ta.

4Ame aɖeke meɖoa eɖokui nunɔlagãe hedea bubu sia eɖokui ŋu o, ke boŋ Mawue yɔnɛ abe ale si wòyɔ Aron ene.

5Ale Kristo hã medo eɖokui ɖe dzi be woaɖo ye nunɔlagãe o, ke Mawue ɖoe hegblɔ be: “Vinye ŋutsuvi nènye; egbea ye medzi wò.”

6Egagblɔ le teƒe bubu aɖe hã be: “Nunɔla nènye tso mavɔ me yi mavɔ me, abe Melxizedek ene.”

7Esime Yesu nye amegbetɔ la, edo gbe ɖa ɖe kuku vevie kple ɣli bobobo kpakple aɖatsi na ame si te ŋu ɖee tso ku me la. Mawu se eƒe gbedodoɖa kple kukuɖeɖe la, elabe evɔ̃a Mawu.

8Togbɔ be Mawu Vi wònye hã la, esrɔ̃ toɖoɖo to fu siwo wòkpe la me.

9Esi Mawu wɔe wòde blibo le go sia go me vɔ la, eva zu ame si dzi ame siwo katã ɖoa toe la tona kpɔa ɖeɖe mavɔ.

10Eyae nye ame si Mawu wɔ wònye nunɔlagã abe Melxizedek ene.

11Nya geɖewo le mía si, siwo míedi be míagblɔ tso nya sia ŋu hafi, gake wo gbɔgblɔ nye dɔ, elabe miete ŋu le nu gɔme sem kabakaba o.

12Esia le eme elabe togbɔ be ele be miawo hã mianye nufialawo fifia hafi hã la, miegahiã ame bubu be wòagafia gɔmedzenu gbãtɔ, siwo le mawunya me la mi. Miele abe vidzĩ siwo gahiã notsi ko, ke menye nuɖuɖu sesẽ o la ene.

13Ame sia ame si le notsi nom la, ɖevi ko wòganye, eye menya naneke le nu dzɔdzɔe wɔwɔ ŋu o.

14Ke ame tsitsiwoe ɖua nu sesẽ. Woawo la, wohe woƒe susu le nu geɖe me. Esia na be wote ŋu dea vovototo nyui kple vɔ̃ dome.

← Chapter 4 Jump to: Chapter 6 →