1 Chronicles 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Filisteayguakuéra ojeity Israel ári; ha Israelgua okañy henonderãgui, ha heta ho’a ipopekuéra ha ojejuka Gilbóa cérrope.

2Ha Filisteayguakuéra omuña Saul ha ita’yrakuérape, ha ojuka hikuái, Jonatan, Abinadab ha Malquisúa, Saul ra’ykuérape.

3Ha ipohýi pohyive pe ñorãirõ ojeitypágui Saul ári; umi hu’y mombohakuéra ojapi ichupe.

4Upémaramo Saul he’i imo’ãhárape: Ehekýi nde kyse puku ha embohasa che rete rehe; ha imo’ãhára ndojaposéi, okyhyjeitereígui. Upémaramo Saul ojapyhy ikyse puku ha ojeity hi’ári.

5Ha imo’ãhára ohechávo Saul omanótama, ojeity avei ikyse puku ári ha omano hendive.

6Péicha omano Saul, mbohapy ita’ýra ndive; ha hendivekuéra omanomba avei hogayguakuéra.

7Ha umi Israelgua oikóva ko ñuguasu kóvape ohechávo Saul ha ita’yrakuéra ojejuka hague, ohejapa itavakuéra ha okañy hikuái, ha Filisteayguakuéra ou oiko itavakuérape.

8Iko’ẽ jevývo, umi Filisteaygua ou ogueraha hag̃ua umi omanomava’ekue mba’ekue, ha ijapytépe ojohu hikuái Saul ha ita’yrakuérape ojepysóva Gilbóa cérrope.

9Ha oipe’apa rire ichugui oguerekóva guive, ogueraha Saul akãngue ha iñorãirõ rembiporukue, ha omondo mba’e mombe’uhára opaite Filisteaygua retãpy rehe, omba’emombe’u hag̃ua ijára ha hetãyguakuérape.

10Ha omoĩ iñorãirõ rembiporu ijára tupãópe, ha iñakãngue omosãingo Dagon tupãópe.

11Ha umi Jabes, Galaadgua, ohendúvo Filisteayguakuéra ojapova’ekue Saúlre,

12oñembyaty opaite kuimba’e ipy’aguasúva oĩva guive upépe ogueru hag̃ua Saul retekue ha avei ita’yrakuéra retekue Jabéspe; ha oñotỹ ikanguekue Jabéspe, peteĩ encína yvyra guýpe, ha 7 ára jave ohasa hikuái okaru’ỹre.

13Péicha Saul omano naiñe’ẽrendúigui ha nomomba’éigui Ñanderuete ñe’ẽ, ha oporandúgui pe kuña, he’íva ijehe, ohenoikuaaha omanóva anguekuérape,

14ha nomba’eporandúigui Ñanderuetépe; upéva rupi Ha’e ojuka ichupe, ha ombohasa hetã ruvicha guapyha David, Isai ra’ýpe.

← Chapter 9 Jump to: Chapter 11 →