1 Chronicles 28

Guarani 2015 (Ñanderuete Ñe’ẽ Porã 2015)

← Chapter 27 Jump to: Chapter 29 →

1David ombyatypa mburuvichakuérape, tríbu ruvichakuérape, umi soldádo atyguasu ruvichápe, umi 1.000 ha 100 arigua ruvichakuérape, umi oñangarekóva tetã ruvicha mba’erepyeta rehe ha ita’yrakuéra rehe, ha umi soldádo ruvichaguasúpe, ipoguýpe opyta umi kuimba’e poguasu ha ipy’aguasuvéva.

2Ha David opu’ã ha ñembo’yhápe he’i: Cherendu, che ryvykuéra ha che retãyguakuéra. Che amopu’ãseva’ekue peteĩ óga oĩ hag̃uáme Ñanderuete karameg̃ua, ha Ñanderuete py rendag̃ua; ha ambosako’ipa umi mba’e oñekotevẽva guive pe tembiapo pévape g̃uarã.

3Ñanderuete katu he’i chéve: Nde neremopu’ãmo’ãi peteĩ óga che rérape, nde ha’égui peteĩ ñorãirõhára ha heta tuguy ñohẽhare.

4Ñanderuete, Israel Jára, cheporavo che ru rogaygua apytégui aiko hag̃ua opaite árape Israel retã ruvicha ramo, Ha’e oiporavo Judápe opaite tríbugui omoakã hag̃ua ambuekuérape, ha Juda rogaguasu apytégui oiporavo che ru róga, ha che ru ra’ykuéra apytégui Ha’e hory cherehe chemoĩ hag̃ua tetã ruvicha ramo, opaite Israel retã ári.

5Ha opaite che ra’ykuéra apytégui, Ñanderuete ome’ẽ chéve heta ta’ýra; Ha’e oiporavo che ra’y Salomónpe oguapy hag̃ua Ñanderuete retã guapyhaguasúpe oisãmbyhy hag̃ua Israel retãme.

6Ha’e he’ígui chéve: Nde ra’y Salomon omopu’ãta che róga ha ikorapykuéra; ichupe aiporavógui che ra’y ramo, ha Che aikóta itúva ramo.

7Upéicha Che amoĩ hatãta ichupe iguapyhaguasúpe opaite árape, ha’e oñeha’ã ramo ojapo hag̃ua che rembiapoukapy ha opaite mba’e ha’éva guive ichupe, ojapo haguéicha ko’ág̃a peve.

8Ko’ág̃a opaite Israelgua resa renondépe, oikóva Ñanderuete atyguasu ramo, ha Ñanderuete apysápe, peheka ha pejapo hekópe Ñanderuete ñe’ẽ, opyta hag̃ua peẽme ha pene ñemonarenguérape g̃uarã Israel retã yvy porãite, pene mba’etee ramo opaite árape.

9Ha nde, che ra’y Salomon, ehechakuaáke nde ru Járape ha eservi ichupe py’a potĩme ha kyre’ỹpópe; Ñanderuete oitypekágui opaite yvyariguakuéra py’apýpe ha oikuaa avei opaite ñane pensamientokuéra. Eheka ichupe ha emba’apo ichupe g̃uarã; ha reñemomombyry ramo ichugui, Ha’e nderejáta katuete avei.

10Ema’ẽke ko’ág̃a, Ñanderuete ndeporavóma remopu’ã hag̃ua Ñanderuete rogaguasu; eñemombaretéke ha ejapopa hekoitépe.

11Ha David ome’ẽ ita’ýra Salomónpe Ñanderuete rogarã ha ogaguyrã ra’ãnga (pláno), oĩháme pe kotyguasu oñemboykéva Ñanderuete ha pa’iguasúpe g̃uarã, pe kotyguasu oñemboykéva pa’ikuérape g̃uarã ha heta ambue kotykuéra.

12Upéicha ombohasa ichupe peteĩ kuatia oĩháme opaite mba’e ojehechaukava’ekue David pytu porãme: Ñanderuete róga korapy ha umi koty oĩva ijerekuévo, oñeñongatu hag̃ua mba’erepyeta.

13Ombohasa avei peteĩ kuatia oĩháme umi pa’i ha Leviguakuéra aty rembiapo rendag̃ua, ha opaichagua tembiaporã ojejapótava guive Ñanderuete rogaguasúpe, ha opaichagua tembiporu ojeporútava guive Ñanderuete rogaguasurãme.

14Ha ome’ẽ ichupe pe óro oñekotevẽtava opaichagua tembiporúpe g̃uarã ojeporútava Ñanderuete rogaguasúpe, ha ome’ẽ avei pe pláta (óro morotĩ) oñekotevẽtava opaichagua tembiporu plataguiguávape g̃uarã.

15Ha pe óro oñekotevẽtava pe tataindyenda ha hataindýpe g̃uarã ome’ẽ avei ichupe.

16Upéicha ome’ẽ avei pe óro oñekotevẽtava umi mesakuérape g̃uarã, hi’ári ojehechauka hag̃ua umi pan, ha upéicha avei pe pláta, umi mesa plataguiguápe g̃uarã.

17Ome’ẽ avei pe óro oñekotevẽtava ojejapo hag̃ua tenedorkuéra, ña’ẽnguéra ha vasokuéra. Ome’ẽ avei pe pláta oñekotevẽtava ojejapo hag̃ua umi járro plataguiguáva.

18Ome’ẽ avei óro porãite kuave’ẽmby rendápe g̃uarã, oñekuave’ẽháme mba’e ryakuã porã, ha avei querubínpe g̃uarã ojepysóva ipepokuéra omo’ã hag̃ua Ñanderuete karameg̃ua.

19Upéi David he’i: Opaite ko’ã mba’e ojehai chéve g̃uarã Ñanderuete po rupi, ha oikuaaukapa chéve opaite tembiaporã ojejapótava guive.

20Ha David he’i avei ita’ýra Salomónpe: Eñemokyre’ỹke, ha eñeha’ãmbáke ha emoñepyrũ ko tembiapo kóva, ani rekyhyjétei ha ani ndepy’akangýtei, Ñanderuete, che Jára, katuete oĩta avei nendive; Ha’e nanderejamo’ãi. Ha’e katuete nepytyvõta, rejapopa peve ko tembiapo kóva Ñanderuetépe g̃uarã.

21Péina ápe umi pa’i ha Levigua atykuéra, oñembosako’íma nepytyvõ hag̃ua pejapopa hag̃ua Ñanderuete rembipota, upéicha avei mburuvichakuéra ha tetãyguakuéra ikatupyrýva oha’ãrõnte nde reñepyrũ remopu’ã hag̃ua Ñanderuete rogaguasu ha opaite mba’e oĩtava ipype ha ijerekue rehe.

← Chapter 27 Jump to: Chapter 29 →