1 Chronicles 5

Guarani 2015 (Ñanderuete Ñe’ẽ Porã 2015)

← Chapter 4 Jump to: Chapter 6 →

1Ruben, Israel ra’y ypykue, ha’e pe ta’ýra ypykue omongy’águi itúva rupa, upévare itúva nome’ẽi ichupe ita’ýra ypykue derécho, ha hendaguépe ome’ẽ Jose ra’ykuérape;

2Juda katu ou oñembohetave ityke’yrakuéra apytépe, ha oiko imburuvicha ramo ijapytepekuéra; Josépe katu oñeme’ẽ pe ta’ýra ypykue derécho.

3Ko’ãva Ruben ra’ykuéra, Israel ra’y ypykue: Hanoc, Falu, Hezron ha Carmi.

4Joel ra’y Semaías, kóva ra’y Gog, kóva ra’y Simei,

5kóva ra’y Mica, kóva ra’y Reaía, kóva ra’y Baal,

6kóva ra’y Beera, kóvape Tilgatpilneser, Asíria retã ruvicha oguerahava’ekue hetãme. Ha oikova’ekue mburuvicha ramo Ruben ñemoñarenguéra apytépe.

7Ha ityke’ýra hogayguakuéra ndive, ojepapa ramoguare hogaguasu rupi oguereko imburuvicha ramo Jeiel, Zacarías,

8ha Bela, kóva Azaz ra’y; kóva Sema ra’y; kóva Joel ra’y, ha oiko hikuái Aroer guive Nebo ha Baal-meon peve.

9Oiko avei pe kuarahyresẽ gotýo guive, pe desiérto ojeikeha peve, ojepysóva Éufrates ysyry guive; hymba hetágui Galaad yvýpe.

10Ha Saul oikoha árape ha’ekuéra ojeity umi Agargua ári, ha ombopoguy ichupekuéra; ha oiko hikuái hóga rymba pirekueguiguápe Galaad guive, kuarahyresẽ gotýo.

11Ha Gad ra’ykuéra oiko Ruben rovái, Basan yvýpe Salca peve.

12Joel oiko huvicha ramo Basan yvýpe; mokõiha, Safan; mbohapyha, Jaanai; irundyha, Safat.

13Ha ityke’yrakuéra, itúva rogaguasu rupi, oĩ Miguel, Mesulam, Seba, Jorai, Jacan, Zia ha Héber; oñondivepa 7.

14Ãva Abihail ra’y meme, kóva Huri ra’y, kóva Jaroa ra’y, kóva Galaad ra’y, kóva Miguel ra’y, kóva Jesisai ra’y, kóva Jahdo ra’y, kóva Buz ra’y.

15Avei Ahi, Abdiel ra’y, Guni ra’yre; Ahi ningo itúva rogaguasu ruvicha.

16Ha oiko hikuái Galaádpe ha Basánpe, ha itava’ikuérape, Saron ñu porã rembe’y peve.

17Opaite ko’ãva ojepapava’ekue iñemoñare rupi Jotam, Juda retã ruvicha árape; ha Jeroboam, Israel retã ruvicha árape.

18Ruben ha Gad ñemoñarenguéra, ha Manases tríbu mbytere, kuimba’e ipy’aguasúva oiporu porã hete mo’ãha ha ikyse puku, oipyso porã hikuái iguyrapa, ha ikatupyry hikuái ñorãirõme, oĩ 44.760 soldádo iporãva.

19Ko’ãva oñorãirõ umi Agargua ndive, Jetur, Nafis ha Nodab ndive.

20Ha Israelguakuéra ohupity ñepytyvõ Ñanderuetégui ombopoguy hag̃ua Agargua ha hendiveguakuérape; omba’ejerurégui Ñanderuetépe oñorãirõ jave, osẽ porãmba hag̃ua ichupekuéra, ojeroviágui hese.

21Ha ojapyhy hikuái hymbakuéra: 50.000 caméllo, 250.000 ovecha, 2.000 búrro ha 100.000 tembiguái hese ija’e’ỹvakuéragui.

22Heta omano hikuái, Ñanderuete voi oñorãirõgui hesehapekuéra. Rubengua, Gadgua ha Manases tríbu mbytere oiko hendaguépe ojegueraha peve jepokuapýpe Asíria retãme.

23Ha Manases tríbu mbytere oñembohetaiterei; ha oiko Basan guive Baal-Hermon peve, Senir ha Hermon cérro peve.

24Ko’ãva itúva rogaguasu ruvicha: Éfer, Isi, Eliel, Azriel, Jeremías, Hodavías ha Jahdiel, kuimba’ekuéra ipy’aguasúva ha oñeha’ãmbaitéva, kuimba’ekuéra herakuã porãva.

25Ha oñemoĩ hikuái ituvakuéra Jára rehe, ha omboyke hikuái Ñanderuetépe, omomba’eguasu hag̃ua ambue tetã járape, Ñanderuete oipe’ava’ekue henonderãguikuéra iñañáva.

26Upévarehe Israel Jára omoinge Asíria retã ruvichakuéra Pul ha Tilgat-pilneser angapýpe ogueraha hag̃ua Rubenguakuérape, Gadguakuérape ha Manases tríbu mbyterépe. Ha ogueraha ichupekuéra Halah, Habor, Hara ha Gozan ysyry rembe’ýpe ko ára peve.

← Chapter 4 Jump to: Chapter 6 →