1 Chronicles 26

Guarani 2015 (Ñanderuete Ñe’ẽ Porã 2015)

← Chapter 25 Jump to: Chapter 27 →

1Oñemoĩ avei okẽ ñangarekoharakuéra hembiaporãme: Coreguakuéragui Meselmías, kóva Core ra’y, ha kóva Asaf ra’ykuéra apytégui.

2Meselmías ra’ykuéragui: Zacarías, pe ijypykue; Jediael, pe mokõiha; Zebadías, pe mbohapyha; Jatniel, pe irundyha.

3Elam, pe 5-ha; Johanan, pe 6-ha; Elioenai, pe 7-ha.

4Obed-edom ra’ykuéragui: Semaías, pe ijypykue; Jozabad, pe mokõiha; Joah, pe mbohapyha; Sacar, pe irundyha; Natanael, pe 5-ha;

5Amiel, pe 6-ha; Isacar, pe 7-ha; Peultai, pe 8-ha, Ñanderuete ohovaságui Obed-edómpe.

6Ha ita’ýra Semaíaspe g̃uarã onace ta’ýra ikatupyrýva ha oipytyvõva oisãmbyhy hag̃ua itúva rógape.

7Semaías ra’ykuéra: Otni, Rafael, Obed, Elzabad ha ityvyrakuéra, kuimba’e oñeha’ãmbaitéva upéicha avei Eliu ha Semaquías.

8Ko’ãva Obed-edom ñemoñarenguéra meme; ita’yrakuéra ha ityvyrakuéra ikatupyry ha oñeha’ãmbaite hembiapópe, oñondivepa oĩ 62 Obed-edom ñemoñare.

9Ha Meselemías ra’ykuéra ha ityvyrakuéra, oĩ 18 kuimba’e ipy’aguasúva meme.

10Hosa, peteĩ Merari ñemoñare, omoĩ Simrípe ita’yrakuéra ruvicha ramo ndaha’éirõ jepe ita’ýra tenondegua.

11Pe mokõiha, Hilcías, pe mbohapyha, Tebalías, pe irundyha, Zacarías; Hosa ra’ykuéra ha ityvyrakuéra oñondivepa oĩ 13.

12Ko’ãva apytépe ojeporavo jevy po’a jeporavo rupi, moõpa ha’ekuéra oñangarekóta ha mba’eichagua okẽ rehépa oñangarekóta. Umi omoakãva ha iñirũnguéra rembiapo peteĩcha, oimeraẽva katu ijaty atýpe.

13Upérõ ojeity po’a jeporavo rupi umi imitãvéva ha itujavéva apytépe, ojekuaa hag̃ua hembiapo rendag̃ua.

14Ha pe po’a jeporavo ho’a Selemías ári, ha’e oñangareko hag̃ua pe yke opytáva kuarahyresẽ gotyoguápe. Ha oñemoĩ avei po’a jeporavópe ita’ýra Zacaríaspe, peteĩ oporohekombo’e porãva oñangareko hag̃ua pe okẽ opytáva nórte gotyoguápe.

15Obed-edómpe g̃uarã opyta pe okẽ sur gotyoguápe, ha ita’yrakuérape g̃uarã opyta pe óga oñeñongatuhápe hi’upykuéra.

16Supim ha Hosápe g̃uarã, opyta pe yke kuarahyreike gotyoguápe, pe Salequet rokẽ, pe tape ojupivehápe, omba’apo hag̃ua iñangarekohára atýpe ambue ñangarekohára aty ndive.

17Kuarahyresẽ gotýo opyta 6 Levigua oñangareko hag̃ua; nórtepe, arakuépe irundy; sur gotýo, arakuépe irundy; ha pe óga hi’upyrã oñeñongatuhápe mokõi mokõi.

18Pe koty tembiporukuéra oñeñongatuhápe kuarahyreike gotýo oĩ irundy oñangarekóva pe tapére, ha mokõi oñangarekóva umi koty rehe.

19Péicha oñemohenda umi okẽ ñangarekohára, Core ha Merari ñemoñarenguéra apytépe.

20Ha Leviguakuéra apytégui ojeporavo Ahíaspe oñangareko hag̃ua mba’erepy rehe ha umi mba’e oñemboykémava Ñanderuetépe g̃uarã ha ojeguerúva Ñanderuete rogaguasúpe.

21Ha Gerson ñemoñarenguéragui opyta Laadan ra’ykuéra ha ijapytégui Jehiel, hogayguakuéra reheve.

22Jehiel ra’ykuéra, Setam ha Joel, oñangareko mba’erepy rehe ojeguerúva Ñanderuete rogaguasúpe.

23Amram, Izhar, Hebron ha Uziel ñemoñarenguéragui opyta,

24Sebuel, Gerson ra’y, Moises ra’yre, omoakã hag̃ua umi mba’erepyeta ñangarekoharakuérape,

25ityvýra Eliézer ndive, kóva ra’y Rehabías, kóva ra’y Jesaías, kóva ra’y Joram, kóva ra’y Zicri, ha kóva ra’yre Selomit.

26Ko Selomit ha ityvyrakuéra opyta ñangarekohára ruvicha ramo opaite mba’erepyeta tetã ruvicha David ome’ẽva’ekue Ñanderuete rogaguasúpe g̃uarã, ha umi mburuvicha 1.000 arigua, 100 arigua ha soldádo atyguasu ruvichakuéra ome’ẽmava’ekue Ñanderuetépe g̃uarã ime’ẽmby ramo.

27Ha umi mba’erepyeta ojepe’ava’ekue hese ija’e’ỹvagui ñorãirõme ha oñemboykemava’ekue Ñanderuetépe ojeporu oñemyatyrõ jevy hag̃ua Ñanderuete rogaguasu.

28Upéicha avei opaite mba’e pe proféta Samuel; Saul, Cis ra’y; Abner, Ner ra’y; Joab, Sarvia memby, ome’ẽmava’ekue Ñanderuetépe opyta Selomit ha ityvyrakuéra poguýpe.

29Izharguakuéragui, Quenanías ha ityvyrakuéra opyta sãmbyhyhára ha mbojovakehára Israelguakuéra ha tetã ambueyguakuérape g̃uarã.

30Hebronguakuéragui opyta Hasabías ha ityvyrakuéra, 1.700 kuimba’e ikatupyrýva oisãmbyhy hag̃ua Israelguakuérape oikóva Jordan mboypýri, pe kuarahyreike gotýo, oñangareko hag̃ua opaite Ñanderuete rembiapo ha tetã ruvicha rembiapóre.

31Tetã ruvicha David oisãmbyhývo 40 áño Israel retãme, opyguara hikuái hogaguasu ha hóga apytépe, ha ojejohu umi kuimba’e ikatupyrýva oikóva Jazer, Galaad yvýpe.

32Ha ityvyrakuéra apytépe ojejohu 2.700 kuimba’e ipy’aguasúva, umívape tetã ruvicha David omoĩ Rubenguakuéra, Gadguakuéra ha Manases tríbu mbytere ári, oñangareko hag̃ua opaite mba’e Ñanderuete mba’éva rehe ha tetã ruvicha mba’e ñemúme (negócio).

← Chapter 25 Jump to: Chapter 27 →