1 Chronicles 22

Guarani 2015 (Ñanderuete Ñe’ẽ Porã 2015)

← Chapter 21 Jump to: Chapter 23 →

1Ha upérõ David he’i ko’ápe ñamopu’ãta Ñanderuete rogaguasu, ha ko’ápe oĩta pe kuave’ẽmby ojehapyva’erãva rendag̃ua.

2Upéi David ombyatyuka opaite ambue tetãygua oikóva gueteri Israel retãme, ha ijapytégui oiporavo umi omba’apokuaáva ita rehe ombosako’i hag̃ua ita Ñanderuete rógape g̃uarã.

3Upéicha David ombosako’i avei heta hiérro clavorã oñemoĩva’erã okẽnguéra rehe, ha mamo oñembojoapy hag̃ua rupi; ha hetaiterei brónce ojekuaave’ỹre ipohyikue, ha cédro yvyra ojepapave’ỹre avei.

4Umi Sidongua ha Tiroygua ogueru David rendápe heta cédro.

5Ha David he’i: Che ra’y Salomon imitã ha ikyrỹi gueteri, ha pe óga oñemopu’ãtava Ñanderuetépe g̃uarã iporãitereiva’erã, herakuã porã ha oñemomba’eguasu hag̃uáicha opaite yvy apére; ko’ág̃a che ambosako’ipáta ichupe g̃uarã ha’e oikotevẽtava guive. Upéicha rupi David ombyaty hetaiterei mba’e oñekotevẽtava Ñanderuete rogaguasurãme g̃uará.

6Upéramo David ohenói ita’ýra Salomónpe ha he’i ichupe omopu’ã hag̃ua Ñanderuete róga, Israel Járape g̃uarã.

7Ha David he’ive ichupe: Nde che ra’y, che py’apýpe ha’eva’ekue amopu’ãtaha Ñanderuete rogarã, che Jára rérape.

8Ñanderuete katu he’i chéve: Heta tuguy reñohẽva’ekue ha rejapova’ekue ñorãirõ tuicháva; upévare nde neremopu’ãmo’ãi che rérape g̃uarã peteĩ óga, reñohẽgui che renondépe yvy apére hetaiterei tuguy.

9Ha péina ápe onacéta nde ra’yrã, ha upe kuimba’e ipy’aguapýta ha ame’ẽta ichupe py’aguapy opaite tetã hese ija’e’ỹvagui ijerekuévo oĩva guive; hérata Salomon, ha Che ame’ẽta py’aguapy ha pytu’u ha’e oikove aja.

10Ha’e omopu’ãta che rérape g̃uarã pe óga péva, ha’éta che ra’yrã ha che, ituvarã; ha amoĩ hatãta iguapyhaguasúpe oisãmbyhy hag̃ua opaite árape Israel retãme.

11Ko’ág̃a, nde, che ra’y, Ñanderuete toĩ nendive, tanemoakãrapu’ã, ha emopu’ã peteĩ ogaguasu Ñanderuetépe g̃uarã, Ha’e he’i haguéicha nderehe.

12Ha Ñanderuete tome’ẽ ndéve: Akãporã, katupyry ha arandu, ikatu hag̃uáicha reisãmbyhy porã Israélpe, rejapóvo Ñanderuete, nde Jára rembiapoukapy ha hembipota Ha’e he’i haichaite.

13Upéicha reñakãrapu’ãta, reñeha’ãmba rejapo hag̃ua hekoitépe Ñanderuete rembiapoukapy, Ha’e ombohasava’ekue Moises rupi Israélpe g̃uarã. Eñeha’ã, ha eñemokyre’ỹ, ani rekyhyjétei, ha ani ndepy’akangýtei.

14Péina ápe che añeha’ãmbáma ha ambosako’íma Ñanderuete rogaguasúpe g̃uarã 3.350.000 kílo óro, 33.500.000 kílo pláta (óro morotĩ), hetaiterei brónce ha hiérro, noñeha’ãvéimava mboýpa ipohyikue. Upéicha ambosako’i avei hetaiterei ita ha yvyra, ha umíva ári katuete nde remoĩvéta.

15Nde reguereko nendive heta mba’apohára, ita jokaha, óga mopu’ãha, yvyráre omba’apóva, ha opaichagua kuimba’e ikatupyrýva opaite mba’e apópe.

16Pe óro, pe pláta, pe brónce ha hiérro ndojekuaái mboýpa oĩ. Epu’ã ha ejeity ko tembiapo kóvape; ha Ñanderuete toĩ nendive.

17Upéicha David oñe’ẽ avei opaite Israel ruvichakuérape, oipytyvõ hag̃ua ita’ýra Salomónpe, ha he’i:

18Ñanderuete, Ñandejára voi ome’ẽ peẽme py’aguapy opa rupiete. Ha’e omoĩma che poguýpe umi tetãme oikóva guive ñande jerekuévo, ha ko yvy opyta Ñanderuete ha Israel poguýpe.

19Ko’ág̃a peñeha’ã py’a kyre’ỹ reheve peheka hag̃ua Ñanderuete, pende Járape; ha pemopu’ã joa Ñanderuete rogaguasu, Ñanderuete karameg̃ua ha hogaguasu rembiporu rendag̃ua; pejapo porãmba hag̃ua Ñanderuete rogaguasúpe.

← Chapter 21 Jump to: Chapter 23 →